ក្រុងប៉េកាំងៈ សមាគមក្រុមហ៊ុនផលិតរថយន្តចិន (CAAM) បានបង្ហាញនៅពេលថ្មីៗនេះថា ការលក់រថយន្តអគ្គិសនី (EV) សុទ្ធរបស់ប្រទេស ចិន បានកើនដល់ ២៧៨ ០០០ គ្រឿងក្នុងពេល ៤ ខែដំបូងឆ្នាំ ២០១៩ កើន ៦៥,២ ភាគរយ ធៀបនឹងឆ្នាំ ២០១៨។
កំណើនទីផ្សារ ភាពចាស់ទុំនៃចង្វាក់ឧស្សាហកម្ម និងកំណើនការវិនិយោគ ទាំងអស់នេះសុទ្ធតែចង្អុលបង្ហាញថា វិស័យរថយន្តអគ្គិសនីបានក្លាយជាចំណុចផ្តោតមួយនៃឧស្សាហកម្មដែលកំពុងស្ទុះងើបខ្លាំងបែបយុទ្ធសាស្រ្តរបស់ប្រទេស ចិន។
ប្រទេស ចិន បានអនុវត្តផែនការឥណទានទ្វេ ដែលវាយតម្លៃឥណទានរបស់ក្រុមហ៊ុនផលិតរថយន្ត ដោយផ្អែកលើមូលដ្ឋាននៃការប្រើប្រាស់ប្រេងឥន្ធនៈរបស់រថយន្តម៉ាស៊ីនសាំង និងរថយន្តថាមពលថ្មី (NEV) ដែលបានដើរតួនាទីយ៉ាងសំខាន់នៅក្នុងការសម្របសម្រួលដល់ការអភិវឌ្ឍរថយន្តថាមពលថ្មី។
យោងតាមលោក Miao Wei រដ្ឋមន្ត្រីក្រសួងឧស្សាហកម្ម និងព័ត៌មានវិទ្យា (MIIT) របស់ប្រទេស ចិន រថយន្តថាមពលថ្មីសរុបចំនួន ១,២៥ លានគ្រឿង ត្រូវបានលក់នៅក្នុងប្រទេស ចិន កាលពីឆ្នាំមុន កើនឡើង ៦១,៧ ភាគរយធៀបនឹងឆ្នាំ ២០១៧ ដោយនៅក្នុងចំណោមនោះរថយន្ត ៩៨៤ ០០០ គ្រឿងដំណើរការទាំងស្រុងដោយអគ្គិសនី។
លោក Wang Chuanfu ប្រធានក្រុមហ៊ុនផលិតរថយន្ត BYD បានឲ្យដឹងថា រថយន្តអគ្គិសនីមានចំណែកទីផ្សារតែ ១ ភាគរយប៉ុណ្ណោះក្នុងប្រទេស ចិន នៅឆ្នាំ ២០១៥ តែបានកើនឡើងដល់ ៤ ភាគរយ នៅឆ្នាំ ២០១៨។ ការរីកចម្រើនដ៏រហ័សបែបនេះជាលក្ខណៈដ៏ពិសេសមួយនៃទីផ្សាររថយន្តអគ្គិសនីចិន៕ People''s Daily/LA