ភ្នំពេញៈ ទុនវិនិយោគសរុបក្នុងវិស័យសំណង់កើនឡើងយ៉ាងខ្លាំងនៅឆមាសទី១ ឆ្នាំនេះរហូតដល់ជាង ១០០ ភាគរយធៀបនឹងរយៈពេលដូចគ្នាកាលពីឆ្នាំមុន។
មន្ដ្រី និងអ្នករកស៊ីនៅក្នុងឧស្សាហកម្មនេះបាននិយាយថា ស្ថិរភាពនយោបាយ និងកំណើនសេដ្ឋកិច្ចរឹងមាំគឺជាគ្រឿងជំរុញដ៏សំខាន់សម្រាប់កំណើននេះ។
ទិន្នន័យចុងក្រោយពីលោក អ៊ឹម ឈុនលឹម រដ្ឋមន្រ្តីក្រសួង រៀបចំដែនដីនគរូបនីយកម្ម និង សំណង់ដែលបានបង្ហាញក្នុងពិធីបើកពិព័រណ៍ Cambuild ឆ្នាំ ២០១៣ នៅ កោះពេជ្រ កាលពីថ្ងៃម្សិល បង្ហាញថា ទុនវិនិយោគសរុបបានកើនដល់ជិត ២ ពាន់លានដុល្លារក្នុងរយៈពេលនេះធៀបនឹង ៨៧០ ដុល្លារក្នុងរយៈពេលដូចគ្នាកាលពីឆ្នាំមុន។
លោកបានលើកឡើងថា៖ «វាត្រូវបានគេកត់សម្គាល់ថា តម្លៃនៃការវិនិយោគសំណង់បានកើនឡើងយ៉ាងខ្លាំងក្នុងរយៈពេលប៉ុន្មានឆ្នាំថ្មីៗនេះ។ នេះមានន័យថា យើងមានបរិយាកាសវិនិយោគដ៏ល្អ និងសន្តិភាពពេញលេញសម្រាប់វិនិយោគិន»។
លោកបន្តថា រហូតមកដល់ពេលនេះមានក្រុមហ៊ុនសំណង់ប្រហែល ៥៧១ ក្រុមហ៊ុនកំពុង ប្រតិបត្តិការយ៉ាងសកម្មនៅក្នុងការអភិវឌ្ឍវិស័យនេះនៅកម្ពុជា។
លោក ពុង ឃាវសែ ប្រធានសមាគមអ្នកសាងសង់កម្ពុជា (CCA) និយាយថា វិស័យនេះកំពុងទទួលបានកំណើនយ៉ាងខ្លាំងទាំងក្នុងគម្រោង អភិវឌ្ឍន៍ និងកាន់តែទំនើប តាមកម្រិតស្ដង់ដារជាមួយនឹងមានការចាក់បញ្ចូលមូលធនយ៉ាងច្រើន ទាំងប្រភពក្រៅប្រទេស និងក្នុងស្រុក។
លោកបន្តថា៖ «នៅទីក្រុងភ្នំពេញយើងអាចមើលឃើញអគារខ្ពស់ៗដ៏ទំនើបគ្រប់ប្រភេទទាំងអស់ដោយមានឧបករណ៍បច្ចេកទេសមានគុណភាពខ្ពស់បើប្រៀបធៀបជាមួយនឹងបណ្ដាប្រទេសអភិវឌ្ឍន៍ជាច្រើននៅលើពិភពលោក»។
កាលពីថ្ងៃសុក្រមុន ក្រុមហ៊ុន Hong Kong Land មានមូលដ្ឋាននៅទីក្រុង ហុងកុង បានបុកគ្រឹះកសាងអគារមានកម្ពស់ ២០ ជាន់នៅកណ្ដាលទីក្រុង ភ្នំពេញ ក្នុងតម្លៃ ១០០ លានដុល្លារ ហើយក្រុមហ៊ុន Booyoung Group មានមូលដ្ឋាននៅប្រទេស កូរ៉េខាងត្បូង ក៏បានចាប់ផ្ដើមសាងសង់អគារតម្លៃជាង ១,១ ពាន់លានដុល្លារនៅតាមមហាវិថី សហព័ន្ធរុស្ស៊ី ក្នុងខណ្ឌ ឫស្សីកែវ កាលពីខែ មេសា។
ឆ្នាំ ២០១២ កម្ពុជាអនុម័តគម្រោងវិនិយោគខាងសំណង់ ២,១ ពាន់លានដុល្លារ ធៀបនឹង ១,២ ពាន់លានដុល្លារពីឆ្នាំ ២០១១៕ PB
