ភ្នំពេញៈ ទោះបីវិបត្តិសេដ្ឋកិច្ចពិភពលោក និងជំងឺកូវីដ១៩ កំពុងរីករាលដាលក៏ដោយ ក៏ការនាំចេញកៅស៊ូកម្ពុជាទៅកាន់ទីផ្សារអន្តរជាតិក្នុងខែមេសាមិនបានធ្លាក់ចុះនោះទេ ដោយការនាំចេញមានជាង ២២ លានដុល្លារ កើនជាង ៦ ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើតាមក្រសួងកសិកម្ម រុក្ខាប្រមាញ់ និងនេសាទ។
របាយការណ៍ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា នៅក្នុងមេសា ឆ្នាំ ២០២០ កម្ពុជានាំចេញកៅស៊ូទៅលក់នៅទីផ្សារអន្តរជាតិបានចំនួន ១៨ ៦០៤ តោន កើន ២១,៧៣ ភាគរយធៀបនឹងខែមេសា ឆ្នាំ ២០១៩ ដែលមានចំនួន ១៥ ២៨២ តោន។ ចំណែកកៅស៊ូនាំចេញក្នុងខែមេសា ឆ្នាំ ២០២០ មានតម្លៃជាមធ្យម ១ ១៩២ ដុល្លារ ក្នុង ១ តោន ធ្លាក់ចុះ ១២,៦៧ ភាគរយធៀបនឹងខែមេសា ឆ្នាំ ២០១៩ ដែលមានតម្លៃ ១ ៣៦៥ ដុល្លារ។
យោងតាមរបាយការណ៍ខាងលើនៅខែមេសា ឆ្នាំ ២០២០ ទឹកប្រាក់ដែលកម្ពុជាទទួលបានពីការនាំចេញកៅស៊ូមានតម្លៃ ២២,១៧ លានដុល្លារកើន ៦,៣ ភាគរយ ពីចំនួន ២០,៨៥ លានដុល្លារកាលពីខែមេសា ឆ្នាំ ២០១៩។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃអង្គារថា ទោះបីវិបត្តិសេដ្ឋកិច្ចពិភពលោក និងការរីករាលដាលនៃជំងឺកូវីដ ១៩ កំពុងមានឥទ្ធិពលលើការនាំចេញស្ទើរគ្រប់ផលិតផលនៅលើពិភពលោកក៏ដោយ ប៉ុន្តែបរិមាណនៃការនាំចេញកៅស៊ូរបស់កម្ពុជាក្នុងខែមេសាមិនបានធ្លាក់ចុះទេ ដោយមានកំណើនប្រមាណ ៥៨ ភាគរយបើធៀបនឹងខែមីនា ឆ្នាំ ២០២០ និងជិត ២២ ភាគរយបើធៀបនឹងរយៈពេលដូចគ្នាឆ្នាំមុន។ លោកបន្តថា តម្លៃកៅស៊ូនៅទីផ្សារអន្តរជាតិនៅពេលនេះមិនមានភាពល្អប្រសើរទេ។
លោកបាននិយាយថា៖ «ទឹកប្រាក់នាំចេញកើនឡើងកាលពីខែមេសាគឺបានមកពីបរិមាណផលិតកម្មរបស់យើងកើនឡើងខ្ពស់»។
យោងតាមការសិក្សារបស់អ្នកជំនាញតម្រូវការកៅស៊ូនៅលើទីផ្សារអន្តរជាតិ នឹងបន្តកើនឡើងរហូតដល់ឆ្នាំ ២០២៤-២០២៥។ នេះបើតាមការអះអាងរបស់លោក សុផា។
លោកបន្ថែមថា ខណៈបច្ចុប្បន្នផ្ទៃដីកៅស៊ូប្រមូលផលកំពុងកើនឡើង ដូច្នេះលោករំពឹងថា ការនាំចេញនឹងបន្តមានកំណើនរហូតដល់ឆ្នាំ ២០២៥។
កាលពីដើមខែមីនា រដ្ឋាភិបាលបានសម្រេចកាត់បន្ថយពន្ធលើឧស្សាហកម្មកៅស៊ូ ដោយសារការធ្លាក់ចុះតម្លៃលើពិភពលោកដែលរងផលប៉ះពាល់យ៉ាងខ្លាំងដោយសារតែការរីករាលដាលជំងឺកូវីដ១៩។
អនុក្រឹត្យដែលចុះហត្ថលេខាដោយលោកនាយករដ្ឋមន្ដ្រី ហ៊ុន សែន កាលពីថ្ងៃទី ៨ ខែមីនា បានបញ្ជាក់ថា បើតម្លៃនាំចេញកៅស៊ូស្ថិតនៅក្រោម ១ ៤០០ ដុល្លារ ក្នុង ១ តោន រដ្ឋនឹងមិនតម្រូវឲ្យបង់ពន្ធទេ ប៉ុន្តែបើតម្លៃចាប់ពី ១ ៤០០ ទៅ ៣ ៥០០ ដុល្លារ ក្នុង ១ តោននឹងត្រូវបង់ពន្ធពី ២៥ ទៅ ២០០ ដុល្លារ។
យោងតាមរបាយការណ៍របស់ Research and Markets តម្លៃកៅស៊ូក្រែបនឹងបន្តធ្លាក់ថ្លៃចាប់ពីឆ្នាំនេះរហូតដល់ឆ្នាំ ២០២១។
របាយការណ៍នេះបានឲ្យដឹងទៀតថា ប្រទេសចិន បានប្រើប្រាស់កៅស៊ូច្រើនជាងគេលើសកលលោកដោយមានរហូត ៤១ ភាគរយ នៃផលិតផលសរុបលើពិភពលោក។
កាលពីឆ្នាំ ២០១៩ កម្ពុជាបាននាំចេញកៅស៊ូ ២៨២ ០៧១ តោន ដែលមានតម្លៃ ៣៧៧ លានដុល្លារ កើនឡើង ៣០ ភាគរយបើធៀបនឹងឆ្នាំ ២០១៨។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។ ទិន្នន័យនេះបង្ហាញថា ផ្ទៃដីដាំកៅស៊ូនៅកម្ពុជាមានសរុប ៤០៦ ១៤២ ហិកតា ក្នុងនោះកៅស៊ូជាង ២៤៧ ១១៤ ហិកតាត្រូវបានប្រមូលផល។
លោក សុផា បានអះអាងថា៖ «ផ្ទៃដីដាំកៅស៊ូឆ្នាំ ២០២០ មិនមានការប្រែប្រួលច្រើនទេបើធៀបនឹងឆ្នាំ ២០១៩ ប៉ុន្តែផ្ទៃដីប្រមូលផលឆ្នាំនេះបានកើនដល់ជាង ៣១ ម៉ឺនហិកតា»៕ LA