ក្រុងតូក្យូៈ លោកប្រធានាធិបតី ដូណាល់ ត្រាំ កាលពីថ្ងៃសៅរ៍បានប្ដេជ្ញាថានឹងធ្វើឲ្យទំនាក់ទំនងពាណិជ្ជកម្មអាមេរិកជាមួយប្រទេស ជប៉ុន ស្មើភាពគ្នាថែមបន្តិចទៀត ខណៈលោកបានចេញដំណើរទៅបំពេញទស្សនកិច្ចរយៈពេល ៤ ថ្ងៃនៅទីក្រុងតូក្យូ ក្នុងគោលបំណងពង្រឹងទំនាក់ទំនងរវាងសម្ព័ន្ធមិត្តជិតស្និទ្ធទាំង ២ នេះ។
ដំណើរទស្សនកិច្ចរយៈពេល ៤ ថ្ងៃរបស់លោក ត្រាំ ត្រូវបានរំពឹងថា នឹងបង្កើតឲ្យមានពាក្យសម្ដីប្រកបដោយភាពកក់ក្ដៅជាច្រើន ខណៈដែលលោក លេងកូនហ្គោល និងមើលកីឡាស៊ូម៉ូជាមួយ «មិត្ត» របស់លោក គឺលោក ស៊ីនហ្សូ អាបេ ដែលជានាយករដ្ឋមន្ដ្រីរបស់ប្រទេស ជប៉ុន។
ប៉ុន្តែប្រទេសមានសេដ្ឋកិច្ចធំទី១ និងទី៣ របស់ពិភពលោកទាំង ២ នេះ នឹងពិភាក្សាពីកិច្ចព្រមព្រៀងពាណិជ្ជកម្ម ហើយលោក ត្រាំ មិនបានខ្ជះខ្ជាយពេលវេលា ក្នុងការវាយប្រហារក្នុងអ្វីដែលលោកមើលឃើញថាជាអតុល្យភាពមួយរវាងប្រទេសទាំង ២ នោះទេ។
លោក ត្រាំ ប្រាប់ក្រុមមេដឹកនាំមកពីក្រុមហ៊ុនឈានមុខគេមួយចំនួនរបស់ប្រទេស ជប៉ុន ដែលរួមមានក្រុមហ៊ុន Toyota ក្រុមហ៊ុន Honda និងក្រុមហ៊ុន Nissan ថា៖ «ប្រទេស ជប៉ុន ទទួលបានអត្ថប្រយោជន៍ខ្ពស់ជាងរយៈពេលជាច្រើនឆ្នាំ។ ប៉ុន្តែមិនអីទេ ប្រហែលនោះជាមូលហេតុដែលអ្នកចូលចិត្តយើងខ្លាំង»។
លោកប្រធានាធិបតីបានប្ដេជ្ញាថា បន្ទាប់ពីកិច្ចព្រមព្រៀងពាណិជ្ជកម្មទ្វេភាគីមួយ ត្រូវបានចុះហត្ថលេខា វានឹង «ស្មើភាពគ្នាថែមជាងនេះបន្តិចទៀត»។
លោក ត្រាំ ថ្លែងថា៖ «ជាមួយនឹងកិច្ចព្រមព្រៀងនេះ យើងសង្ឃឹមថានឹងដោះស្រាយអតុល្យភាពពាណិជ្ជជម្រុះចោលឧបសគ្គចំពោះការនាំចេញរបស់អាមេរិក និងធានាភាពស្មើភាពគ្នា និងភាពទៅវិញទៅមកនៅក្នុងទំនាក់ទំនងរបស់ពួកយើង។ យើងកំពុងជិតសម្រេចបានហើយ»។
លោកបន្ថែមថា៖ «យើងសង្ឃឹមថា នឹងមានសេចក្ដីប្រកាសបន្ថែមមួយចំនួនក្នុងពេលឆាប់ៗ ហើយនឹងមានកិច្ចព្រមព្រៀងធំៗមួយចំនួនក្នុងពេល ២-៣ ខែក្រោយ»។
អ្នកសង្កេតការណ៍សង្ស័យថា លោក អាបេ កំពុងក្រាលកម្រាលព្រំក្រហមទទួលលោក ត្រាំ ដើម្បីបង្ហាញថា ជប៉ុនជាប្រទេសអនុគ្រោះបំផុតក្នុងចំណោមប្រទេសពាក់ព័ន្ធក្នុងជម្លោះពាណិជ្ជកម្មជាមួយអាមេរិក ប៉ុន្តែមានការរំពឹងថានឹងមានភាពរីកចម្រើនជាក់ស្ដែងតិចតួច៕ AFP/LA