.jpg)
ក្រុងបាងកកៈ ធនាគារកណ្តាលថៃ បានផ្តួចផ្តើមឲ្យមានការផ្ទេរប្រាក់ឆ្លងកាត់ព្រំដែនជាមួយប្រទេស កម្ពុជា ឡាវ មីយ៉ាន់ម៉ា និង វៀតណាម (CLMV) តាមរយៈការស្កេនកូដ QR ដើម្បីជួយសម្រួលដល់ការធ្វើសមាហរណកម្មឲ្យកាន់តែស៊ីជម្រៅក្នុងតំបន់មួយនេះ។ នេះបើយោងតាមការសេចក្តីរាយការណ៍របស់កាសែតបាងកកប៉ុស្តិ៍។
លោក Apisak Tantivorawong រដ្ឋមន្ដ្រីក្រសួងហិរញ្ញវត្ថុថៃបានថ្លែងយ៉ាងដូច្នេះបន្ទាប់ពីកិច្ចប្រជុំមួយស្តីពីការភ្ជាប់ទីផ្សារមូលធនថៃជាមួយទីផ្សារផ្សេងទៀតនៅក្នុងតំបន់។
កាសែតបាងកកប៉ុស្តិ៍ បានរាយការណ៍ដោយដកស្រង់សំដីរបស់ លោក Apisak ខណៈលោកថ្លែងថា សេវាផ្ទេរប្រាក់នេះនឹងជួយកាត់បន្ថយការចំណាយលើថ្លៃផ្ទេរប្រាក់ក្នុងតំបន់ជាពិសេសពលករចំណាកស្រុករបស់ប្រទេស CLMV ដែលកំពុងធ្វើការក្នុងប្រទេសថៃ ដែលបច្ចុប្បន្ននេះមានកម្រៃសេវាផ្ទេរប្រាក់ ១០ ភាគរយនៃចំនួនទឹកប្រាក់ដែលត្រូវផ្ញើរ។
បច្ចុប្បន្ននេះ ធនាគារកណ្តាលកម្ពុជា និងធនាគារកណ្តាលថៃកំពុងធ្វើការងាររួមគ្នាដើម្បីដាក់ចេញប្រព័ន្ធទូទាត់កូដ QR ក្នុងឆ្នាំ ២០១៩។
លោក Apisak បានបញ្ជាក់ថា ធនាគារកណ្តាលថៃក៏បានស្នើឲ្យប្រើប្រាស់រូបិយប័ណ្ណក្នុងស្រុកផងដែរសម្រាប់ការទូទាត់ពាណិជ្ជកម្មរវាងប្រទេសថៃនិងប្រទេស CLMV ដើម្បីកាត់បន្ថយការចំណាយរបស់ក្រុមហ៊ុននិងកាត់បន្ថយហានិភ័យពីបម្រែបម្រួលរូបិយប័ណ្ណបរទេស។
ពាណិជ្ជកម្មក្នុងតំបន់ បច្ចុប្បន្ននេះប្រើប្រាស់ប្រាក់ដុល្លារអាមេរិកសម្រាប់ការទូទាត់ ហើយការណ៍នេះបានបន្ថែមការចំណាយសម្រាប់ប្រតិបត្តិករដោយសារការដោះដូររូបិយប័ណ្ណ។
បើយោតាមកាសែតមួយនេះ ធនាគារកណ្តាលថៃបានសម្រេចចុះកិច្ចព្រមព្រៀងជាមួយធនាគារកណ្តាល ម៉ាឡេស៊ី សម្រាប់ការទូទាត់រូបិយប័ណ្ណក្នុងស្រុកដោយផ្ទាល់រវាងប្រាក់បាតនិងប្រាក់រីងហ្គីដរបស់ម៉ាឡេស៊ីអស់រយៈពេលជាច្រើនឆ្នាំមកហើយ។ កិច្ចព្រមព្រៀងនេះជាកិច្ចព្រមព្រៀងប្តូរ រូបិយប័ណ្ណទ្វេភាគីលើកដំបូងក្នុងប្លុកអាស៊ានដែលមានសមាជិកចំនួន ១០ ប្រទេស៕ NS
