ក្រុងហាណូយៈ ទីផ្សារមូលបត្ររបស់វៀតណាមមានឱកាសច្រើនក្នុងការដំឡើងឋានៈពីទីផ្សារកំពុងស្ទុះងើបខ្លាំង (frontier market) ទៅជាទីផ្សារកំពុងអភិវឌ្ឍន៍ខ្លាំង (emerging market) នៅឆ្នាំនេះ។
កាលពីខែមិថុនា ឆ្នាំមុន ផ្សារមូលបត្ររបស់វៀតណាមបានខកខានមិនបានដាក់បញ្ចូលទៅក្នុងបញ្ជីឃ្លាំមើលរបស់ក្រុមហ៊ុនអាមេរិក Morgan Stanley Capital International (MSCI) ដែលផ្តល់ព័ត៌មានលម្អិត និងឧបករណ៍ដែលជំរុញដល់ការការស្រាវជ្រាវសម្រាប់វិនិយោគិនជាស្ថាប័ន។
ការដាក់ចូលក្នុងបញ្ជីនេះ គឺដើម្បីទទួលបានការពិនិត្យមើលឡើងវិញសម្រាប់ការចាត់ចំណាត់ថ្នាក់ជាថ្មីដែលអាចនឹងដំឡើងឋានៈរបស់ទីផ្សារមូលបត្រវៀតណាមពីទីផ្សារកំពុងស្ទុះងើបខ្លាំងទៅជាទីផ្សារកំពុងអភិវឌ្ឍន៍ខ្លាំង។
ទោះយ៉ាងណាក្តី បើយោងតាមរបាយការណ៍ថ្មីៗបំផុតដែលចេញផ្សាយដោយគណៈកម្មការមូលបត្ររដ្ឋ (SSC) របស់វៀតណាម ប្រទេសនេះស្ទើរតែបំពេញបានទាំងស្រុងទៅតាមលក្ខខណ្ឌតម្រូវផ្នែកបរិមាណរបស់ក្រុមហ៊ុន MSCI សម្រាប់ការដាក់បញ្ចូលទៅក្នុងបញ្ជីឃ្លាំមើលសម្រាប់ការចាត់ចំណាត់ថ្នាក់ជាថ្មីដែលអាចកើតមានឡើងពេលអនាគត។
ប្រទេស វៀតណាម មានភាគហ៊ុនចំនួន ៧ ដែលបានបំពេញបានទៅតាមលក្ខខណ្ឌតម្រូវផ្នែកបរិមាណរបស់ក្រុមហ៊ុន MSCI ទាក់ទងនឹងទំហំ និងសន្ទនីយភាពទីផ្សារ។
វៀតណាមមានភាគហ៊ុនចំនួន ២២ ដែលបំពេញបានតាមលក្ខខណ្ឌតម្រូវរបស់ក្រុមហ៊ុន MSCI ក្នុងផ្នែកមូលធនីយកម្មដែលមានចំនួន ១,៥៩ ពាន់លានដុល្លារអាមេរិក រួមមានទាំងធនាគារពាណិជ្ជអាស៊ី (ACB) ក្រុមហ៊ុនផលិតទឹកដោះគោ Vinamilk (VNM) ក្រុមហ៊ុនអភិវឌ្ឍន៍អចលនទ្រព្យ Vingroup (VIC) ក្រុមហ៊ុន Masan Group (MSN) និងក្រុមហ៊ុនផលិតដែកថែប Hoa Phat Group (HPG)។
ពាក់ព័ន្ធនឹងមូលធនីយកម្មរបស់ភាគហ៊ុនដែលកំពុងចរាចរណ៍ ក្រុមហ៊ុន MSCI បានកំណត់ស្តង់ដាមួយដែលមាន ៧៩៧ ហ៊ុនសម្រាប់ទីផ្សារកំពុងអភិវឌ្ឍន៍ខ្លាំង។ ប្រទេស វៀតណាម មានសហគ្រាសចំនួន ១៦ ដែលបំពេញបានតាមស្តង់ដានេះ រួមមានទាំងក្រុមហ៊ុន ACB ក្រុមហ៊ុន Saigon Hanoi Commercial Joint Stock Bank។
វៀតណាមមានសហគ្រាសចំនួន ២៧៦ ដែលមានសន្ទនីយភាពភាគហ៊ុនស្មើនឹង ១៥ ភាគរយនៃអនុបាតតម្លៃជួញដូរប្រចាំឆ្នាំ (ATVR) ដែលជាលក្ខណវិនិច្ឆ័យមួយផងដែរដែលកំណត់ដោយក្រុមហ៊ុន MSCI សម្រាប់ទីផ្សារកំពុងអភិវឌ្ឍន៍ខ្លាំង។
គណៈកម្មការមូលបត្ររដ្ឋបានឲ្យដឹងថា ជាសំខាន់ ទីផ្សារមូលបត្ររបស់វៀតណាមបានបំពេញបានទៅតាមលក្ខខណ្ឌតម្រូវផ្នែកបរិមាណរបស់ក្រុមហ៊ុន MSCI ទាក់ទងនឹងទំហំ និងសន្ទនីយភាពទីផ្សារ។
ទោះយ៉ាងណាក្តី គណៈកម្មការនេះបានបន្ថែមថា វាជាលក្ខខណ្ឌតម្រូវផ្នែកគុណភាព ដែលជាកត្តាសម្រេចចិត្តសម្រាប់ការដំឡើងឋានៈទីផ្សារ ដែលមិនមែនតែសម្រាប់ការដំឡើងឋានៈដែលធ្វើដោយក្រុមហ៊ុន MSCI ប៉ុណ្ណោះទេ ប៉ុន្តែវាក៏ជាលក្ខខណ្ឌតម្រូវរបស់ក្រុមហ៊ុនចាត់ចំណាត់ថ្នាក់ដទៃទៀតដូចជា FTSE និង S&P ផងដែរ៕ ANN/PS