.jpg)
ក្រុមបាតុករបិទផ្លូវចូលនៅក្នុងអគារព្រលានយន្តហោះអន្តរជាតិក្រុងហុងកុងនាពេលថ្មីៗនេះ។ រូបថត AFP
ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ បានរំឭកប្រទេសចិនថា ការអនុវត្តការបង្ក្រាបតាមរបៀបដែលបានធ្វើឡើងនៅទីលានធានអាមិនទៅលើក្រុមអ្នកតវ៉ាប្រឆាំងដែលគាំទ្រលទ្ធិប្រជាធិបតេយ្យនៅទីក្រុងហុងកុងនឹងធ្វើឲ្យប៉ះពាល់ដល់ការចរចាពាណិជ្ជកម្មរវាងប្រទេសទាំង ២។
លោក ត្រាំ បានប្រាប់ក្រុមអ្នកយកព័ត៌មាននៅរដ្ឋ New Jersey ថា៖ «ខ្ញុំគិតថា វាពិតជាពិបាកដោះស្រាយខ្លាំងណាស់ បើពួកគេប្រើអំពើហិង្សា។ ខ្ញុំមានន័យថា បើវាជាទីលានធានអាមិនមួយផ្សេងទៀត»។ លោកបន្តថា៖ «ខ្ញុំគិតថា វាគឺជារឿងពិបាកធ្វើណាស់ ប្រសិនបើមានអំពើហិង្សា»។
ជម្លោះពាណិជ្ជកម្មរយៈពេលជាច្រើនខែរវាងអាមេរិក និងចិនត្រូវបានស្ដីបន្ទោសថា បានបង្កឲ្យទីផ្សារហិរញ្ញវត្ថុពិភពលោកមានការបារម្ភ ចំពេលមានសញ្ញានៃការធ្លាក់ចុះសេដ្ឋកិច្ចពិភពលោកដែលអាចកើតឡើង។
ការអត្ថាធិប្បាយរបស់លោក ត្រាំ បានធ្វើឡើង ខណៈដែលទីក្រុងវ៉ាស៊ីនតោន និងទីក្រុងប៉េកាំង ស្វែងរកការចាប់ផ្ដើមឡើងវិញនូវការចរចាកម្រិតខ្ពស់ដ៏សំខាន់សំដៅបញ្ចប់សង្គ្រាមពាណិជ្ជកម្មរបស់ពួកគេ។
លោក Larry Kudlow ប្រធានទីប្រឹក្សាសេដ្ឋកិច្ចរបស់លោក ត្រាំ បានឲ្យដឹងកាលពីថ្ងៃអាទិត្យថា ការទូរស័ព្ទជជែកគ្នារវាងអ្នកតំណាងរបស់ប្រទេសទាំង ២ គ្រោងធ្វើឡើងក្នុងពេល ១០ ថ្ងៃក្រោយហើយប្រសិនបើអ្នកតំណាងទាំងនោះទទួលបានជោគជ័យ ការចរចារវាងមន្ដ្រីជាន់ខ្ពស់បន្ថែមទៀត អាចចាប់ផ្ដើមឡើងវិញ។
ទន្ទឹមនឹងនេះទីក្រុងហុងកុងត្រូវបានរង្គោះរង្គើក្នុងរយៈពេលជាង ២ ខែមកនេះ ដោយសារតែការតវ៉ាប្រឆាំង ហើយកាលពីថ្ងៃអាទិត្យបានមើលឃើញក្រុមមនុស្សដែលជាអ្នករៀបចំបានឲ្យដឹងថា ប្រជាជនដែលបានចូលរួមតវ៉ាចំនួនប្រហែល ១,៧ លាននាក់បានដើរជាក្បួនដោយសន្តិវិធីនៅក្នុងទីក្រុងនេះ ទោះបីជាការចលាចលកើនឡើង និងមានការព្រមានយ៉ាងខ្លាំងពីទីក្រុងប៉េកាំងក៏ដោយ។
កាលពីសប្ដាហ៍មុន ក្រុមអ្នកតវ៉ាប្រឆាំងបានចូលបិទព្រលានយន្តហោះរបស់ទីក្រុងនេះដែលធ្វើឲ្យខូចដល់កេរ្តិ៍ឈ្មោះរបស់យុទ្ធនាការមួយ ដែលមានបំណងធ្វើឡើងដោយសន្តិវិធី ដែលក្រុមបាតុករបានដាក់ស្លាកជាមួយនឹងពាក្យស្លោក «ចូរធ្វើជាទឹក» ដែលជាពាក្យបង្ហាញពីការធ្វើឡើងដោយសន្តិភាព។
ប្រទេសចិនដីគោកដែលគ្រប់គ្រងដោយគណបក្សកុម្មុយនីស្ដ ជាបន្តបន្ទាប់បានបញ្ចេញសំឡេងយ៉ាងខ្លាំងរបស់ខ្លួនឆ្ពោះទៅកាន់ក្រុមអ្នកប្រឆាំង ដោយថ្កោលទោសចំពោះសកម្មភាព «ប្រៀបដូចជាភេរវករ» របស់មនុស្សមួយភាគតូចដែលបង្កអំពើហិង្សា ខណៈដែលប្រព័ន្ធព័ត៌មានរដ្ឋបានផ្សព្វផ្សាយរូបភាពបុគ្គលិកយោធា និងរថយន្តដឹកបុគ្គលិកយោធាដែលមានសព្វាវុធនៅទីក្រុងហ្សិនចិន ដែលស្ថិតនៅទល់មុខទីក្រុងហុងកុងពាក់កណ្តាលស្វយ័តមួយនេះ។
កាលពីឆ្នាំ ១៩៨៩ ប្រទេសចិនបានពង្រាយរថក្រោះ ដើម្បីបញ្ចប់ការតវ៉ាប្រឆាំងដែលដឹកនាំដោយនិស្សិតនៅក្នុងការបង្ក្រាបដោយបង្ហូរឈាមមួយនៅទីលានធានអាមិនរបស់ទីក្រុងប៉េកាំងដែលបណ្ដាលឲ្យមានមនុស្សស្លាប់ប្រមាណនៅចន្លោះពីរាប់រយនាក់ដល់ជាង ១០០០ នាក់។
លោក ត្រាំ បានឲ្យដឹងដោយយោងទៅដល់ការចរចាពាណិជ្ជកម្មជាមួយប្រទេសចិនថា ប្រសិនបើស្ថានការណ៍បែបនោះត្រូវបានធ្វើឡើងម្ដងទៀតនៅទីក្រុងហុងកុង «ខ្ញុំគិតថានឹងមានអារម្មណ៍ផ្នែកនយោបាយដ៏ធំក្នុងការមិនធ្វើអ្វីសោះ»។
ស្ថិតក្រោមកិច្ចព្រមព្រៀងមួយដែលបានចុះហត្ថលេខាជាមួយចក្រភពអង់គ្លេស ប្រទេសចិនបានយល់ព្រមអនុញ្ញាតឲ្យទីក្រុងហុងកុង រក្សាសេរីភាពយូនីករបស់ខ្លួន នៅពេលអតីតដែនដីអាណានិគមមួយនេះត្រូវបានអង់គ្លេសប្រគល់ឲ្យចិនវិញកាលពីឆ្នាំ ១៩៩៧ ។
ប៉ុន្តែប្រជាជនទីក្រុងហុងកុងជាច្រើនគិតថា សេរីភាពទាំងនោះកំពុងត្រូវបានបំបែកចេញពីខ្លួន ជាពិសេសចាប់តាំងពីលោកប្រធានាធិបតី ស៊ី ជីនភីង ដែលប្រកាន់ជំហរតឹងរ៉ឹងបានឡើងកាន់អំណាច។
លោក ត្រាំ បានថ្លែងថា៖ «ខ្ញុំចង់ឃើញ វាដំណើរការតាមរបៀបមនុស្សធម៌» និងអំពាវនាវឲ្យលោក ស៊ី ត្រូវចរចាជាមួយនឹងក្រុមប្រឆាំងនេះ។
នៅក្នុងសន្និសីទកម្រមួយកាលពីសប្តាហ៍មុន ដើម្បីឆ្លើយតបទៅនឹងការបង្ក្រាបនេះ កាសែតរដ្ឋចិន The Global Times បានរាយការណ៍ថា «នឹងមិនមានការប្រព្រឹត្តច្រំដែល» ដូចទីលានធានអាមិនឡើយ។
កាសែតនេះបានសរសេរក្នុងបទវិចារណកថាមួយថា៖ «ប្រទេសចិនខ្លាំងជាងមុន និងចាស់ទុំជាងមុន ហើយលទ្ធភាពរបស់ខ្លួនក្នុងការគ្រប់គ្រងស្ថានភាពស្មុគស្មាញត្រូវបានពង្រឹងយ៉ាងខ្លាំង»។
ក្រុមអ្នកវិភាគនិយាយថា ការអន្តរាគមន៍ណាមួយក្នុងទីក្រុងហុងកុងដោយកងសន្តិសុខចិននឹងជាគ្រោះមហន្តរាយមួយសម្រាប់កេរ្តិ៍ឈ្មោះ និងសេដ្ឋកិច្ចចិន៕ LA
