ភ្នំពេញៈ ប្រទេសថៃបានប្រកាសពីផែនការដំណើរការសេវារថយន្តក្រុងតភា្ជប់ទីក្រុងបាងកកទៅកាន់ខេត្តស៊ីសាកេត និងខេត្តសៀមរាប ខណៈការសាងសង់ផ្លូវតភ្ជាប់ពីខេត្តស៊ីសាកេតទៅកាន់ខេត្តសៀមរាបត្រូវបានគេរំពឹងថានឹងបញ្ចប់នៅចុងឆ្នាំ២០១៥។
លោក Arkhom Termpittayapisit ប្រាប់កាសែតបាងកកប៉ុស្ដិ៍កាលពីថ្ងៃចន្ទថា ផ្លូវប្រវែង៧,៥គីឡូម៉ែត្រចេញពីស្រុក Phusing ខេត្តស៊ីសាកេត តភ្ជាប់មកកាន់ខេត្តសៀមរាបគឺដើម្បីលើកកម្ពស់វិស័យទេសចរណ៍រវាងប្រទេសទាំងពីរនៅពេលធ្វើសមាហរណកម្មអាស៊ាននៅចុងឆ្នាំនេះ។
លោកលើកឡើងថា ក្រសួងដឹកជញ្ជូនថៃគ្រោងនឹងបើកដំណើរការសេវារថយន្តក្រុងនៅលើផ្លូវបាងកក-ស៊ីសាកេត-សៀមរាបដើម្បីជួយសម្រួលដល់ការទស្សនារបស់ប្រជាជនរវាងប្រទេសទាំងពីរនេះ។
ការសាងសង់ផ្លូវបានចាប់ផ្ដើមតាំងពីថ្ងៃទី១០ ខែមិថុនា ឆ្នាំមុន ត្រូវបានគេរំពឹងថានឹងបញ្ចប់នៅខែវិច្ឆិកានៅឆ្នាំនេះ។
លោក ឆឺយ ឆន អនុប្រធានមន្ទីរទេសចរណ៍ខេត្តសៀមរាបបានឲ្យដឹងកាលពីម្សិលមិញថាផ្លូវនេះភ្ជាប់ខេត្តស៊ីសាកេតទៅកាន់ខេត្តឧត្តរមានជ័យបន្ទាប់មកទៅកាន់ខេត្តសៀមរាបតាមច្រកអន្តរជាតិជាំសាង៉ាំឬច្រកអូរស្មាច់ខេត្តឧត្តរមានជ័យ។
លោកបានថ្លែងថា បន្ទាប់ពីភ្ជាប់ផ្លូវនេះ វានឹងក្លាយជាច្រកទ្វារផ្សេងទៀតសម្រាប់ការធ្វើដំណើររបស់ភ្ញៀវទេសចរអន្តរជាតិមកពីប្រទេសថៃទៅខេត្តសៀមរាប នឹងការឆ្ពោះទៅកាន់ច្រកត្រួតពិនិត្យអន្តរជាតិប៉ោយប៉ែត។
លោកលើកឡើងថា៖ «ជាធម្មតាមានតែភ្ញៀវទេសចរថៃប៉ុណ្ណោះចូលមកតាមច្រកព្រំដែនពីរទៅកាន់កាស៊ីណូនៅខេត្តឧត្តរមានជ័យ។ ពេលមានផ្លូវនិងខ្សែរថយន្តក្រុង យើងនឹងមើលឃើញភ្ញៀវទេសចរបរទេសកាន់តែច្រើនចូលមកតាមច្រកព្រំដែននេះមកពីខេត្តស៊ីសាកេតទៅខេត្តសៀមរាប»។
ច្រកជាំសាង៉ាំដែលឆ្លងកាត់ព្រំដែនឆ្ពោះទៅប្រាសាទអង្គរវត្តកាត់តាមផ្លូវជាតិលេខ៦៧មានចម្ងាយប្រហែល១៣៥គីឡូម៉ែត្រ។
លោក អាង គឹមអៀង ប្រធានសមាគមភ្នាក់ងារទេសចរណ៍កម្ពុជាបានថ្លែងថា ផ្លូវកាន់តែល្អ និងខ្សែរថយន្តកាន់តែច្រើនមានន័យថាជាការផ្លាស់ប្តូរទេសចរណ៍ និងការជួញដូរកាន់តែល្អប្រសើររវាងប្រទេសទាំងពីរ។ លោកបន្ថែមថា៖ «វានឹងជួយសម្រួលដល់ការមកដល់របស់ប្រជាជន និងទំនិញរវាងប្រទេសថៃ និងកម្ពុជា»។
ប៉ុន្តែលោកបានថ្លែងថា តាមរយៈការពង្រីកខ្សែបណ្ដាញទេសចរណ៍របស់ខ្លួនមកកាន់ប្រទេសកម្ពុជា ប្រទេសថៃសំដៅលើកកម្ពស់ទិសដៅទេសចរណ៍នៅក្នុងខេត្តភាគឦសានរបស់ពួកគេជាមួយនឹងអាទិភាពប្រាសាទបុរាណរបស់គេដែលមានចម្ងាយ ១០០ គីឡូម៉ែត្រតែប៉ុណ្ណោះពីខេត្តសៀមរាប។
លោកបន្ថែមថា៖ «យុទ្ធសាស្ដ្ររបស់ពួកគេនឹងតភ្ជាប់ទីតាំងប្រាសាទបុរាណរបស់ពួកគេនៅក្នុងខេត្តភាគខាងឦសានរបស់ប្រទេសថៃមកកាន់ទីតាំងប្រាសាទនៅក្នុងខេត្តសៀមរាប។
ធ្វើដូចនេះពួកគេអាចធ្វើដំណើររយៈពេលតែមួយថ្ងៃប៉ុណ្ណោះជុំវិញប្រាសាទបុរាណរបស់យើង ហើយជាលទ្ធផលនឹងរក្សាភ្ញៀវទេសចរស្នាក់នៅកាន់តែយូរនៅក្នុងប្រទេសថៃ និងកាន់តែមានរយៈពេលខ្លីនៅក្នុងប្រទេសកម្ពុជា»។
បច្ចុប្បន្នក្រុមហ៊ុន Trans-port Co Ltd គ្រប់គ្រងដោយប្រទេសថៃនឹងប្រតិបត្តិការសេវារថយន្តក្រុងពីរដងប្រចាំថ្ងៃមកកាន់ខេត្តសៀមរាបនិងប្រចាំថ្ងៃមកកាន់ទីក្រុងភ្នំពេញដែលដំណើរការកាត់តាមក្រុង Aranyaprathet ខេត្តស្រះកែវ និងក្រុងប៉ោយប៉ែតខេត្តបន្ទាយមានជ័យរបស់កម្ពុជា៕PB
