ក្រុងវ៉ាស៊ីនតោនៈ លោក ដូណាល់ ត្រាំ បានឲ្យដឹងកាលពីថ្ងៃសុក្រតាមរយៈបណ្តាញសង្គម Twitter មុនពេលជំនួបអាហារពេលល្ងាចមួយជាមួយលោកអគ្គនាយក Tim Cook ថាក្រុមហ៊ុន Apple ដែលជាក្រុមហ៊ុនបច្ចេកវិទ្យាឈានមុខគេនឹងចំណាយ «ទឹកប្រាក់ក្នុងបរិមាណដ៏ច្រើន» នៅសហរដ្ឋអាមេរិក។
អ្នកទាំង ២ នេះបានជួបគ្នាក្រៅផ្លូវការជាច្រើនដងមកហើយដែលរួមទាំងនៅក្នុងទីក្រុង Bedminster រដ្ឋ New Jersey ជាកន្លែងដែលលោក ត្រាំ កំពុងស្ថិតក្នុងពេលឈប់សម្រាកពីការងារ និងកំពុងលេងវាយកូនគោល។ នេះបើតាមសេចក្តីរាយការណ៍។
លោកបានសរសេរនៅលើ Twitter នៅម៉ោងប្រហែល ៧ ល្ងាចម៉ោងនៅអាមេរិកថា៖ «កំពុងបរិភោគអាហារល្ងាចជាមួយលោក Tim Cook ប្រធានក្រុមហ៊ុន Apple ។ ពួកគេនឹងត្រូវចំណាយទឹកប្រាក់ក្នុងបរិមាណដ៏ច្រើននៅអាមេរិក។ អស្ចារ្យណាស់»។
ជំនួបនេះធ្វើឡើងបន្ទាប់ពីមានសេចក្ដីប្រកាសកាលពីថ្ងៃព្រហស្បតិ៍អំពីក្រុមហ៊ុន Apple ថា ក្រុមហ៊ុននេះបានវិនិយោគប្រហែល ៦០ ពាន់លានដុល្លារនៅអាមេរិក ហើយបច្ចុប្បន្នផ្ដល់ការងារប្រហែល ៩០ ០០០ នាក់នៅក្នុងប្រទេសនេះ។
ផលិតផលរបស់ក្រុមហ៊ុនបច្ចេកវិទ្យាឈានមុខគេរបស់ពិភពលោកមួយនេះភាគច្រើនត្រូវដំឡើងនៅក្នុងប្រទេសចិន ហើយក្រុមហ៊ុននេះជំទាស់នឹងការដកហូតពន្ធនាំចូលដែលនឹងធ្វើឡើងនៅពេលខាងមុខពោលគឺជាបញ្ហាមួយដែលលោក ត្រាំ មិនអាចបញ្ឈប់ការគិតបានដែលអត្រានឹងត្រូវដកហូតនេះមានចំនួន ១០ ភាគរយលើទំនិញដែលផលិតនៅក្នុងប្រទេសចិនដែលគ្រោងនឹងចាប់ផ្ដើមអនុវត្តនៅថ្ងៃទី ១ ខែកញ្ញា។
លោកប្រធានាធិបតី ត្រាំ បានច្រានចោលការអំពាវនាវរបស់ក្រុមហ៊ុន Apple ឲ្យមានការលើកលែងលើផលិតផលរបស់ខ្លួនដោយលោកបានសរសេរនៅលើ Twitter កាលពីខែកក្កដាថាក្រុមហ៊ុននេះគួរតែ «ផលិតផលិតផលទាំងនោះនៅអាមេរិក។ គ្មានការដកហូតពន្ធនាំចូលទេ!»។
ប៉ុន្តែរដ្ឋបាលរបស់លោកបានប្រកាសកាលពីថ្ងៃព្រហស្បតិ៍សប្តាហ៍មុនថា ពន្ធនាំចូលលើទំនិញមួយចំនួននឹងត្រូវពន្យារពេលរហូតដល់ខែធ្នូចុងឆ្នាំនេះ។
ក្រុមហ៊ុន Apple មិនបានឆ្លើយតបភា្លមៗទៅនឹងសំណើសុំការអត្ថាធិប្បាយអំពីបញ្ហានេះទេ ហើយលោក ត្រាំ មិនបានសរសេរ Twitter ជាថ្មីអំពីជំនួបនេះ ឬអ្វីដែលត្រូវបានពិភាក្សានោះដែរ៕ LA