ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ បានឲ្យដឹងកាលពីថ្ងៃពុធថា ការដកហូតពន្ធនាំចូលរបស់អាមេរិកលើទំនិញរបស់ចិន អាចនៅតែមានប្រសិទ្ធភាព «ក្នុងរយៈពេលវែង» ដែលការលើកឡើងនេះបានធ្វើឲ្យប៉ះពាល់ក្ដីសង្ឃឹមថា កិច្ចព្រមព្រៀងពាណិជ្ជកម្មថ្មីមួយនឹងនាំឲ្យមានការលុបចោលការដកហូតពន្ធនាំចូលទាំងនេះក្នុងពេលឆាប់ៗ។
ក្រុមមន្ដ្រីអាមេរិកបានឲ្យដឹងថា ពួកគេកំពុងស្ថិតក្នុងដំណាក់កាលចុងក្រោយនៃការចរចាលើការដោះស្រាយសង្គ្រាមពាណិជ្ជកម្មដែលមានរយៈពេល ៨ ខែជាមួយប្រទេស ចិន នេះ។
ទីក្រុងវ៉ាស៊ីនតោន និងទីក្រុងប៉េកាំង កំពុងតស៊ូបង្កើតកិច្ចព្រមព្រៀងចុងក្រោយមួយ ដោយមន្ដ្រីអាមេរិកទាមទារឲ្យមានការផ្លាស់ប្តូរយ៉ាងខ្លាំងចំពោះគោលនយោបាយឧស្សាហកម្មរបស់ចិន។
ខណៈដែលការអត្ថាធិប្បាយនៅពេលថ្មីៗថា ការចរចានេះកំពុងដំណើរការល្អប្រសើរ ដែលជំរុញឲ្យមានសុទិដ្ឋិនិយមនោះ លោក ត្រាំ ហាក់ដូចជាបំផ្លាញក្ដីសង្ឃឹមថា ទំនាក់ទំនងពាណិជ្ជកម្មរវាងប្រទេសមានសេដ្ឋកិច្ចឈានមុខគេទាំង ២ របស់ពិភពលោក នឹងត្រឡប់ទៅរកធម្មតាវិញ។
លោក ត្រាំ បាននិយាយអំពីពន្ធនាំចូលនេះថា៖ «យើងកំពុងនិយាយអំពីការទុកឲ្យពួកគេនូវពេលវេលាវែងមួយ»។ លោកបន្តថា៖ «យើងត្រូវតែធ្វើឲ្យប្រាកដថា បើយើងបង្កើតកិច្ចព្រមព្រៀងនេះជាមួយចិន ប្រទេស ចិន រស់បានដោយកិច្ចព្រមព្រៀងនេះ»។
ជាថ្មីម្ដងទៀតលោក ត្រាំ បានប្រាប់ក្រុមអ្នកយកព័ត៌មាននៅសេតវិមានថា ការចរចាជាមួយទីក្រុងប៉េកាំងនេះ «កំពុងដំណើរការល្អប្រសើរ»។
ប៉ុន្តែក្រុមមន្ដ្រីអាមេរិកបានបញ្ជាក់ថា កិច្ចព្រមព្រៀងណាមួយត្រូវតែមានអំណាច រួមទាំងសមត្ថភាពក្នុងការដកហូតពន្ធនាំចូលដោយឯកតោភាគី បើប្រទេស ចិន ចាប់ផ្ដើមប្រព្រឹត្តអំពើអាក្រក់ឡើងវិញលើការប្ដេជ្ញាចិត្តណាមួយចំពោះការបញ្ចប់ការអនុវត្តពាណិជ្ជកម្មមិនស្មើភាពដែលចោទប្រកាន់នេះ។
ក្រសួងពាណិជ្ជកម្មចិនបានឲ្យដឹងកាលពីថ្ងៃព្រហស្បតិ៍ថា លោក Robert Lighthizer អ្នកតំណាងពាណិជ្ជកម្មរបស់អាមេរិក និងលោក Steven Mnuchin រដ្ឋមន្ដ្រីក្រសួងហិរញ្ញវត្ថុ នឹងធ្វើដំណើរទស្សនកិច្ចទៅកាន់ប្រទេស ចិន នៅថ្ងៃទី ២៨ ដល់ថ្ងៃទី ២៩ ខែមីនាសម្រាប់កិច្ចចរចាជុំថ្មីមួយ សំដៅដោះស្រាយសង្គ្រាមពាណិជ្ជកម្មដែលកើតមានកាន់តែខ្លាំងឡើងនេះ។
លោក Gao Feng អ្នកនាំពាក្យក្រសួងពាណិជ្ជកម្មចិនបានឲ្យដឹងក្នុងសន្និសីទខ្លីមួយថា បន្ទាប់ពីដំណើរទស្សនកិច្ចនេះ លោក Liu He ឧបនាយករដ្ឋមន្ដ្រីចិន នឹងធ្វើដំណើរទៅអាមេរិកនៅខែមេសា ដើម្បីបន្តការចរចា។
ក្នុងរយៈពេល ៨ ខែចុងក្រោយនេះ អាមេរិក និងចិន បានហូតពន្ធនាំចូលលើពាណិជ្ជកម្មទំនិញទ្វេភាគីក្នុងតម្លៃជាង ៣៦០ ពាន់លានដុល្លារដែលដាក់ សម្ពាធលើវិស័យផលិតកម្មនៅក្នុងប្រទេសទាំងពីរនេះ៕ AFP/LA