.jpg)
លោក ដូណាល់ ត្រាំ កំពុងជជែកទៅកាន់សមាជិកសហជីព TUOE។ រូបថត AFP
ក្រុងក្រូសប៊ីៈ ក្នុងតំបន់ភាគកណ្តាលដែលសម្បូរប្រេងរបស់អាមេរិក លោកប្រធានាធិបតី ដូណាល់ ត្រាំ កាលពីថ្ងៃពុធ បានប្រកាសពីការចុះហត្ថលេខាលើបញ្ជាប្រតិបត្តិចំនួន ២ ដើម្បីបង្កើនល្បឿន ការសាងសង់បំពង់បង្ហូរប្រេង និងឧស្ម័នដែលធ្វើឲ្យក្រុមអ្នកបរិស្ថានមិនសប្បាយចិត្ត។
វិធានការចុងក្រោយបំផុតនេះធ្វើឡើងស្របជាមួយនឹងវិធានការផ្សេងទៀត ដែលរដ្ឋបាលរបស់លោក បានធ្វើឡើងដើម្បីបន្ធូរបន្ថយបទប្បញ្ញត្តិរបស់វិស័យថាមពលដែលជាវិស័យដ៏សំខាន់មួយ និងជាប្រភពកំណើននៅរដ្ឋតិចសាស ជាទីដែលលោកបានប្រកាសពីបញ្ជាប្រតិបត្តិការនេះទៅកាន់សហជីពពាណិជ្ជកម្មវិស្វករប្រតិបត្តិការ (TUOE)។
លោកប្រធានាធិបតីរូបនេះបានឲ្យដឹងនៅទីក្រុងក្រូសប៊ីនៅជិតទីក្រុងហ៊ូស្តុនថា៖ «ជាញឹកញាប់ណាស់ ហេដ្ឋារចានាសម្ព័ន្ធថាមពលដែលត្រូវការខ្លាំងបំផុតកំពុងត្រូវបានរារាំងដោយក្រុមដែលមានផលប្រយោជន៍ពិសេស ការិយាធិបតេយ្យដែលមិនងាយផ្លាស់ប្តូរ និងសកម្មជនសំខាន់ៗ»។
លោក ត្រាំ ដែលបន្ទាប់មកបានអនុម័តវិធានការជាច្រើនជាផ្លូវការនោះ បានថ្លែងថា៖ «ខ្ញុំនឹងចុះហត្ថលេខាលើបញ្ជាប្រតិបត្តិដើម្បីបន្ត និងធ្វើឲ្យរស់ឡើងវិញនៃឧស្សាហកម្មថាមពលនិងការងាររបស់អាមេរិក»។
លោកថ្លែងថា៖ «វិធានការរបស់ខ្ញុំនៅថ្ងៃនេះ នឹងដោះស្រាយការខូចខាតដែលធ្វើឲ្យមានការពន្យារពេល និងការបដិសេធនានា»។
លោកបានប្រាប់ក្រុមអ្នកគាំទ្ររបស់លោកថា វិធានការទាំងនេះមានបំណងដាក់កម្រិតការពន្យារពេលក្នុងការទទួលបានការអនុញ្ញាតដើម្បីសាងសង់ហេដ្ឋារចនាសម្ព័ន្ធមួយចំនួនដែលរួមទាំងបំពង់បង្ហូរប្រេង ហើយនឹងផ្ដល់ដល់លោកប្រធានាធិបតីនូវ «សិទ្ធិអំណាចតែមួយគត់ ដើម្បីធ្វើការសម្រេចចិត្តចុងក្រោយនៅពេលយើងជួបបញ្ហា»។
សហរដ្ឋអាមេរិកផលិតប្រេងឆៅបាន ១២,២ លានបារ៉ែលក្នុង ១ ថ្ងៃជាមធ្យម ដែលច្រើនបំផុតលើពិភពលោក។ នេះបើតាមតួលេខបានពីរដ្ឋបាលព័ត៌មានថាមពល (EIA) អាមេរិកដែលបានចេញផ្សាយកាលពីថ្ងៃពុធ៕ AFP/LA
