វ៉ាស៊ីនតោនៈ លោកប្រធានាធិបតី ដូណាល់ ត្រាំ បានឲ្យដឹងកាលពីថ្ងៃអង្គារថា លោកពិតជាចង់បញ្ចៀសគោលនយោបាយដែលនាំឲ្យពិបាកដល់ការធ្វើពាណិជ្ជកម្មរបស់បណ្ដាប្រទេសផ្សេងទៀតជាមួយអាមេរិក ទោះបីជារដ្ឋបាលរបស់លោកបានធ្វើផ្ទុយពីបំណងនេះក៏ដោយ។
លោក ត្រាំ បានហូតពន្ធនាំចូលលើទំនិញមានតម្លៃរាប់ពាន់លានដុល្លារ និងបានបង្កជម្លោះជាមួយដៃគូពាណិជ្ជកម្មសំខាន់ៗរបស់អាមេរិកក្នុងរយៈពេល ៣ ឆ្នាំចុងក្រោយនេះ ប៉ុន្តែក្នុងសុន្ទរកថា តាម Twitter ដ៏វែងមួយលោកប្រធានាធិបតីបានថ្លែងថា៖ «យើងចង់ឲ្យវាអាចធ្វើទៅបានក្នុងការធ្វើអាជីវកម្មជាមួយយើង។ ការមិនអាចទៅរួចនឹងមានន័យថា ការបញ្ជាទិញនឹងទៅកន្លែងផ្សេងទៀត»។
លោកបានសរសេរលើ Twitter ថា៖ «អាមេរិកមិនអាចនឹងមិនក្លាយជាកន្លែងដ៏ពិបាកមួយក្នុងការធ្វើពាណិជ្ជកម្មជាមួយបរទេសដែលទិញផលិតផលរបស់យើងទេ រួមទាំងការប្រើប្រាស់លេសសន្ដិសុខជាតិដែលក្រុមហ៊ុនរបស់យើងនឹងត្រូវបង្ខំឲ្យចាកចេញ ដើម្បីរក្សាសមត្ថភាពប្រកួតប្រជែងផងដែរ»។
លោក ត្រាំ បានហូតពន្ធនាំចូលលើដែកថែប និងអាលុយមីញ៉ូមទូទាំងពិភពលោក ដោយបានហៅការនាំចូលទាំងនោះថា គឺជាការគំរាមកំហែងសន្ដិសុខជាតិ និងបានគំរាមថា នឹងធ្វើដូចគ្នាសម្រាប់រថយន្តមកពីអឺរ៉ុប។
នៅក្នុងជម្លោះដែលខាតបង់ខ្លាំងបំផុតលោក ត្រាំ បានប្រកាសពន្ធនាំចូលស្ទើរតែ ១០០ ភាគរយ លើទំនិញនាំចូលមកពីចិន។ ការបញ្ឈប់សង្គ្រាមពាណិជ្ជកម្មដែលបានចុះហត្ថលេខាពីខែមករាបានផ្អាកការធ្វើឲ្យខូចខាតខ្លាំងបំផុតនៃពន្ធនាំចូលទាំងនោះ ប៉ុន្តែភាគច្រើននៅតែកំពុងអនុវត្ត។
ដៃគូពាណិជ្ជកម្មរបស់អាមេរិកជាច្រើនមិនបានគាំទ្រ ដោយការសងសឹកជាមួយនឹងពន្ធពិន័យលើទំនិញអាមេរិកដូចជាស្រា ម៉ូតូ និងផលិតផលកសិកម្ម ដែលតម្រូវឲ្យរដ្ឋត្រូវផ្ដល់ជំនួយរាប់លានដុល្លារដល់កសិករ។
ក្នុងជម្លោះចុងក្រោយបំផុតដែលជាជម្លោះមានរយៈពេល ១៥ ឆ្នាំ ជុំវិញការឧបត្ថម្ភធនរបស់រដ្ឋាភិបាលដល់ក្រុមហ៊ុន Airbus ទីក្រុងវ៉ាស៊ីនតោនបានហូតពន្ធនាំចូល ២៥ ភាគរយលើទំនិញជាច្រើនដែលរួមមានស្រាស្កុតវិស្គី ស្រាបារាំង និងស្រាអេស្ប៉ាញ និងឈីសរបស់ចក្រភពអង់គ្លេស។
លោក ត្រាំ ក៏បានហូតពន្ធពិន័យលើទំនិញរបស់ប្រទេស បារាំង ជាការឆ្លើយតបនឹងពន្ធឌីជីថលលើក្រុមហ៊ុនអាមេរិកផងដែរ។ លោកបន្តថា ទោះយ៉ាងណា «ខ្ញុំចង់ធ្វើឲ្យវាងាយស្រួលក្នុងការធ្វើអាជីវកម្មជាមួយអាមេរិកដែលមិនមានការពិបាក»៕ LA