.jpg)
ទិដ្ឋភាពនៅព្រលានយន្តហោះ ដនមឿង។ រូបថត AFP
ក្រុងបាងកកៈ រដ្ឋាភិបាល ថៃ បានប្តេជ្ញាចិត្តវិនិយោគទឹកប្រាក់ ១១១,៩ ពាន់លានបាត (ប្រហែល ៣,៥៩ ពាន់លានដុល្លារ) ក្នុងគម្រោងសាងសង់ ប្រតិបត្តិការ និងផ្ទេរ (BOT) មួយ ដើម្បីភ្ជាប់ផ្លូវដែករថភ្លើងល្បឿនលឿនទៅព្រលានយន្តហោះដនមឿង សុវណ្ណភូមិ និងយូតាប៉ាវ ដើម្បីបម្រើគម្រោងច្រករបៀងសេដ្ឋកិច្ចភាគខាងកើតរបស់រដ្ឋាភិបាល។
លោក Nathporn Chatusripitak អ្នកនាំពាក្យរបស់លោកឧបនាយករដ្ឋមន្ត្រី Nathporn Chatusripitak បានថ្លែងថា ផ្លូវដែករថភ្លើងល្បឿនលឿនថ្មីនេះ នឹងត្រូវសាងសង់ស្ថិតក្រោមគម្រោងភាពជាដៃគូរដ្ឋ-ឯកជន ដោយរដ្ឋាភិបាលនឹងចំណាយ ៣,៥៧ ពាន់លានបាតដំបូងសម្រាប់ដោះស្រាយបញ្ហាដីធ្លី ហើយទឹកប្រាក់នៅសល់ចំនួន ១០៨,៣៣ ពាន់លានបាត នឹងត្រូវចំណាយក្នុងរយៈពេល ១០ ឆ្នាំបន្ទាប់ពីរថភ្លើងចាប់ផ្តើមប្រតិបត្តិការ។
គម្រោង BOT នេះ មានតម្លៃ ២២៤,៥៤ ពាន់លានបាត និងមានរយៈពេលសម្បទាន ៥០ ឆ្នាំ។
លោក Nathporn ដៃគូឯកជននឹងត្រូវប្រគល់ភារកិច្ចឲ្យវិនិយោគក្នុងការងារស៊ីវិល ប្រព័ន្ធផ្តល់សញ្ញា រថភ្លើង ការអភិវឌ្ឍអចលនទ្រព្យ និងការថែទាំ។
គណៈរដ្ឋមន្ត្រីថៃ កាលពីថ្ងៃអង្គារសប្តាហ៍មុន បានអនុម័តលើគម្រោងផ្លូវដែករថភ្លើងល្បឿនលឿនដែលតភ្ជាប់ទៅកាន់ព្រលានយន្តហោះធំទាំង ៣ នេះ និងអនុម័តទឹកប្រាក់ ៣,៥ ពាន់លានបាត ដើម្បីផ្តល់សំណងដល់ដីធ្លីដែលរងផលប៉ះពាល់ដោយសារគម្រោងនេះ៕ Bangkok Post/KC
