.jpg)
អ្នកវិនិយោគចិនជាច្រើនបានចូលមកបណ្តាក់ទុនលើសំណង់អគារនៅកម្ពុជា។ ហេង ជីវ័ន
ភ្នំពេញៈ ប្រទេស ចិន នៅតែជាប្រភពទុនវិនិយោគបរទេស (FDI) នាំមុខគេនៅកម្ពុជាក្នុងរយៈពេលប៉ុន្មានឆ្នាំជាប់ៗគ្នានេះ ដែលភាគច្រើនជាការវិនិយោគលើវិស័យកាត់ដេរ សំណង់ ទេសចរណ៍ និងថាមពលអគ្គិសនី។ នេះបើតាមក្រសួងពាណិជ្ជកម្មកម្ពុជា។
ក្នុងវេទិកាថ្នាក់ដឹកនាំធុរកិច្ចចិន-អាស៊ាន ដែលបានរៀបចំឡើងនៅទីក្រុងណាននីង ខេត្តក្វាងស៊ី ប្រទេស ចិន កាលពីថ្ងៃសៅរ៍លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានឲ្យដឹងថា លំហូរទុនវិនិយោគរបស់ចិន មកប្រទេស កម្ពុជា បានបន្តកើនឡើងពីមួយឆ្នាំទៅមួយឆ្នាំ ដែលក្នុងនោះគ្រាន់តែឆ្នាំ ២០១៨ លំហូរទុនវិនិយោគចិនមកកម្ពុជាមានប្រមាណ ៣,៥ ពាន់លានដុល្លារ។
លោក សូរស័ក្តិ បានឲ្យដឹងថា ភាពល្អប្រសើរនៃកិច្ចសហប្រតិបត្តិការទ្វេភាគីកម្ពុជា-ចិន បានជំរុញឲ្យសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ ការទូត និងទំនាក់ទំនងរវាងប្រជាជនប្រទេសទាំង ២ មានភាពរីកចម្រើនជាលំដាប់។
លោកថ្លែងថា៖ «ប្រទេស ចិន ឈរក្នុងលំដាប់លេខរៀងទី ១ នៃការវិនិយោគនៅកម្ពុជាដែលកាលពីឆ្នាំ ២០១៨ ចិនមាន ៣ ៥៩៤ លានដុល្លារ»។
តាមលោករដ្ឋមន្ត្រី ទំហំពាណិជ្ជកម្មទ្វេភាគីនៃប្រទេសទាំង ២ កាលពីឆ្នាំមុនមានតម្លៃប្រមាណ ៦ ៤៥៧ លានដុល្លារ។
ក្នុងរយៈពេល ៥ ឆ្នាំជាប់គ្នាពីឆ្នាំ ២០១៣ ដល់ឆ្នាំ ២០១៧ ប្រទេសចិនគឺជាវិនិយោគិនផ្ទាល់ពីបរទេសឈានមុខគេរបស់ប្រទេសកម្ពុជាជាមួយនឹងទុនវិនិយោគចំនួន ៥,៣ ពាន់លានដុល្លារ ឬប្រហែល ១ ពាន់លានដុល្លារប្រចាំឆ្នាំ។ នេះបើយោងតាមតួលេខបានពីក្រុមប្រឹក្សាអភិវឌ្ឍន៍កម្ពុជា (CDC) កាលពីឆ្នាំមុន។
យោងតាមការរកឃើញដែលបានធ្វើឡើងកាលពីឆ្នាំ ២០១៦ ដោយធនាគារជាតិនៃកម្ពុជា (NBC) និងវិទ្យាស្ថានជាតិស្ថិតិ (NIS) នៅចន្លោះឆ្នាំ ១៩៩៤ និងឆ្នាំ ២០១៤ ប្រទេស ចិន គឺជាវិនិយោគិនធំជាងគេនៅកម្ពុជា ដែលមានរហូតដល់ ៤៤ ភាគរយ នៃការវិនិយោគផ្ទាល់បរទេស ( FDI) មានតម្លៃ ១៩,២ ពាន់លានដុល្លារ។
ទិន្នន័យបានបង្ហាញថា ការវិនិយោគសរុបនៅកម្ពុជាបានកើនឡើងជិត ២ ដងដល់ចំនួន ៦,២ ពាន់លានដុល្លារកាលពីឆ្នាំ ២០១៧ ដោយកើនឡើងពី ៣,៦ ពាន់លានដុល្លារកាលពីឆ្នាំ ២០១៦។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ការចូលមកបណ្តាក់ទុនរបស់ជនជាតិចិននៅកម្ពុជាចាប់ផ្តើមមានសម្ទុះខ្លាំងតាំងពីអំឡុងឆ្នាំ ២០១៦ មកដែលការបណ្តាក់ទុននេះបានផ្តល់ផលប្រយោជន៍យ៉ាងច្រើនសម្រាប់កម្ពុជា ពិសេសការបង្កើតការងារថ្មីៗរាប់ពាន់កន្លែង។
លោកបន្តថា បច្ចុប្បន្នកម្ពុជាបាននិងកំពុងរៀបចំកែសម្រួលបែបបទនីតិវិធីស្មុគស្មាញ និងការចំណាយផ្សេងៗដើម្បីទាក់ទាញវិនិយោគិនបរទេសឲ្យចូលមកបណ្តាក់ទុននៅកម្ពុជា។
លោកថ្លែងថា៖ «ជាមួយនឹងគោលនយោបាយខ្សែក្រវាត់មួយ ផ្លូវមួយ របស់រដ្ឋាភិបាលចិន ខ្ញុំមានជំនឿថា កំណើននៃការចូលមកបណ្តាក់ទុនពីសំណាក់វិនិយោគិនចិននៅកម្ពុជានឹងបន្តកើនឡើងជាបន្តទៀតក្នុងឆ្នាំ ២០១៩ នេះ»។
បើយោងតាមលោក ប៉ាន សូរស័ក្តិ វិនិយោគិនចិនបានចូលមកបណ្តាក់ទុននៅកម្ពុជាលើវិស័យសំខាន់ៗមានដូចជា កាត់ដេរ សំណង់ អគ្គិសនី រោងម៉ាស៊ីនកិនស្រូវ កសិឧស្សាហកម្មរ៉ែ និងថាមពល និងធ្យូងថ្ម និងវិស័យទេសចរណ៍។
ក្នុងចំណោមវិស័យសំខាន់ៗវិស័យសំណង់បានកំពុងទាក់ទាញការវិនិយោគពីចិនច្រើនជាងគេដែលមានតម្លៃរាប់រយលានដុល្លារនៅក្នុងគម្រោងនីមួយៗ។
លោក ជីវ ស៊ីវផេង អ្នកគ្រប់គ្រងទូទៅនៃសមាគមអ្នកសាងសង់កម្ពុជាបានឲ្យដឹងថា ការរីកចម្រើនវិស័យសំណង់របស់កម្ពុជាពេលនេះគឺបានពីការរួមចំណែកភាគច្រើនពីការវិនិយោគរបស់ចិន។
លោកបន្តថា៖ «ជាមួយនឹងស្ថិរភាពនយោបាយ កំណើនសេដ្ឋកិច្ច វិស័យសំណង់នឹងបន្តរីកចម្រើនរឹងមាំយូរទៅមុខទៀត»។ លោកបន្ថែមថា៖ «ការចូលមកបណ្តាក់ទុនពីសំណាក់វិនិយោគិនចិន មិនត្រឹមតែជួយបង្កើតការងារថ្មីៗប៉ុណ្ណោះទេ តែវាថែមទាំងជួយឲ្យរដ្ឋាភិបាលទទួលបានប្រាក់ចំណូលពីការបង់ពន្ធផងដែរ»។
បើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាចាប់ពីដើមឆ្នាំ ២០១៩ មកមានគម្រោងវិនិយោគរបស់វិនិយោគិនចិនជាច្រើនដែលត្រូវបានអនុម័ត ដែលភាគច្រើនជារោងចក្រកាត់ដេរ ស្បែកជើង កាបូប រោងចក្រផលិតអគ្គិសនីដោយប្រើធ្យូងថ្ម និងសំណង់ធំៗជាដើម៕ LA
