The Phnom Penh Post Search

Search form

Logo of Phnom Penh Post newspaper Phnom Penh Post - ថៃ ​បាន​លុប​ចោល​កូតា​ជើង​ហោះហើរ​ជាមួយ​កម្ពុជា




ថៃ ​បាន​លុប​ចោល​កូតា​ជើង​ហោះហើរ​ជាមួយ​កម្ពុជា

Content image - Phnom Penh Post
បុគ្គលិកបញ្ជារយន្តហោះ​ចូល​ទីតាំង នៅ​ឯ​ព្រលាន​យន្ត​អន្តរជាតិ​ភ្នំពេញ​នា​ពេល​កន្លង​មក។ ម៉ៃ វីរៈ

ថៃ ​បាន​លុប​ចោល​កូតា​ជើង​ហោះហើរ​ជាមួយ​កម្ពុជា

ភ្នំពេញៈ ​ថៃ​បាន​​លុប​ចោល​កូតា​​ជើង​ហោះហើរ​ពាណិជ្ជកម្ម​​មក​​កម្ពុជា​បន្ទាប់ពី​រដ្ឋាភិបាល​​​បាន​យល់​ព្រម​​លុបចោល​ការ​រឹតបន្តឹង​ឲ្យ​ស្រប​ជាមួយ​​​នឹង​​កិច្ចព្រមព្រៀង​អាកាសចរណ៍​រវាង​​ប្រទេស​ទាំង​ពីរ​ដែល​​​​​បាន​ចុះ​ហត្ថលេខា​​កាលពី​ខែ​ឧសភា​។

លោក វណ្ណ ចន្ធី នាយក​​ផ្នែក​​ដឹក​ជញ្ជូន​ផ្លូវ​អាកាស​នៅ​រដ្ឋលេខាធិការ​អាកាសចរណ៍​ស៊ីវិល ​(SSCA) បាន​ឲ្យ​ដឹង​កាលពី​ម្សិលមិញ​ថា​៖ «​​ប្រទេស​​យើង​ទាំង​ពីរ​​បាន​យល់​ព្រម​​លុប​​ចោល​កូតា​លើ​ជើង​ហោះហើរ​ហើយ​ក្រុមហ៊ុន​អាកាសចរណ៍​របស់​យើង​អាច​ហោះហើរ​ដោយ​គ្មាន​ការ​កំណត់»​។

លើក​មុន​ប្រទេស​ទាំង​ពីរ​​បាន​​កំណត់​ចរាចរណ៍​ផ្លូវ​អាកាស​ និង​​កំណើន​ទេសចរ​តាមរយៈ​ការ​ដាក់​កូតា​​លើ​ចំនួន​ជើង​​ហោះហើរ​សរុប​ និង​ចំនួន​កៅអី​លើ​ជើង​ហោះហើរ​ដឹក​អ្នក​ដំណើរ​ពាណិជ្ជកម្ម​រវាង​ប្រទេស​ទាំង​ពីរ​។

លោក ចន្ធី ឲ្យ​ដឹង​ថា​ប្រទេស​កម្ពុជា​​បាន​​លុប​ចោល​កូតា​​ចំនួន​​​កៅអី​ ៥៣០០ ​កន្លែង​​ក្នុង​មួយ​សប្ដាហ៍​​​កាល​ពី​ដើម​ឆ្នាំ​នេះ​ប៉ុន្តែ​ត្រូវ​តែ​រង់ចាំ​​ប្រទេស​ថៃ​​ឆ្លើយតប​សិន​​។ ​មន្ដ្រី​អាកាសចរណ៍​ថៃ​បាន​យល់​ព្រម​​ជា​គោលការណ៍​​ក្នុង​​អំឡុង​​កិច្ចប្រជុំ​មួយ​ជាមួយ​សមភាគី​កម្ពុជា​​របស់​ខ្លួន​​កាលពី​ថ្ងៃ​ទី​ ១៨​ ខែ​​ឧសភា​។

គណៈរដ្ឋមន្ដ្រី​ថៃ​បាន​ចុះហត្ថលេខា​លើ​​សេចក្ដី​សម្រេច​នេះ​​​កាលពី​ថ្ងៃ​អង្គារ។ នេះ​បើ​​តាម​​​កាសែត​បាងកក​ប៉ុស្ដិ៍​។

លោក ​ចន្ធី ​បន្ត​ថា​៖ «​ការ​ប្រកាស​​ដោយ​ភាគី​ថៃ​ក្នុង​បំណង​​ជូន​ដំណឹង​ដល់​ក្រុមហ៊ុន​អាកាសចរណ៍​​របស់​ខ្លួន​​ដើម្បី​លើក​​​កម្ពស់​​ជើង​ហោះហើរ​កាន់តែ​ច្រើន​​មក​កម្ពុជា​»​។​​ លោក​​​បន្ថែម​ថា​ការ​បង្កើន​ជើង​ហោះហើរ​ទ្វេភាគី​ និង​ការ​លុប​ចោល​​កូតា​​កៅអី​មាន​គោលបំណង​​​លើក​កម្ពស់​ទេសចរណ៍ ​និង​ការ​វិនិយោគ​ និង​ការ​ធានា​ការ​ប្រកួត​​ប្រជែង​ដោយ​ស្នើភាព​នៅ​ក្នុង​ទីផ្សារ​នេះ​។

ក្នុង​អំឡុង​កិច្ចប្រជុំ​​កាលពី​ខែ​ឧសភា​ប្រទេស​ទាំង​ពីរ​​ក៏​បាន​យល់ព្រម​​អនុញ្ញាត​ឲ្យ​ក្រុមហ៊ុន​អាកាសចរណ៍​​មកពី​ភាគី​នីមួយៗ​​អាច​ប្រើ​ព្រលាន​​យន្តហោះ​​ក្នុង​ប្រទេស​ទាំង​ពីរ​ជា​កន្លែង​​សំចត​​មុន​ពេល​បន្ត​ទៅ​កាន់​​ទិសដៅ​បន្ត​ទៀត​បាន។

លោក​បញ្ជាក់​​ថា​៖ «​យើង​បាន​ជ្រើសរើស​​ប្រទេស​​កូរ៉េ​ខាង​ត្បូង​ជា​ទិសដៅ​មួយ​ក្នុង​ចំណោម​​ទិសដៅ​ពីរ​របស់​​យើង​ប៉ុន្តែ​យើង​​មិន​បាន​សម្រេច​ចិត្ត​​ថា​ក្រុមហ៊ុន​អាកាសចរណ៍​មួយ​ណា​ [នឹង​ហោះហើរ​លើ​ផ្លូវ​នេះ]​ ឬ​ទិសដៅ​ផ្សេង​ទៀត​នោះ​ទេ​​​»​។

នៅ​ខាង​​ប្រទេស​​ថៃ​​មិន​ទាន់​បាន​​ប្រកាស​​ទិសដៅ​ណា​មួយ​នៅ​ឡើយ​ទេ៕ ​LA

អត្ថបទគួរចាប់អារម្មណ៍