ភ្នំពេញៈ ទិសដៅទេសចរណ៍សំខាន់ៗរបស់កម្ពុជាបានទាក់ទាញភ្ញៀវទេសចរជាងកន្លះលាននាក់ក្នុងអំឡុងព្រឹត្តិការណ៍ ឆ្លងឆ្នាំ ២០១៩ ដែលធ្វើឲ្យការធ្វើដំណើររបស់ភ្ញៀវទេសចរទូទាំងប្រទេសមានចំនួនសរុប ៣ លាននាក់ ក្នុងនោះទីក្រុងភ្នំពេញមានជាង ២ លាននាក់។ នេះបើតាមតួលេខបានពីក្រសួងទេសចរណ៍។
ខេត្តតំបន់ឆ្នេរ និងខេត្តសៀមរាបបានទាក់ទាញភ្ញៀវទេសចរសរុបចំនួន ៦៧១ ០៦៣ នាក់ ក្នុងនោះ ៦៤ ៨៩៧ គឺជាភ្ញៀវទេសចរអន្តរជាតិ។ នេះបើយោងតាមតួលេខ។
បើបែងចែកតាមខេត្តនីមួយៗ សៀមរាបបានស្វាគមន៍ភ្ញៀវទេសចរ ២៨៤ ០៣១ នាក់ ក្នុងនោះ ២៨ ០៧០ នាក់ជាភ្ញៀវទេសចរបរទេស ក្នុងអំឡុងរាត្រីមុនឆ្លងឆ្នាំ ខណៈក្រុងព្រះសីហនុ ដែលគ្របដណ្ដប់ដោយជនជាតិចិន ទទួលបាន ១៥៥ ៥០០ នាក់ ក្នុងចំណោមនោះ ៩៤ ៦៥៤ នាក់ជាភ្ញៀវទេសចរក្នុងស្រុក។
ខេត្តកែប និងកំពត គឺជាទិសដៅទាក់ទាញខ្លាំងបំផុតក្នុងអំឡុងព្រឹត្តិការណ៍នេះ ដែលខេត្តកែប បានទាក់ទាញភ្ញៀវទេសចរសរុប ១៥២ ៧២៨ នាក់ និងខេត្តកំពត សរុប ៩៦ ៨១៣ នាក់។ នេះបើយោងតាមតួលេខ។
លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា ខេត្តតំបន់ឆ្នេរគឺជាខេត្តដ៏សំខាន់ក្នុងការទាក់ទាញភ្ញៀវទេសចរអន្តរជាតិ និងភ្ញៀវទេសចរជាតិកាន់តែច្រើនមកប្រទេស កម្ពុជា ជាពិសេសខេត្តព្រះសីហនុ។
លោកថ្លែងថា៖ «យើងតែងតែប្រារព្ធរាល់ពិធីបុណ្យទាំងអស់ និងថ្ងៃមុនចូលឆ្នាំសកល ដើម្បីទាក់ទាញភ្ញៀវទេសចរបរទេស និងក្នុងស្រុកចូលរួមពេលវេលាដ៏រីករាយនៅតាមឆ្នេរ និងសហគមន៍ជនបទ»។ លោកបន្តថា៖ «នៅពេលនេះ យើងព្យាយាមកែលម្អហេដ្ឋារចនាសម្ព័ន្ធ និងបដិសណ្ឋារកិច្ចផងដែរ ដើម្បីឆ្លើយតបតម្រូវការទីផ្សារ»។
លោកបន្តថា ក្រសួងទេសចរណ៍ ក៏បានផ្ដល់ការបណ្ដុះបណ្ដាលជាច្រើនដល់វិស័យទេសចរណ៍ ដើម្បីបង្កើនការយល់ដឹងផ្នែកទេសចរណ៍ផងដែរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឲ្យដឹងថា ស្ថិរភាព និងកំណើនសេដ្ឋកិច្ចរបស់ប្រទេស កម្ពុជា កំពុងជំរុញកំណើនភ្ញៀវទេសចរ។
លោកស្រីថ្លែងថា៖ «យើងមានហេដ្ឋារចនាសម្ព័ន្ធ និងសន្ដិសុខល្អ ពីមួយឆ្នាំទៅមួយឆ្នាំ ប្រជាជនកាន់តែច្រើនឡើងៗកំពុងរីករាយក្នុងការធ្វើដំណើរកម្សាន្ត»។ លោកស្រីបន្តថា៖ «យើងចាំបាច់ត្រូវលើកកម្ពស់គុណភាពសេវា និងបដិសណ្ឋារកិច្ច ព្រមទាំងបង្កើតផលិតផលទេសចរណ៍កាន់តែច្រើន ដូចជាផលិតផលក្នុងស្រុក ដើម្បីផ្ដល់ការចងចាំដ៏ល្អសម្រាប់ភ្ញៀវទេសចរ ដើម្បីនាំយកត្រឡប់ទៅផ្ទះវិញ»។
លោក ថោង ខុន រដ្ឋមន្ដ្រីក្រសួងទេសចរណ៍ បានព្យាករកាលពីខែមុនក្នុងពិធីបុណ្យសមុទ្រនៅខេត្តកោះកុងថា ខេត្តជាប់តំបន់ឆ្នេរនឹងទទួលទេសចរ ៤,៤២ លាននាក់ត្រឹមចុងឆ្នាំ ២០១៨ ដែលក្នុងនោះភ្ញៀវទេសចរបរទេសនឹងកើនឡើងដល់ ៩២០ ០០០ នាក់។
ក្នុងការព្យាកររយៈពេលខ្លីត្រឹមឆ្នាំ ២០២០ ខេត្តតំបន់ឆ្នេរមួយនេះនឹងទាក់ទាញភ្ញៀវទេសចរបរទេស ១,២ លាននាក់ និងភ្ញៀវទេសចរក្នុងស្រុក ៤,៥ លាននាក់។ លោករដ្ឋមន្ដ្រីបានឲ្យដឹងថា ត្រឹមឆ្នាំ ២០៣០ តំបន់នេះនឹងទទួលបានភ្ញៀវទេសចរអន្តរជាតិ ៣ លាននាក់ និងភ្ញៀវទេសចរក្នុងស្រុក ៦ លាននាក់៕LA