.jpg)
តាមការសិក្សាជាមធ្យមក្នុង ១ ឆ្នាំកម្ពុជាត្រូវការអំបិលសម្រាប់បរិភោគចន្លោះពី ៨-១០ ម៉ឺនតោន។ ហេង ជីវ័ន
ភ្នំពេញៈ កម្ពុជានឹងផ្អាកការនាំចូលអំបិលពីបរទេសមកផ្គត់ផ្គង់ទីផ្សារក្នុងស្រុកនៅក្នុងឆ្នាំនេះ ដោយសារការប្រមូលផលអំបិលសម្រេចបានប្រមាណពី ៧-៨ ម៉ឺនតោនរួចមកហើយគិតរហូតមកទល់ពេលនេះ។ នេះបើយោងតាមអ្នកនៅក្នុងវិស័យផលិតអំបិលកម្ពុជា។
កាលពីឆ្នាំ ២០១៩ បើទោះបីប្រទេសកម្ពុជា ទទួលរងឥទ្ធិពលបាតុភូតអាកាសធាតុក្តៅខ្លាំង El Nino ប៉ុន្តែការផលិតអំបិលសម្រេចបានប្រមាណជាង ៣ ម៉ឺនតោនប៉ុណ្ណោះ ដោយសារតែតំបន់ផលិតអំបិលបែរជាមានភ្លៀងច្រើនទៅវិញ។ តាមការសិក្សាជាមធ្យមក្នុង ១ ឆ្នាំកម្ពុជាត្រូវការអំបិលសម្រាប់បរិភោគចន្លោះពី ៨-១០ ម៉ឺនតោន។
លោក ប៊ុន បារាំង សហប្រធានសហគមន៍អ្នកផលិតអំបិលខេត្តកំពតកែប ដែលជាកន្លែងផលិតអំបិលតែមួយគត់នៅកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា អំបិលដែលផលិតបានក្នុងឆ្នាំនេះអាចនឹងបំពេញបានតាមតម្រូវការក្នុងស្រុក ខណៈអាកាសធាតុនៅតំបន់ផលិតនៅតែល្អប្រសើរមកដល់ពេលនេះ។ លោកបន្តថា ការផលិត និងប្រមូលផលអាចមានរយៈពេលយូរថ្ងៃទៅមុខទៀតក្នុងឆ្នាំនេះ។
លោកបានថ្លែងថា៖ «អំបិលសម្រាប់បរិភោគឆ្នាំនេះនឹងមិនមាននាំចូលដូចឆ្នាំមុនឡើយ»។ លោកបន្តថា៖ «ខ្ញុំគិតថា មកដល់ពេលនេះ ទិន្នផលអំបិលដែលផលិតបានអាចស្ថិតក្នុងរង្វង់ ៨ ម៉ឺនតោន»។
លោកប្រាប់ទៀតថា អំបិលក្នុងឆ្នាំនេះមានតម្លៃប្រហាក់ប្រហែលនឹងឆ្នាំមុន ដោយអំបិលលេខ ១ មានតម្លៃប្រមាណ ១៥ ០០០ រៀលក្នុង ១ ការុង ៥០ គីឡូក្រាម និងអំបិលលេខ ២ មានតម្លៃ ១២ ០០០ រៀល។
លោក ប៊ុន ណារិន ដែលជាអ្នកផលិតអំបិលក្នុងខេត្តកំពតបាននិយាយថា បើទោះបីតំបន់ខ្លះចាប់ផ្តើមមានភ្លៀងធ្លាក់ ប៉ុន្តែការប្រមូលផលអំបិលក្នុងខេត្តកំពតនៅពេលនេះមិនទាន់ចប់នៅឡើយទេ គ្រាន់តែវាមិនបានច្រើនដូចក្នុងអំឡុងខែមីនា និងមេសា។ ផលប្រមូលបានក្នុងឆ្នាំនេះកើនលើសឆ្នាំមុនច្រើនគួរសម។
លោកប្រាប់ថា៖ «ខ្ញុំគិតថា ឆ្នាំនេះអំបិល (ធម្មជាតិ) សម្រាប់បរិភោគនឹងមិនខ្វះទេ តែបើអាចមានការនាំចូលខ្លះ គឺសម្រាប់តែអំបិលឧស្សាហកម្មប៉ុណ្ណោះ»។
អំបិលឧស្សាហកម្មសំដៅដល់អំបិលដែលគេប្រើប្រាស់សម្រាប់ការបោកគក់សម្លៀកបំពាក់ និងសម្រាប់ប្រើសម្រាប់ការផលិតទឹកកកជាដើម។ នេះបើតាមលោក ណារិន។
លោកបន្ថែមថា តាមទិន្នន័យដែលមន្ត្រីជំនាញទើបចុះមកប្រមូលកាលពីពេលថ្មីៗនេះគឺអំបិលដែលប្រមូលបានមកដល់ពេលនេះគឺមានជាង ៧ ម៉ឺនតោនរួចមកហើយ។
លោកបន្តថា ទោះយ៉ាងណាវិស័យផលិតអំបិលនៅតែជួបនឹងបញ្ហាច្រើនទាក់ទងទៅនឹងកង្វះកម្លាំងពលកម្ម។
របាយការណ៍កន្លងមកបានបង្ហាញថា នៅកម្ពុជាមានផ្ទៃដីផលិតអំបិលប្រមាណ ៤ ៥០០ ហិកតា គ្របដណ្តប់ក្នុងខេត្តកំពតកែប។ បើអាកាសធាតុល្អ ក្នុង ១ ហិកតា គេអាចផលិតអំបិលបានប្រហែល ២០ តោនក្នុង ១ ឆ្នាំដោយគិតចាប់ពីខែមករាដល់ខែឧសភា។
ឆ្នាំ ២០១៤, ២០១៥ និងឆ្នាំ ២០១៦ គឺជាពេលដែលកម្ពុជាប្រមូលផលអំបិលបានច្រើនដោយក្នុង ១ ឆ្នាំៗបានជាង ១០ ម៉ឺនតោន។ ទោះយ៉ាងណា ទិន្នផលនេះបានធ្លាក់ចុះចំនួន ៣ ឆ្នាំជាប់គ្នាវិញ ដោយកាលពីឆ្នាំ ២០១៨ កម្ពុជានាំចូលអំបិលពីចិនជាង ១ ម៉ឺនតោន និងឆ្នាំ ២០១៩ នាំចូលអំបិលពីឥណ្ឌាជាង ៥ ០០០ តោន។ នេះបើតាមលោក ប៊ុន បារាំង។
មិនមានតួលេខពីចំនួនទឹកប្រាក់នៃការនាំចូលអំបិលកាលពីឆ្នាំ ២០១៩ ទេ ប៉ុន្តែកាលពីឆ្នាំ ២០០៩ កម្ពុជាបាននាំចូលអំបិល ២ ម៉ឺនតោនពីប្រទេសចិន ដោយចំណាយប្រាក់ ២,២ លានដុល្លារ៕ LA
