ភ្នំពេញៈ ក្រុមហ៊ុនដឹកជញ្ជូនតាមផ្លូវដែក ថូល រ៉ូយ៉ាល់ បានចាប់ផ្តើមដំណើរការសេវាដឹកជញ្ជូនអង្ករពីភ្នំពេញទៅកំពង់ផែខេត្ត ព្រះសីហនុជាលើកដំបូង។
ការដឹកជញ្ជូនលើកដំបូងបានចាប់ផ្តើមកាលពីសប្តាហ៍មុន ដោយដឹកអង្ករសរុប ២ ៤០០ តោន។
នេះជាការចាប់ផ្តើមដឹកទំនិញពីភ្នំពេញទៅកំពង់ផែអន្តរជាតិជាលើកដំបូងរបស់ក្រុមហ៊ុន ចាប់តាំងពីក្រុមហ៊ុននេះបានដំណើរការជាផ្លូវការកាលពីចុងឆ្នាំ ២០១០ មក ដោយសារកាលពីមុនទំនិញភាគច្រើនដែលក្រុមហ៊ុនដឹកជញ្ជូនជាប្រភេទទំនិញនាំចូល ឬ ទំនិញដែលដឹកពីខេត្តចូលភ្នំពេញ។
លោក David Kerr អគ្គនាយកប្រតិបត្តិក្រុមហ៊ុន ថូល រ៉ូយ៉ាល់ បានឲ្យដឹងថា ការចាប់ផ្តើមក្នុងការដឹកជញ្ជូនអង្ករនាពេលនេះគឺជាផ្នែកមួយ យ៉ាងសំខាន់ដែលក្រុមហ៊ុនលោកនឹងរួមចំណែកក្នុងការបង្កើនផលិតភាព នាំចេញតាមរយៈការផ្តល់សេវាដឹកជញ្ជូនដែលមានភាពងាយស្រួលជាងមុន។
លោកបន្តថា៖ «នេះជាសកម្មភាពថ្មីមួយទៀតរបស់ក្រុមហ៊ុន ថូល ដែលបានដឹកជញ្ជូនអង្ករតាមរយៈរថភ្លើង។ នៅពេលឆាប់ៗបន្ទាប់ពីមន្រ្តីគយ និងកាំកុងត្រូល មានការិយាល័យនៅទីនេះ ដំណើរការបែបបទនាំចេញផ្សេងៗនឹង ត្រូវសម្រួលឲ្យកាន់តែល្អ ដូច្នេះយើងនឹងអាចទាក់ទាញក្រុមហ៊ុននាំចេញផលិតផលកាត់ដេរតាមរថភ្លើងផងដែរ»។
ជំហានដំបូងក្រុមហ៊ុនបានដឹកជញ្ជូនអង្ករពីរដងក្នុងមួយសប្តាហ៍។ លោក David Kerr បានឲ្យដឹងថា ក្រុមហ៊ុននឹងដឹកជញ្ជូនអង្ករសរុបឲ្យបាន ២០០ កុងតឺន័រ ដោយគិតចាប់ពីសប្តាហ៍មុនរហូតដល់ចុងសប្តាហ៍នេះ។ ក្នុងមួយកុងតឺន័រ អាចផ្ទុកអង្ករបាន ២៤ តោន។
កន្លងមកក្រុមហ៊ុនបានដឹកជញ្ជូនតែទំនិញពីខេត្តចូលរាជធានីប៉ុណ្ណោះ។ នៅចុងឆ្នាំ ២០០៩ ក្រុមហ៊ុនបានផ្តើមដឹកជញ្ជូនស៊ីម៉ងត៍ប្រមាណ ៩ ០០០ តោនក្នុងមួយខែពីស្រុក ទូកមាស ខេត្ត កំពត មកភ្នំពេញ ហើយចាប់ពីដើមឆ្នាំ ២០១៣ ក្រុមហ៊ុនក៏ចាប់ផ្តើមដឹកប្រេងឥន្ធនៈ ១,២ លានលីត្ររៀងរាល់ពីរថ្ងៃម្តងពីខេត្ត ព្រះសីហនុ មក ភ្នំពេញ។ ក្រុមហ៊ុនក៏បានដឹកជញ្ជូនធ្យូងថ្ម ៩០០ តោនរៀងរាល់ពីរថ្ងៃម្តងពីខេត្ត ព្រះសីហនុ ទៅ ស្រុក ទូកមាសខេត្ត កំពត។
លោក គឹម សាវុធ អគ្គនាយកក្រុមហ៊ុននាំចេញអង្ករធំមួយដែលមានរោងចក្រនៅភ្នំពេញ ដែលមិនទាន់បានដឹកជញ្ជូនអង្ករតាមរយៈក្រុមហ៊ុន ថូល នោះបានបង្ហាញពីចំណាប់អារម្មណ៍ក្នុងការដឹកជញ្ជូនតាមផ្លូវដែក។
ប៉ុន្តែលោកបញ្ជាក់ថា ដំណើរការក្នុងការដឹកជញ្ជូនតាមរថភ្លើងនាពេលនេះមានភាពស្មុគស្មាញជាច្រើននិងមានតម្លៃខ្ពស់ផងដែរ។ លោកបន្តថា មូលហេតុដោយសារការតម្រូវឲ្យមានស្កេន អង្ករនាំចេញនៅកំពង់ផែមុនពេលនាំចេញ ដែលកត្តានេះធ្វើឲ្យចំណេញពេលក្នុងការផ្ទេរទំនិញជាច្រើនដង។
លោកបញ្ជាក់ថា៖ «វាមានការស្មុគស្មាញបន្តិច ហើយវាធ្វើឲ្យតម្លៃដឹកជញ្ជូនកាន់តែខ្ពស់។ ប្រសិនបើពួកគេមានឧបករណ៍ស្កេននៅផែស្ងួតហើយធ្វើការត្រួតពិនិត្យនៅទីនោះវានឹងកាត់បន្ថយដំណើរការដ៏ស្មុគស្មាញនេះហើយចុងក្រោយទៅវាចំណេញពេល និងអាចចំណាយទាបជាង»។
លោកពន្យល់ថា ដំបូងគេត្រូវជញ្ជូនអង្ករដាក់រថយន្តដឹកទំនិញ បន្ទាប់មកត្រូវដឹក ពីរោងចក្រទៅដល់ផែស្ងួត។ នៅពេលទៅដល់ផែស្ងួតត្រូវផ្ទេរអង្ករពីរថយន្តដឹកទំនិញទៅដាក់ក្នុងកុងតឺន័ររថភ្លើង។ នៅពេលរថភ្លើងទៅដល់កំពង់ផែព្រះសីហនុ ត្រូវផ្ទេរអង្ករពីទូរថភ្លើងទៅដាក់លើរថយន្តដឹកទំនិញម្ដងទៀតដើម្បីចូលម៉ាស៊ីនស្កេន មុននឹងនាំចេញ៕ PB
