The Phnom Penh Post Search

Search form




Logo of Phnom Penh Post newspaper Phnom Penh Post - ទីផ្សារ​ចិន ស្រូប​យក​អង្ករ​នាំចេញ​ជិត ៤០ ភាគរយ

ទីផ្សារ​ចិន ស្រូប​យក​អង្ករ​នាំចេញ​ជិត ៤០ ភាគរយ

Content image - Phnom Penh Post
កម្មករ​កំពុង​បញ្ជា​ម៉ាស៊ីន​ដេរបិទ​មាត់​​ការុង​អង្ករ​​។ ហេង ជីវ័ន

ទីផ្សារ​ចិន ស្រូប​យក​អង្ករ​នាំចេញ​ជិត ៤០ ភាគរយ

ភ្នំពេញៈ ប្រទេស​ចិន​នៅ​តែ​ជា​ទីផ្សារ​នាំមុខ​គេ​ដែល​​ទទួល​ទិញ​អង្ករ​ពី​កម្ពុជា ដោយ​នៅក្នុង​រយៈពេល ១១ ​ខែ​ដើម​ឆ្នាំ​ ២០២០ នេះ​ស្រូប​បាន​ចំណែក​ទីផ្សារ​ជិត ៤០ ​ភាគរយ ឬ​ជាង ២៣ ​ម៉ឺន​តោន​នៃ​ការនាំ​ចេញ​អង្ករ​សរុប​របស់​កម្ពុជា​​។ នេះ​បើ​តាម​​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ។

ទិន្នន័យ​បាន​ឱ្យ​ដឹង​ថា ក្នុង​រយៈពេល ១១ ខែ ឆ្នាំ ២០២០ ការនាំ​ចេញ​អង្ករ​ដែល​ឆ្លងកាត់​ការត្រួតពិនិត្យ​ភូតគាម​អនាម័យ សម្រេច​បាន ៦០១ ០៤៥ តោន កើន​ឡើង ៨៦ ៨៩៦ ​តោន ស្មើ​នឹង ១៦,៩ ភាគរយ​បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​ ២០១៩។ ក្នុង​ចំណោម​អង្ករ​នាំចេញ​ខាង​លើ​ គឺ​មាន​អង្ករ​ក្រអូប​​គ្រប់​ប្រភេទ ៤៨១ ១២៣ តោន អង្ករស​ចម្រុះ​គ្រប់​ប្រភេទ ១១៣ ៧០៣ ​តោន និង​អង្ករ​ចំហុយ ៦ ១៥១ តោន។

ប្រទេស​ចិន​បាន​បន្ត​នាំ​មុខគេ​ក្នុង​នាម​ជា​ទីផ្សារ​ទទួល​ទិញ​អង្ករ​ពី​កម្ពុជា​ច្រើន​ជាង​​គេ ដោយ​មាន​បរិមាណ ២៣៤ ៩៤០ តោន​ស្មើ​នឹង ៣៩,០៩ ភាគរយ​តាម​ពី​ក្រោយ​ដោយ​ទីផ្សារ​​​សហភាព​អឺរ៉ុប​មាន ១៨៨ ៤៣៦ តោន​​ស្មើនឹង ៣១,៣៥ ​ភាគរយ​បណ្តា​ប្រទេស​​​អាស៊ាន​មាន ៧៨ ២០៨ តោន ស្មើ ១៣,០១ ​ភាគរយ និង​​គោលដៅ​ផ្សេងៗ​ទៀត​មាន​ចំនួន ៩៩ ៤៦១ តោន​ស្មើនឹង ១៦,៥៥ ភាគរយ​។ នេះ​បើ​យោង​តាម​ទិន្នន័យ​ខាង​លើ​។

លោក វេង សាខុន រដ្ឋមន្ត្រី​ក្រសួង​កសិកម្ម​ រុក្ខាប្រមាញ់ និង​នេសាទ​កាលពី​ថ្ងៃ​អង្គារ​បាន​ប្រាប់​ភ្នំពេញ​ប៉ុស្តិ៍​ថា ការនាំ​ចេញ​អង្ករ​កម្ពុជា​បាន​បន្ត​កើនឡើង​​គ្រប់​ទិសដៅ​ ពិសេស​ទីផ្សារ​ប្រទេស​ចិន​ដែល​បាន​ស្រូប​យក​ប្រមាណ​ជិត​ ៤០ ​ភាគរយ​ការនាំ​ចេញ​សរុប​។ ជាមួយ​នឹង​កំណើន​នាំ​ចេញ​ស្ទើរ​គ្រប់​ខែ​ក្នុង​ឆ្នាំ​ ២០២០ នេះ​កម្ពុជា​រំពឹង​ថា ការ​នាំ​ចេញ​ឆ្នាំ​នេះ​នឹង​កើន​ខ្ពស់​ជាង​ឆ្នាំមុន​បន្តិច។

លោក​ថ្លែង​ថា៖ ​«ខ្ញុំ​នៅ​តែ​មាន​​សុទិដ្ឋិនិយម​ចំពោះ​ទីផ្សារ​នាំចេញ​អង្ករ​កម្ពុជា​ថា នឹង​មាន​កំណើន​ជា​បន្ត​បន្ទាប់​នៅ​ពេល​ខាង​មុខ ប៉ុន្តែ​ទោះ​ជា​យ៉ាង​ណា​អ្វីៗ​ក៏​អាស្រ័យ​ទៅលើ​ការបញ្ជាទិញ​ផង​ដែរ​»។

លោក សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា បាន​និយាយ​​ថា ចិន ជា​ទីផ្សារ​នាំចេញ​ឈាន​មុខ​គេ​របស់​​កម្ពុជា​ ខណៈ​ការបញ្ជា​ទិញ​​មាន​ដំណើរការ​កាន់​តែ​​ប្រសើរ​។

លោក​បន្ត​ថា ដោយសារ​តែ​ប្រទេស​ចិន​ជាទីផ្សារ​មាន​សក្តានុពល​ខ្ពស់​ ហេតុ​នេះ​ថ្នាក់​ដឹក​នាំ​សហព័ន្ធ​ស្រូវ​អង្ករ​កម្ពុជា ក៏​ដូចជា​អាជ្ញាធរ​ពាក់ព័ន្ធ​តែង​ទៅ​ចូលរួម​ក្នុង​កម្មវិធី​នានា​នៅ​ប្រទេស​ចិន​ដើម្បី​ធ្វើការ​ផ្សព្វផ្សាយ​ពី​គុណភាព និង​ភាពឈ្ងុយ​ឆ្ងាញ់​របស់​អង្ករ​កម្ពុជា​។

លោក​និយាយ​ថា៖ «​ជាមួយ​នឹង​​កំណើន​ជា​បន្តបន្ទាប់​នេះ យើង​សង្ឃឹម​ថា នៅ​ពេល​ខាងមុខ​ប្រទេស​ចិន ​នឹង​បញ្ជា​ទិញ​អង្ករ​ពី​កម្ពុជា​កាន់តែ​កើនឡើង​ច្រើន​បន្ថែម​ទៀត​»​។

ទាក់ទង​នឹង​កំណើន​នាំចេញ​អង្ករ​​ក្នុង​រយៈពេល​ ១១ ​ខែ​នេះ លោក សារ៉ន បាន​ឱ្យ​ដឹង​​​ថា ​តាម​សម្ទុះ​នៃ​ការនាំ​ចេញ​អង្ករ​កម្ពុជា​នៅ​​​ឆ្នាំ​នេះ​អាច​មាន​កំណើន​ក្នុង​រង្វង់ ១៧ ​ភាគរយ​ ខណៈ​កាលពី​ដើម​ឆ្នាំ​ត្រូវ​បាន​រំពឹង​ថា នឹង​កើន​ ២០ ​ភាគរយ។ ​

លោក​ពន្យល់​ថា ការ​ទម្លាក់​អត្រា​​កំណើន​នៅ​ពេល​នេះ គឺ​ដោយសារ​​វិស័យ​ស្រូវ​អង្ករ​កម្ពុជា​នារយៈពេល​ចុងក្រោយ​នេះ​បាន​ជួប​នឹង​បញ្ហា​មួយ​ចំនួន​ដូចជា គ្រោះ​ទឹកជំនន់ រាំងស្ងួត និង​ការដឹកជញ្ជូន ជា​ដើម។

ដោយឡែក​បើ​យោង​តាម​ទិន្នន័យ​ពី​លោក វេង សាខុន គិត​ត្រឹម​ថ្ងៃ​ទី​ ៣០ ខែ​វិច្ឆិកា ការនាំ​ចេញ​ស្រូវ​តាម​បណ្តា​ច្រក​នៃ​ខេត្ត​ជាប់​ព្រំដែន​ប្រទេស​វៀតណាម​មាន​បរិមាណ​សរុប ១ ៧៧៧ ១០៧ តោន​។

លោក វេង សាខុន បាន​និយាយ​ថា ការនាំចេញ​ស្រូវ​ក្នុង​បរិមាណ​នេះ​គឺ​មិន​ប៉ះពាល់​ដល់​បរិមាណ​នៃ​ការនាំ​ចេញ​អង្ករ​ទៅ​កាន់​ទីផ្សារ​អន្តរជាតិ​ទេ ព្រោះ​កម្ពុជា​តែង​មាន​នៅ​សល់​ស្រូវ។ ជាក់ស្តែង​កាលពី​ឆ្នាំ​មុន កម្ពុជា​មាន​នៅ​សល់​ស្រូវ​រហូត​ដល់​ជាង ៥,៧៦ ​លាន​តោន​។

លោក​បន្ត​ថា៖ ​«​កាលពី​ឆ្នាំ​មុន កម្ពុជា​បាន​នាំ​ចេញ​ស្រូវ​ទៅ​ប្រទេស​វៀតណាម​ប្រមាណ​ជាង​ ២ ​លាន​តោន​ ខណៈ​សល់​ពី​នោះ​គេ​​​យក​ទៅ​កែច្នៃ​ជា​ចំណី​សត្វ និង​​ការប្រើប្រាស់​ផ្សេងៗ​មួយ​​ចំនួន​ទៀត​​»៕LA

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ