ភ្នំពេញៈ រដ្ឋមន្ត្រីក្រសួងថាមពលថៃ លោក Sontirat Sontijirawong បានឲ្យដឹងថា លោកនឹងជួបពិភាក្សាជាមួយកម្ពុជានៅថ្ងៃនេះ ទាក់ទងនឹងការអភិវឌ្ឍន៍គម្រោងថាមពលរួមគ្នានៅតំបន់ដែលអះអាងថាត្រួតស៊ីគ្នានៅព្រំដែនសមុទ្រ ដើម្បីផលប្រយោជន៍រួម។ នេះបើតាមសេចក្តីរាយកាណ៍របស់កាសែត The Nation ថៃ។
ការលើកឡើងនេះ ខណៈកិច្ចប្រជុំរដ្ឋមន្ត្រីអាស៊ានស្តីពីថាមពលលើកទី ៣៧ នៅទីក្រុងបាងកក បាននិងកំពុងប្រព្រឹត្តទៅពីថ្ងៃទី ២ ដល់ថ្ងៃទី ៦ ខែកញ្ញា។
យោងតាមសេចក្តីរាយការណ៍ ប្រធានបទសំខាន់ក្នុងជំនួបនេះគឺតម្រូវការថាមពលអគ្គិសនីរបស់ប្រទេសកម្ពុជាសម្រាប់កំណើនសេដ្ឋកិច្ចនៅពេលអនាគត។ ប្រទេសទាំង ២ នឹងជជែកអំពីការផលិត និងពាណិជ្ជកម្មអគ្គិសនីសម្រាប់ប្រទេសកម្ពុជា។
លោក Sontirat បានប្រាប់កាសែត The Nation ថា ប្រទេសថៃបានត្រៀមខ្លួនរួចរាល់ក្នុងការវិនិយោគគម្រោងថាមពល បើប្រទេសកម្ពុជាដើរតាមគម្រោងរបស់ខ្លួនក្នុងការសាងសង់រោងចក្រច្រើនថែមទៀត។
លោកថ្លែងថា៖ «ក្នុងជំនួបនេះ យើងនឹងពិភាក្សាពីកិច្ចសហការថាមពលរវាងប្រទេសទាំង ២ មិនមែនសេចក្តីសម្រេចចុងក្រោយទេ។ កិច្ចសហប្រតិបត្តិការថាមពលនេះគឺជាផ្នែកមួយនៃដំណោះស្រាយពីបញ្ហាដែលបានកើតឡើងរង្វង់ ២០ ទៅ ៣០ ឆ្នាំមកហើយ»។
បើតាមកាសែត The Nation កម្ពុជាចាប់អារម្មណ៍ទិញអគ្គិសនីពីប្រទេសថៃ និងវិនិយោគរួមគ្នាគម្រោងសាងសង់រោងចក្រថាមពលផលិតអគ្គិសនីពីធ្យូងថ្មនៅកោះកុងនៅក្បែរព្រំដែនថៃ។
ប្រទេសជាសមាជិកអាស៊ានមានគោលបំណងផលិតថាមពលអគ្គិសនី ២៣ ភាគរយក្នុងរយៈពេល ៦ ឆ្នាំ ខណៈប្រទេសថៃមានបំណងផលិតរហូតដល់ ៣០ ភាគរយ។ ប្រទេសថៃសង្ឃឹមថានឹងក្លាយជាអ្នកនាំមុខគេក្នុងការផលិតថាមពលនៅក្នុងតំបន់ ជាពិសេសការទាញថាមពលពីប្រភពធម្មជាតិ។
សេចក្តីរាយការណ៍មិនបានបញ្ជាក់ពីគម្រោងអភិវឌ្ឍន៍នៃប្រភពថាមពលជាមួយកម្ពុជានេះ ប៉ុន្តែបើតាមការលើកឡើងរបស់លោក Sontirat Sontijirawong ទំនងជាសំដៅដល់ការដោះស្រាយបញ្ហាតំបន់ប្រេងក្នុងសមុទ្ររវាងប្រទេសទាំង ២ ដែលមិនទាន់បានឯកភាពគ្នាជាយូរមកហើយ។
មិនអាចទាក់ទងមន្ត្រីក្រសួងរ៉ែ និងថាមពលកម្ពុជាបានទេកាលពីថ្ងៃម្សិលមិញ។
បច្ចុប្បន្នកម្ពុជានៅមិនទាន់អាចផលិតថាមពលអគ្គិសនីគ្រប់គ្រាន់ដោយខ្លួនឯងទេ ដែលធ្វើឲ្យប្រទេសពឹងមួយផ្នែកលើការនាំចូលអគ្គិសនីពីប្រទេសជិតខាង៕