ភ្នំពេញៈ បរិមាណផលស្រូវប្រាំងនៅឆ្នាំនេះបានធ្លាក់ចុះ១,៩ភាគរយធៀបនឹង រយៈពេលដូចគ្នាកាលពីឆ្នាំមុនដោយសារតែផ្ទៃដីដាំដុះមានការថយ ចុះ។ នេះបើតាមរបាយការណ៍ពីក្រសួងកសិកម្មកាលពីថ្ងៃសុក្រ។
របាយការណ៍បង្ហាញថា ផ្ទៃដីដែលថយចុះនេះបណ្តាលមកពីទឹកជំនន់ដែលស្រកទៅយឺត បណ្តាលឲ្យការដាំដុះដំណាំស្រូវប្រាំងនៅតំបន់ខ្លះមិនអាចចាប់ផ្តើមដាំដុះបាន។
របាយការណ៍ឲ្យដឹងថាបរិមាណស្រូវដែលកម្ពុជា ផលិតបាននៅរដូវប្រាំងនេះមានចំនួនសរុប ២,១១ លានតោន ថយចុះ១,៩ ភាគរយពីចំនួន២,១៥ លានតោនកាលពីរដូវមុន ហើយផ្ទៃដីដាំដុះសរុបមានចំនួន ៤៨៣ ៣០៥ ហិកតា ថយចុះ ២,៥ ភាគរយពី ៤៩៥ ៤៦៥ ហិកតា។
មន្ត្រីជំនាញនិយាយថា ការថយចុះបរិមាណតិចតួច ខណៈផ្ទៃដីដាំដុះថយចុះច្រើនក៏ព្រោះតែទិន្នផលជាមធ្យមដែល កសិករផលិតបានក្នុងមួយហិកតាកើនពី៤,១ ដល់ ៤,៣ តោន ដោយសារការយល់ដឹងរបស់កសិករក្នុងការប្រើប្រាស់ពូជ ការប្រើបច្ចេកទេសដាំដុះប្រសើរជាងមុន និងប្រភពទឹកដែលបានកើនឡើងនៅតាមតំបន់មួយចំនួន។
លោក ពេជ្រ រម្យនា អនុប្រធាននាយកដ្ឋានដំណាំស្រូវនៃក្រសួងកសិកម្មមានប្រសាសន៍ ថា៖ «កសិករឥឡូវគាត់ប្រើពូជសុទ្ធ គាត់អនុវត្តបច្ចេកទេសកសិកម្មល្អជាងមុន ហើយឆ្នាំនេះមិនសូវមានសត្វល្អិតចង្រៃមកបំផ្លាញដំណាំស្រូវរបស់ គាត់»។
បើតាមការឲ្យដឹងរបស់លោក ពេជ្រ រម្យនា ប្រភេទស្រូវរដូវប្រាំងមានដូចជា សែនពិដោរ អ៊ីអ៊ែរ៦៦និងជលសារ។ លោកបន្ថែមថា ការដាំដុះស្រូវប្រាំងឲ្យទិន្នផលខ្ពស់ជាងស្រូវវស្សា ព្រោះស្រូវប្រាំងជាប្រភេទស្រូវដែលមិនរើសរដូវហើយមិនត្រូវការ ការថែទាំ និងទឹកច្រើនដូចស្រូវរដូវវស្សាទេ។
លោកបន្តថា ខេត្តដែលមានសក្តានុពលក្នុងការដាំស្រូវប្រាំងមានដូចជា ខេត្តព្រៃវែង កំពង់ចាម កណ្តាល តាកែវ និងបណ្តាខេត្តផ្សេងទៀតដែលស្ថិតនៅក្បែរទន្លេមេគង្គ។
លោក ញិប ស៊្រន ប្រធានមន្ទីរកសិកម្មខេត្តតាកែវ និយាយថា ការបង្កបង្កើនស្រូវប្រាំងក្នុងខេត្តតាកែវកើនខ្ពស់ជាងរដូវប្រាំងឆ្នាំមុន។ លោកថា បិរមាណផលដែលកើនឡើងនេះ ដោយសារប្រព័ន្ធធារាសាស្រ្តត្រូវបានបង្កើតឡើងដែលធ្វើឲ្យការ ដាំដុះស្រូវប្រាំងអាចធ្វើទៅបាន។
លោកថ្លែងថា៖ «កសិករយល់ដឹងច្រើនពីការប្រើប្រាស់ពូជ។ គាត់ប្រើពូជសុទ្ធជាងមុន។ គាត់កែបច្ចេកទេសដាំដុះ ហើយប្រព័ន្ធទឹកក៏ត្រូវសង់បន្ថែមនៅក្បែរកសិករ»។
លោកបន្ថែមថា ប្រឡាយធំៗត្រូវបានបង្កើតឡើងនៅក្នុងស្រុកចំនួន៤នៅក្នុងខេត្ត តាកែវ។
បើតាមតួលេខពី សេដាក ប្រព័ន្ធស្រោចស្រពនៅកម្ពុជាមានចំនួន២ ០០០កន្លែង រួមមាន អាងស្តុកទឹក ទំនប់ ប្រឡាយ និងបឹងជាដើម។
លោក ឃឹម សុផាណ្ណា អ្នកប្រឹក្សាគម្រោងរបស់អង្គការ សេដាក បានឲ្យដឹងថា ប្រព័ន្ធធារាសាស្ត្រនៅតែជាបញ្ហាប្រឈមរបស់កសិករកម្ពុជា ហើយថាការទទួលបានប្រព័ន្ធស្រោចស្រពគ្រប់គ្រាន់នឹងជួយកសិករ បង្កើនទិន្នផលក្នុងការដាំដុះ៕
