សិង្ហបុរីៈ ទីក្រុងប៉ារីស បានឡើងដល់កំពូលតារាងទីក្រុងមានតម្លៃខ្ពស់បំផុតក្នុងពិភពលោកសម្រាប់ជនបរទេស រួមជាមួយទីក្រុងសិង្ហបុរី និងទីក្រុងហុងកុង ខណៈទីក្រុងប្រទេស វ៉េណេស៊ុយអេឡា ជាកន្លែងដែលមានតម្លៃទាបបំផុត។ នេះបើតាមការអង្កេតកាលពីថ្ងៃអង្គារ។
ទីក្រុងរបស់ប្រទេស បារាំង នេះ គឺជាទីក្រុងនៅតំបន់ចាយប្រាក់អឺរ៉ូតែមួយគត់ដែលមានឈ្មោះក្នុងចំណាត់ថ្នាក់កំពូល។ កាលពីឆ្នាំ ២០១៨ ទីក្រុងប៉ារីស ស្ថិតនៅចំណាត់ថ្នាក់លេខ ២ និងកាលពីឆ្នាំ ២០១៧ មានចំណាត់ថ្នាក់លេខ ៧។
ការអង្កេតនេះបានរកឃើញថា ប៉ារីស «គឺជាទីក្រុងមានតម្លៃខ្ពស់បំផុតក្នុងការរស់នៅ» ក្នុងនោះឈុតសម្លៀកបំពាក់ពាណិជ្ជកម្មសម្រាប់បុរសមានតម្លៃជាមធ្យមប្រហែល ២ ០០០ ដុល្លារ ចំណែកតម្លៃកាត់សក់របស់ស្ដ្រីមានជាធម្មតា ១២០ ដុល្លារ។
ការអង្កេតនេះឲ្យដឹងថា មានតែ «ស្រា ការដឹកជញ្ជូន និងថ្នាំជក់» ប៉ុណ្ណោះមានតម្លៃប្រហាក់ប្រហែលជាមួយទីក្រុងអឺរ៉ុបផ្សេងទៀត។
ស្ថាប័ន Economist Intelligence Unit (EIU) បានឲ្យដឹងថា ជាលើកដំបូងក្នុងរយៈពេលជាង ៣ ទសវត្សរ៍នៃការអង្កេតដែលទីក្រុងចំនួន ៣ ត្រូវបានផ្ដល់ចំណាត់ថ្នាក់ឈានមុខគេស្មើគ្នា បន្ទាប់ពីប្រទេស សិង្ហបុរី ដែលនាំមុខតារាង កាលពីឆ្នាំមុន។
បញ្ជីទីក្រុងឈានមុខគេទាំង ១០ ត្រូវបានគ្របដណ្ដប់ដោយទីក្រុងអាស៊ី និងអឺរ៉ុប ក្នុងនោះទីក្រុង Zurich (ស្វ៊ីស) លេខ ៤ អូសាកា (ជប៉ុន) និងទីក្រុងហ្សីណែវ (ស្វ៊ីស) លេខ ៥ ស្ទួន ទីក្រុងសេអ៊ូល (កូរ៉េខាងត្បូង) និងកូប៊ិនហាក (ដាណឺម៉ាក) លេខ ៧ ស្ទួន។
អាមេរិកខាងជើង ត្រូវបានតំណាងដោយទីក្រុងញូវយ៉ករបស់អាមេរិក ជាប់លេខ ៧ និងទីក្រុង Los Angeles លេខ ១០ ជាមួយទីក្រុង Tel Aviv របស់ប្រទេស អ៊ីស្រាអែល។
EIU ដែលបានអង្កេតទីក្រុង ១៣៣ ទូទាំងពិភពលោកបានឲ្យដឹងថា ការកើនឡើងនៃតម្លៃរូបិយប័ណ្ណ អតិផរណា និងភាពចលាចលផ្នែកនយោបាយបានចូលរួមចំណែកក្នុងការប្រែប្រួលចំណាត់ថ្នាក់នៅឆ្នាំនេះ។
ការអង្កេតនេះបានប្រៀបធៀបតម្លៃផលិតផល ៤០០ ប្រភេទ និងសេវាកម្ម ១៦០ រួមមានម្ហូបអាហារ និងភេសជ្ជៈ សម្លៀកបំពាក់ ការជួលលំនៅឋាន ការដឹកជញ្ជូន ការរៀនសូត្រ និងការកម្សាន្ត។
ការអង្កេតនេះ មានគោលបំណងជួយក្រុមហ៊ុនគណនាកញ្ចប់ប្រាក់សំណង និងប្រាក់ឧបត្ថម្ភសម្រាប់បុគ្គលិកជាជនបរទេស និងអ្នកដំណើរបែបអាជីវកម្ម។
ទីក្រុងការ៉ាកាសប្រទេសវ៉េណេស៊ុយអេឡា បានយកឈ្នះក្រុងដាម៉ាស របស់ប្រទេស ស៊ីរី ជាទីក្រុងមានតម្លៃទាបបំផុតលើពិភពលោក ខណៈជម្លោះដណ្តើមអំណាចបានធ្វើឲ្យប្រទេសនេះធ្លាក់ចូលទៅក្នុងវិបត្តិកាន់តែជ្រៅ។
ទីក្រុងជាច្រើននៅទ្វីបអាស៊ី ស្ថិតក្នុងចំណាត់ថ្នាក់ទាប រួមមានក្រុង Bangalore (ឥណ្ឌា) លេខ ១២៩ ទីក្រុង Karachi (ប៉ាគីស្ថាន) លេខ ១២៧ ក្រុង Chennai (ឥណ្ឌា) លេខ ១២៥ និងទីក្រុងញូវដែលី (ឥណ្ឌា) លេខ ១២៣៕ AFP/LA