.jpg)
ក្រុមហ៊ុន Harim Corporation ដែលចែកចាយសាច់មាន់ និងម្ហូបអាហារមានមូលដ្ឋាននៅកូរ៉េខាងត្បូង បោះទុនវិនិយោគបង្កើតរោងចក្រចំណីសត្វនៅកម្ពុជា។ រូបថត AFP
ភ្នំពេញ: ឯកអគ្គរាជទូតកម្ពុជាប្រចាំប្រទេសកូរ៉េខាងត្បូងលោក ឡុង ឌីម៉ង់ បានស្នើឱ្យក្រុមហ៊ុន Harim Corporation ដែលចែកចាយសាច់មាន់ និងម្ហូបអាហារមានមូលដ្ឋាននៅកូរ៉េខាងត្បូង បោះទុនវិនិយោគបង្កើតរោងចក្រចំណីសត្វនៅកម្ពុជា។
លោក ឡុង ឌីម៉ង់ បានឱ្យដឹងថា ក្រុមហ៊ុននេះជាក្រុមហ៊ុនចែកចាយសាច់មាន់លំដាប់ទី១ ដែលបានកាន់កាប់ចំណែកទីផ្សារ ៧០ ភាគរយនៅកូរ៉េ ហើយក្រុមហ៊ុននេះបានផ្គត់ផ្គង់សាច់មាន់ជាមធ្យម ៦៥ ម៉ឺនក្បាលក្នុង ១ ថ្ងៃ និង ១,៣ លានក្បាលក្នុង ១ ថ្ងៃ នៅក្នុងរដូវក្តៅក្នុងទីផ្សារប្រទេសនេះ។
លោកបន្តថា៖ «ខ្ញុំបានស្នើសុំឱ្យគាត់សម្លឹងមើលការវិនិយោគបង្កើតរោងចក្រ ផលិតចំណីសត្វនៅក្នុងប្រទេសកម្ពុជាដើម្បីនាំចេញមកផ្គត់ផ្គង់ឱ្យរោងចក្រចិញ្ចឹមមាន់របស់គាត់នៅកូរ៉េ»។
លោកបានឱ្យដឹងថា ក្រុមហ៊ុននេះបានបោះទុនយ៉ាងច្រើនលើបច្ចេកវិទ្យា និងការរក្សាគុណភាពសាច់មាន់ឱ្យនៅស្រស់ល្អ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាសម្តែងការស្វាគមន៍ចំពោះការស្នើឱ្យក្រុមហ៊ុនធំៗលំដាប់អន្តរជាតិមកវិនិយោគនៅកម្ពុជាលើការផលិតចំណី ហើយបើបាននាំចេញសាច់មាន់កាន់តែប្រសើរ។
លោកនិយាយថា៖ «ការចិញ្ចឹមមាន់មិនសូវផ្តល់អំណោយផលនោះទេ ព្រោះការចិញ្ចឹមមាន់យកសាច់ផ្គត់ផ្គង់លើទីផ្សារក្នុងស្រុកយើងវាលើសតម្រូវការហើយ ប៉ុន្តែប្រសិនបើគាត់វិនិយោគកសិដ្ឋានចិញ្ចឹមមាន់ដើម្បីផលិតនាំចេញទៅកូរ៉េវិញវាជារឿងល្អដែលនឹងបង្កើតឱកាសការងារឱ្យប្រជាពលរដ្ឋ និងបង្កើតជាទីផ្សារសម្រាប់វត្ថុធាតុដើមសម្រាប់ផលិតជាចំណីសត្វ»។
បើតាមលោក ពៅ តម្រូវការទីផ្សារសាច់មាន់នៅក្នុងទីផ្សារក្នុងស្រុកជាមធ្យមចន្លោះពី ១២០ ០០០ ក្បាល ទៅ ១៣០ ០០០ ក្បាល ក្នុង ១ ថ្ងៃ ប៉ុន្តែការផ្គត់ផ្គង់សាច់មាន់លើសតម្រូវការរហូតដល់ ១៥០ ០០០ ក្បាល ដោយមិនគិតពីការនាំចូលសាច់មាន់ពីប្រទេសជិតខាងនោះទេ។
យោងតាមទិន្នន័យពីក្រសួងកសិកម្ម ប្រជាជនកម្ពុជាបានបរិភោគសាច់ចំនួន ២៩០ ០០០ តោន កាលពីឆ្នាំ ២០១៩ ខណៈការផ្គត់ផ្គង់មានចំនួន ២៤០ ០០០ តោនប៉ុណ្ណោះ។ ក្នុងចំណោមបរិមាណសាច់សរុប សាច់មាន់ និងទាមានចំណែក ២០ ភាគរយ សាច់គោ ២៧ ភាគរយ និងសាច់ជ្រូក ៥៧ ភាគរយ។
ក្រសួងកសិកម្ម មានផែនការជំរុញការផលិតសាច់ពាហនៈចំនួន ៣៣៥ ០០០ តោន ក្នុង ឆ្នាំ ២០៣០ ដើម្បីបំពេញតម្រូវការក្នុងស្រុក និងកាត់បន្ថយការនាំចូល៕ LA
