The Phnom Penh Post Search

Search form

Logo of Phnom Penh Post newspaper Phnom Penh Post - ទស្សនៈ​ចំពោះ​ការ​ធ្លាក់ចុះ​ថ្លៃ​ប្រេង​យឺត​នៅ​កម្ពុជា

ទស្សនៈ​ចំពោះ​ការ​ធ្លាក់ចុះ​ថ្លៃ​ប្រេង​យឺត​នៅ​កម្ពុជា

លោក ប៊ិន មណីមាលា អនុប្រធាន​ផ្នែក​គ្រប់គ្រង​នៃ​កិច្ចការ​អាជីវកម្ម PTT (Cambodia)។
លោក ប៊ិន មណីមាលា អនុប្រធាន​ផ្នែក​គ្រប់គ្រង​នៃ​កិច្ចការ​អាជីវកម្ម PTT (Cambodia)។ សហការី

ទស្សនៈ​ចំពោះ​ការ​ធ្លាក់ចុះ​ថ្លៃ​ប្រេង​យឺត​នៅ​កម្ពុជា

ភ្នំពេញៈ តម្លៃ​ប្រេង​ពិភពលោក​បាន​នៅ​បន្ត​ធ្លាក់​ចុះ​ជិត​៧​ខែ​មក​ហើយ​ចាប់​តាំងពី​ខែ​មិថុនា ឆ្នាំ​២០១៤ ធ្លាក់​ចុះ​មក​នៅ​ក្រោម​៥០​ដុល្លារ​ក្នុង​មួយ​បារ៉ែល​។

តម្លៃ​ប្រេង​ដែល​ធ្លាក់​ចុះ​យ៉ាង​គំហុក​គិត​ចាប់​តាំងពី​ឆ្នាំ​២០០៩​នេះ​មិន​បាន​ធ្វើឲ្យ​តម្លៃ​ប្រេង​នៅ​កម្ពុជា​ដែល​តែងតែ​ឡើង​លឿន​ទៅ​តាម​ទីផ្សារ​ពិភពលោក​នោះ​ប្រែប្រួល​ធំ​ដុំ​នោះ​ទេ​។ អ្នកខ្លះ​អះអាង​ថា ស្ថានីយ​លក់​ប្រេងសាំង​ក្នុង​ស្រុក​ឃុបឃិត​គ្នា​ដើម្បី​ទទួល​បាន​ប្រាក់​ចំណេញ​ក្នុង​អំឡុង​ពេល​នេះ​។

លោក ប៊ិន មណីមាលា អនុប្រធាន​ផ្នែក​គ្រប់គ្រង​នៃ​កិច្ចការ​អាជីវកម្ម​របស់​ក្រុមហ៊ុន PTT (Cambodia) Limited ដែល​ជា​ក្រុមហ៊ុន​មួយ​ក្នុង​ចំណោម​ក្រុមហ៊ុន​ប្រេងសាំង​ឈាន​មុខ​គេ​មកពី​ប្រទេស​ថៃ​ បាន​ផ្តល់​បទសម្ភាស​ដាច់​ដោយឡែក​មួយ​ជាមួយ​នឹង​ កាសែត​ ភ្នំពេញ​ ប៉ុស្តិ៍​អំពី​និន្នាការ​នៃ​តម្លៃ​ប្រេង​ពិភពលោក និង​ការ​លក់​រាយ​ក្នុង​ស្រុក​។

ហេតុអ្វី​បាន​ជា​តម្លៃ​ប្រេង​លក់​រាយ​របស់​កម្ពុជា​ធ្លាក់ចុះ​យឺត​? PTT ជា​ក្រុមហ៊ុន​មួយ​ក្នុង​ចំណោម​ក្រុមហ៊ុន​ផ្គត់ផ្គង់​ប្រេងសាំង​ធំៗ​នៅក្នុង​ទីផ្សារ​នេះ តើ​លោក​បាន​ផ្លាស់ប្តូរ​ដល់​កម្រិត​ណា​ហើយ? និង​ចាប់ផ្ដើម​ឡើង​នៅពេល​ណា?

តម្លៃ​ប្រេង​ពិភពលោក​មិន​គ្រាន់តែ​បាន​ធ្លាក់​ចុះ​ទៅ​តាម​កត្តា​តម្រូវការ​ទីផ្សារ និង​ការ​ផ្គត់ផ្គង់​ប៉ុណ្ណោះ​ទេ ប៉ុន្តែ​តម្លៃ​ប្រេង​ពិតប្រាកដ​គឺ​បាន​ធ្លាក់ចុះ​យ៉ាង​គំហុក​ចាប់ពី​ត្រីមាស​ទី​៤ ឆ្នាំ​២០១៤​ផង​ដែរ។ ម្យ៉ាងវិញ​ទៀត​យើង​អាច​និយាយ​ថា វា​ជា «​សង្គ្រាម​តម្លៃ» ក្នុង​អំឡុង​ពេល​នៃ​ការ​ដាក់​ទណ្ឌកម្ម​សេដ្ឋកិច្ច​លើក​ទី​៣​ប្រឆាំង​នឹង​ប្រទេស​រុស្ស៊ី​។

ដូច្នេះ​ជា​ការ​ឆ្លើយតប​ជាមួយ​នឹង​ភាព​ងាយ​ប្រែប្រួល​តម្លៃ​ប្រេង ក្រុមហ៊ុន PTT មិនមែន​ជា​អ្នក​រកស៊ី​ដ៏សំខាន់​មួយ​នៃ​ទីផ្សារ​ប្រេង​នៅក្នុង​ប្រទេស​កម្ពុជា​នោះ​ទេ ប៉ុន្តែ​យើង​តែងតែ​ធ្វើការ​បន្ទាប​ថ្លៃ​ឲ្យ​ស្រប​ទៅ​នឹង​និន្នាការ​ទីផ្សារ ប៉ុន្តែ​មិន​ធ្វើ​ស្រប​នឹង​តម្លៃ​ទីផ្សារ​នោះ​ទេ​។ ពិត​ណាស់​ការ​ផ្លាស់ប្តូរ​របស់​យើង​គឺ​ពឹង​លើ​កត្តា​ចំណាយ​របស់​យើង​នៅក្នុង​ចរាចរណ៍​ស្តុក ដោយ​យើង​កំពុង​ប្រើប្រាស់​នូវ​រូបមន្ត​តម្លៃ​គឺ​ «តម្លៃ​គិត​ជា​មធ្យម​ភាគ ដោយ​យើង​មិន​អនុវត្ត​តាមរូបមន្ត សន្និធិ​ចូល​មុន​ចេញ​មុន ​(FIFO) ឬ​ក៏​ចូល​ក្រោយ​ចេញ​មុន (LIFO)» នោះ​ទេ​។

តើ​លោក​គិត​ថា​ការ​លក់រាយ​នៅពេល​បច្ចុប្បន្ន​នៅ​កម្ពុជា​ស្រប​គ្នា​នឹង​ការ​ធ្លាក់​ចុះ​នៃ​តម្លៃ​ប្រេង​ពិភពលោក​បច្ចុប្បន្ន​ឬ​ទេ​? បើ​មិនមែន តើ​ហេតុអ្វី​?

ជា​ការពិត តម្លៃ​លក់រាយ​បច្ចុប្បន្ន​របស់​យើង​គឺ​មាន​ដំណើរការ​ធ្លាក់ចុះ​យឺត​បន្តិច​មែន ប៉ុន្តែ​ដូច​ដែល​ខ្ញុំ​បាន​លើក​ឡើង​ខាង​លើ​អ៊ីចឹង​ថា តម្លៃ​ប្រេង​បាន​ធ្លាក់​ចុះ មិនមែន​ធ្លាក់​ចុះ​ជា​បណ្ដើរៗ​ស្រប​ទៅ​នឹង​កត្តា​នៃ​តម្រូវការ​ទីផ្សារ និង​ការ​ផ្គត់ផ្គង់​នោះ​ទេ​។ អាស្រ័យ​ហេតុនេះ​ក្នុង​ស្ថានការណ៍​ដូច​នោះ យើង​មិន​អាច​មាន​លទ្ធភាព​លក់​បាន​ច្រើន​នោះ​ទេ ជាពិសេស​ចំនួន​លក់ដុំ វា​បាន​បណ្ដាល​ឲ្យ​ការ​ចំណាយ​ក្នុង​ស្តុកទុក​កាន់តែ​ខ្ពស់ ដូច្នេះ​តម្លៃ​លក់រាយ​ត្រូវ​តែ​មាន​ដំណើរការ​យឺត ប៉ុន្តែ​ទោះបី​ជា​យ៉ាងណា​ក៏ដោយ​ក៏​យើង​ត្រូវ​តែ​ធ្វើ​ឲ្យ​ស្រប​ទៅ​តាម​តម្លៃ​ប្រេង​ពិភពលោក​។

បច្ចុប្បន្ន​ រដ្ឋាភិបាល​បាន​អំពាវនាវ ឬ​ថែម​ទាំង​បើក​កិច្ចប្រជុំ​ជាច្រើន​ជាមួយ​ក្រុមហ៊ុន​ក្នុង​ការ​ស្វែងរក​លទ្ធភាព​ដើម្បី​បញ្ចុះ​ថ្លៃ​បន្ថែម​ទៀត​។ តើ​អ្នក​គិត​ថា​រដ្ឋាភិបាល​បាន​ជ្រៀតជ្រែក​ដល់​ការ​កំណត់​តម្លៃ​របស់​អ្នក​ក្នុង​ទីផ្សារ​សេរី​នេះ​ដែរ​ឬ​ទេ​?

រដ្ឋាភិបាល​មិន​បាន​ជ្រៀតជ្រែក​ចូល​ក្នុង​ការ​កំណត់​តម្លៃ​ណា​មួយ ជាមួយ​ក្រុមហ៊ុន​ប្រេង​របស់​យើង​នោះ​ទេ ប៉ុន្តែ​ ពួកគេ​គ្រាន់តែ​អំពាវនាវ​ឲ្យ​មាន​កិច្ចប្រជុំ​ក្នុង​ការ​ស្វែងរក​លទ្ធភាព ឬ​ការ​ផ្ដល់​យោបល់​ក្នុង​ការ​បញ្ចុះ​តម្លៃ​ប្រេងសាំង ខណៈ​ដែល​លោកនាយករដ្ឋមន្ដ្រី ហ៊ុន សែន ក៏​បាន​ថ្លែង​សុន្ទរកថា​ជា​សាធារណៈ​កាលពី​ថ្ងៃ​ទី​១២ ខែ​មករា ឆ្នាំ​២០១៥​ ក្នុង​អំឡុង​ពិធី​បើក​ដំណើរការ​រោងចក្រ​វារីអគ្គិសនី​មាន​ថាមពល​៣៣​៨​មេហ្គាវ៉ាត់​នៅ​ខេត្ត​កោះកុង​ឲ្យ​មាន​ការពិភាក្សា​ដើម្បី​បន្ត​ស្វែងរក​លទ្ធភាព​បញ្ចុះ​បន្ថែម​ទៀត​។

សេដ្ឋវិទូ​បាន​សង្កេត​ឃើញ​ថា​ការ​លក់​ក្នុង​ស្រុក​គួរតែ​តិច​ជាង​៤ ០០០​រៀល​ក្នុង​មួយ​លីត្រ​ធៀប​នឹង​ការ​ធ្លាក់ចុះ​នៃ​តម្លៃ​ប្រេង​ពិភពលោក​នៅពេល​បច្ចុប្បន្ន​។ តើ​លោក​យល់​យ៉ាង​ណា​ដែរ​?

ជា​ការពិត យើង​គ្រប់ៗ​គ្នា​និយាយ​ថា​អាច​លក់​បាន វា​មិនមែន​ជា​ការ​ខុស និង​ត្រូវ​នោះ​ទេ ប៉ុន្តែ​បញ្ហា​សំខាន់​គឺ​ត្រង់​ថា តើ​អ្នក​រស់​ដូចម្ដេច​នៅក្នុង​អំឡុង​តម្លៃ​ប្រេង​ធ្លាក់​ចុះ​នេះ។ អ្នក​ត្រូវ​សម្លឹង​មើល​ទៅ​ព្រៃឈើ​ទាំងមូល មិនមែន​សម្លឹង​មើល​ទៅឈើ​មួយ​ដើម​នោះ​ទេ​។ នៅក្នុង​អាជីវកម្ម​របស់​យើង យើង​ត្រូវតែ​សម្លឹង​មើល​ទៅលើ​ផលិតផល​ដ៏សំខាន់​ទាំងអស់ និង​វិស័យ​ទាំងអស់​ដើម្បី​ថ្លឹងថ្លែង​ពី​តុល្យភាព មិនមែន​សង្គ្រាម​តម្លៃ​នោះ​ទេ​។

បើ​តាម​ខ្ញុំ​ដឹង​យើង​មាន​ក្រុមហ៊ុន​ផ្គត់ផ្គង់​ប្រេងសាំង​ជាង​ ១០​ នៅក្នុង​ប្រទេស​កម្ពុជា មាន​មនុស្ស​មួយ​ចំនួន​បាន​ត្អូញត្អែរ​ថា ពេលណា​ដែល​តម្លៃ​ប្រេង​ពិភពលោក​កើនឡើង ស្ថានីយ​ប្រេងសាំង​ទាំងនោះ​បង្កើន​តម្លៃ​លក់រាយ​ភ្លាម​។ តើ​លោក​មាន​ប្រតិកម្ម​តប​យ៉ាង​ណា​ដែរ​?

វា​គឺជា​រឿង​ធម្មតា​របស់​អាជីវកម្ម រហូត​មក​ដល់​ពេល​នេះ​តម្លៃ​ប្រេង​បាន​ធ្លាក់​ចុះ​ជាច្រើន​លើក ដែល​គ្រាន់តែ​មាន​ដំណើរការ​យឺតបន្តិច ឬ​លឿន​វា​អាស្រ័យ​លើ​តម្លៃ​ស្ដុក។ ប៉ុន្តែ​វា​នៅ​តែ​ល្អ​ប្រសើរ​ជាង​តម្លៃ​របស់​ផលិតផល​ប្រើប្រាស់​ផ្សេងៗ​ទៀត​ដូចជា ការ​ដឹកជញ្ជូន ផលិតផល​ប្រើប្រាស់​។ល។ យើង​អាច​មើល​ឃើញ​ថា មិន​មាន​ការ​ធ្លាក់​ចុះ​នោះ​ទេ ទោះបី​ជា​តម្លៃ​ប្រេង​បាន​ធ្លាក់​ចុះ​ក៏ដោយ​។

រដ្ឋាភិបាល​អះអាង​ថា​ខ្លួន​បាន​ផ្ដល់​ការ​ឧបត្ថម្ភធន​អស់​រយៈពេល​ជាច្រើន​ឆ្នាំ​ដើម្បី​ទប់ស្កាត់​ការ​កើនឡើង​តម្លៃ​លក់​រាយ​។ តើ​ហេតុអ្វី​បានជា​តម្លៃ​របស់​យើង​នៅ​តែ​ខ្ពស់​?

យើង​មិន​អាច​ប្រើប្រាស់​ពាក្យ​ថា៖ «ឧបត្ថម្ភធន» បាន​ទេ​ក្នុង​អំឡុង​ពេល​នេះ គឺវា​នឹង​មាន​ការ​ភាន់ច្រឡំ​បើ​អ្នក​ពិតជា​ដឹង​ពី​ហេតុផល​លើ​តម្លៃ​ប្រេង​បច្ចុប្បន្ន​ធៀប​នឹង​មូលដ្ឋាន​ពន្ធ​កំណត់​តម្លៃ​ប្រេងសាំង​ក្នុង​តម្លៃ​៧៨​៥​ដុល្លារអាមេរិក​ក្នុង​មួយ​តោន និង​តម្លៃ​ប្រេង​ម៉ាស៊ូត​៥៨០​ដុល្លារ​អាមេរិក​ក្នុង​មួយ​តោន ដែល​នាយកដ្ឋាន​ពន្ធគយ​និង​រដ្ឋាករយក​ពី​យើង។ ពិត​ហើយ​ថា អត្រាពន្ធ ការ​ចំណាយ​ដឹកជញ្ជូន និង​ការ​ចំណាយ​ប្រតិបត្តិការ ក៏​ដូចជា​ការ​វិនិយោគ ដែល​កត្តា​ទាំងអស់​នេះ​ហើយ​ដែល​ធ្វើឲ្យ​ការ​លក់​របស់​យើង​នាំ​តែ​ខ្ពស់​។

កម្ពុជា​នឹង​អាច​បូម​ប្រេង​បាន​នៅ​ឆ្នាំ​ ២០១៨​ ខាង​មុខ​នេះ។ ​តើ​លោក​គិត​ថា​ វា​នឹង​ជួយ​ដល់​ការ​ពឹង​លើ​ការ​នាំ​ចូល​និង​ការ​កាត់បន្ថយ​តម្លៃ​លក់​រាយ​របស់​ប្រទេស​នេះ​ឬ​ទេ​?

ខ្ញុំ​មិន​គិត​អ៊ីចឹង​ទេ លុះ​ណា​តែ​រដ្ឋាភិបាល​បាន​កំណត់​បទប្បញ្ញត្តិ​ត្រឹមត្រូវ ហើយ​ការសិក្សា​អំពី​លទ្ធភាព​នៃ​សេដ្ឋកិច្ច​ឲ្យ​បាន​ប្រសើរ​៕PB

អត្ថបទគួរចាប់អារម្មណ៍