ភ្នំពេញៈ ភាពអំណោយផលនៃកត្តាអាកាសធាតុបានធ្វើឲ្យទិន្នផលដូងប្រេងរបស់ក្រុមហ៊ុន ម៉ុង ឫទ្ធី គ្រុប កើនលើសពីការព្យាករប្រមាណ ៣ ម៉ឺនតោន។ នេះបើយោងតាមលោក ម៉ុង ឫទ្ធី អគ្គនាយកក្រុមហ៊ុន។
លោក ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានប្រាប់ភ្នំពេញប៉ុស្តិ៍កាលពីថ្ងៃចន្ទថា ភាពអំណោយផលនៃអាកាសធាតុបានធ្វើឲ្យទិន្នន័យដូងប្រេងដែលប្រមូលបានក្នុងឆ្នាំនេះអាចមានចំនួន ៣០០ ០០០ តោន កើនលើសការព្យាករប្រហែល ៣០ ០០០ តោន។
លោកថ្លែងថា៖ «តាមការព្យាករពីមុនក្នុងឆ្នាំ ២០២០ នេះយើងអាចទទួលផលប្រមាណ ២៧០ ០០០ តោន ប៉ុន្តែតាមការពិនិត្យមើលជាក់ស្តែងផលផ្លែដូងអាចកើនឡើងរហូតដល់ ៣០០ ០០០ តោន។ តែជាអកុសលរោងចក្រកែច្នៃទាំង ២ នេះមិនអាចទទួលយកទៅកែច្នៃបានគ្រប់ចំនួនទេ ដែលធ្វើឲ្យផលផ្លែដូងប្រេងនៅសល់លើទីលាន ប្រមាណជាង ៥ ០០០ តោន បណ្តាលឲ្យរលួយស្អុយចោលខាតបង់ថវិកាយ៉ាងធ្ងន់ធ្ងរ»។
ទោះយ៉ាងណាលោកមិនបានប្រាប់ឲ្យដឹងពីទឹកប្រាក់នៃការខាតបង់នោះទេ។
លោកបន្ថែមថា ផលផ្លែដូងដែលត្រូវរលួយចោលនេះគឺមិនមែនដោយសារតែក្រុមហ៊ុនកាត់បន្ថយចង្វាក់ផលិតកម្ម ឬម៉ោងធ្វើការរបស់បុគ្គលិកនៅចម្ការ និងរោងចក្រនាអំឡុងការផ្ទុះឡើងនៃជំងឺកូវីដ ១៩ នេះទេ ប៉ុន្តែដោយសាររោងចក្រទាំង ២ របស់ក្រុមហ៊ុនមិនអាចកិនដូងប្រេងបានទាន់ពេលវេលា។
លោកបន្ថែមថា នៅក្នុងពេលឆាប់ៗនេះក្រុមហ៊ុននៅមិនទាន់មានផែនការវិនិយោគលើការសាងសង់រោងចក្របន្ថែមទេ ព្រោះរោងចក្រកិនដូងប្រេងមានតម្លៃខ្ពស់ខ្លាំង ដោយរោងចក្រដែលមានសមត្ថភាពកិនដូងប្រេងបាន ៤៥ តោនក្នុង ១ ម៉ោង អាចមានតម្លៃប្រមាណ ៤០ លានដុល្លារ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍ថា កន្លងមកដោយសារដំណាំដូងប្រេងមិនសូវមានទីផ្សារល្អ អ្នកដាំ (ពិសេសក្នុងខេត្តរតនគិរី) បាននាំគ្នាងាកទៅដាំចេកវិញ ព្រោះមានទីផ្សារល្អជាង។ លោកបន្ថែមថា ដោយសារកម្ពុជាមិនមានការដាំដុះច្រើន ហេតុនេះមិនមានការវិនិយោគឲ្យបានទូលំទូលាយឡើយ ដោយកម្ពុជាមានត្រឹមតែការនាំចេញវត្ថុធាតុដើមទៅទីផ្សារអន្តរជាតិប៉ុណ្ណោះ។
លោកថ្លែងថា៖ «ដូងប្រេងរបស់យើងនៅមិនទាន់មាន Brand ជាអន្តរជាតិទេ»។
បច្ចុប្បន្នផលិតផលពីដំណាំដូងប្រេង ត្រូវគេយកទៅប្រើយ៉ាងទូលំទូលាយដូចជា ចំណីអាហារមនុស្ស សត្វ ថាមពល ឱសថ និងគ្រឿងសម្អាងជាដើម។ ដូងប្រេងមានការដាំដុះច្រើនប្រទេសឥណ្ឌូនេស៊ី ម៉ាឡេស៊ី និងប្រទេសថៃជាដើម។
ចាប់ផ្តើមបណ្តុះកូនដាំដំបូងក្នុងឆ្នាំ ១៩៩៦ មកដល់ពេលនេះផ្ទៃដីដាំដុះដូងប្រេងរបស់ក្រុមហ៊ុន ម៉ុង ឫទ្ធី គ្រុប មានប្រមាណ ២០ ០០០ ហិកតា។ កាលពីឆ្នាំ ២០០០ ក្រុមហ៊ុនបានវិនិយោគលើការសាងសង់រោងចក្រកែច្នៃទី ១ (កិនយកប្រេងដូង) ដែលមានសមត្ថភាពផលិតប្រេងដូងបាន ៣០ តោនក្នុង ១ ម៉ោង ហើយនៅឆ្នាំ ២០១៥ ក្រុមហ៊ុនក៏បានសាងសង់រោងចក្រកែច្នៃថ្មី ១ ទៀតដែលមានកម្លាំងផលិត ៤៥ តោនក្នុង ១ ម៉ោង។
កាលពីមុនប្រេងដូងដែលផលិតបានត្រូវបាននាំចេញទៅកាន់ប្រទេសថៃ និងម៉ាឡេស៊ី ប៉ុន្តែបច្ចុប្បន្នត្រូវបានក្រុមហ៊ុននាំចេញទៅកាន់ទីផ្សារសហគមន៍អឺរ៉ុប។
យោងតាមលោក ឫទ្ធី ការនាំចេញប្រេងដូងរបស់ក្រុមហ៊ុនទៅទីផ្សារអន្តរជាតិនាពេលនេះមានដំណើរការទៅមុខជាធម្មតា។ ផលិតផលប្រេងដូងដែលកិនរួចប្រមាណ ៩៦ ភាគរយត្រូវបាននាំចេញទៅកាន់ទីផ្សារសហគមន៍អឺរ៉ុប ខណៈ ៤ ភាគរយទៀតត្រូវបានទុកប្រើប្រាស់ក្នុងស្រុកសម្រាប់កិនលាយជាមួយផលិតផលរួមផ្សំផ្សេងទៀតដើម្បីធ្វើជាចំណីសត្វ។
នៅក្នុងឆ្នាំនេះ ប្រេងដូងមានតម្លៃប្រមាណ ៥៤០ ដុល្លារក្នុង ១ តោនកើនលើសឆ្នាំមុនជិត ១០០ ដុល្លារក្នុង ១ តោន។ នេះបើតាមលោក ម៉ុង ឫទ្ធី។
ខណៈបច្ចុប្បន្នប្រេងឆាប្រើប្រាស់នៅកម្ពុជាសុទ្ធតែនាំចូលមកពីបរទេស លោក ម៉ុង ឫទ្ធី បាននិយាយថា គេមិនអាចធ្វើការវិនិយោគលើរោងចក្រផលិតប្រេងឆាបានទេ ប្រសិនបើនៅកម្ពុជាមានការដាំដុះដើមដូងប្រេងតិចជាង ៣០ ០០០ ហិកតានោះ ព្រោះការវិនិយោគនោះនឹងត្រូវខាតបង់៕ LA