.jpg)
ភ្ញៀវទេសចរកម្ពុជាម្នាក់ បានធ្វើដំណើរកម្សាន្តនៅ Wildhaus ប្រទេស Switzerland។ រូបថត ចេង សុខហ័ង
ភ្នំពេញៈ ចំនួនប្រជាជនកម្ពុជាដែលធ្វើដំណើរកម្សាន្តទៅក្រៅប្រទេសបានបន្តកើនឡើងជាប្រចាំឆ្នាំ ដែលបានកើនដល់ជិត ២ លាននាក់កាលពីឆ្នាំមុន ជាអ្វីដែលអ្នកជំនាញក្នុងឧស្សាហកម្មទេសចរណ៍លើកឡើងថា ដោយសារ ការផ្លាស់ប្តូរទម្លាប់នៃការចាយវាយទៅលើសេវាកម្សាន្តរបស់ប្រជាជនថ្នាក់កណ្តាល។
របាយការណ៍ឆ្នាំ ២០១៨ របស់ក្រសួងទេសចរណ៍កម្ពុជា បង្ហាញថា ចំនួនប្រជាជនកម្ពុជា ដែលធ្វើដំណើរកម្សាន្តទៅក្រៅប្រទេសកើនឡើងដល់ ១,៨១ លាននាក់ នៅអំឡុងខែមករា ដល់ខែវិច្ឆិកា កាលពីឆ្នាំ ២០១៨ កើនឡើង ១២ ភាគរយធៀបនឹងរយៈពេលមួយឆ្នាំ ២០១៧ ដែលមានចំនួន ១,៦ លាននាក់។ កាលពីឆ្នាំ ២០១៦ ចំនួនប្រជាជនកម្ពុជាដែលធ្វើដំណើរទៅកម្សាន្តទៅក្រៅប្រទេសមានចំនួន ១,៣ លាននាក់។
លោកស្រី ឆៃ ស៊ីវលីន ប្រធានសមាគមភ្នាក់ងារទេសចរណ៍កម្ពុជា (CATA) បានឲ្យដឹងកាលពីថ្ងៃអង្គារថា និន្នាការដែលប្រជាជនកម្ពុជាធ្វើដំណើរទៅក្រៅប្រទេសកំពុងកើនឡើង ដោយសារតែកំណើនប្រជាជនមានប្រាក់ចំណូលមធ្យម ហើយប្រជាជនកម្ពុជាកាន់តែច្រើនកំពុងទទួលបានប្រាក់ចំណូលខ្ពស់ និងកម្រិតជីវភាពកាន់តែប្រសើរ។
លោកស្រីថ្លែងថា៖ «នៅពេលប្រជាជនអាចបំពេញតម្រូវការមូលដ្ឋានរបស់ពួកគេដូចជា អាហារ និងការចំណាយប្រចាំថ្ងៃ បន្ទាប់មកពួកគេហ៊ានចំណាយបន្ថែមទៀតលើសកម្មភាពកម្សាន្ដ»។ លោកស្រីបន្ថែមថា ប្រជាជនចង់មើលឃើញការអភិវឌ្ឍ របស់បណ្ដាប្រទេសផ្សេងទៀត និងរៀនសូត្រពីការអភិវឌ្ឍនេះ។
លោកស្រីបញ្ជាក់ថា៖ «នៅពេលប្រជាជនមានការធ្វើដំណើរទៅក្រៅប្រទេស ពួកគេអាចអង្កេតការអភិវឌ្ឍ នៅក្នុងប្រទេសទាំងនោះពួកគេអង្កេតគំនិតពាណិជ្ជកម្មថ្មីៗ ពួកគេអាចរៀនសូត្រពីវាដើម្បីបង្កើនប្រាក់ចំណូលរបស់ពួកគេ»។
លោកស្រី ស៊ីវលីន ឲ្យដឹងថា ប្រជាជនកម្ពុជាភាគច្រើនដែលធ្វើដំណើរទៅប្រទេសក្រៅ គឺតាមរយៈទីភ្នាក់ងារទេសចរណ៍។ ពួកគេភាគច្រើនទៅប្រទេសនានានៅតំបន់អាស៊ាន ដូចជា ថៃ ម៉ាឡេស៊ី និងសិង្ហបុរី ដែលពួកគេនឹងចំណាយប្រាក់ប្រហែលពី ៥០០ ដុល្លារទៅ ៧០០ ដុល្លារក្នុងដំណើរកម្សាន្ត ១ លើក។
លោកស្រីបន្ថែមថា មាននិន្នាការកើនឡើងរហ័សនៃភ្ញៀវទេសចរទៅក្រៅប្រទេស ទៅចិន កូរ៉េខាងត្បូង ជប៉ុន ឌូបៃ និងបណ្ដាប្រទេសអភិវឌ្ឍន៍ផ្សេងទៀតនៅអឺរ៉ុបផងដែរ។
លោកស្រី ស្រ៊ាត មុំសុភា ស្ថាបនិកក្រុមហ៊ុន Sophiya Travel & Tours បានឲ្យដឹងថា ក្រុមហ៊ុនរបស់លោកស្រីរៀបចំការធ្វើដំណើរកាន់តែច្រើនឡើងៗ សម្រាប់ផែនការកម្សាន្តរបស់ប្រជាជនកម្ពុជាទៅក្រៅប្រទេស ហើយពួកគេភាគច្រើនចង់ធ្វើដំណើរជាក្រុមធំៗ។
ដោយមានកំណើនប្រាក់ចំណូល និងការពេញនិយមប្រព័ន្ធផ្សព្វផ្សាយសង្គម លោកស្រី សុភា បានកត់សម្គាល់ថា របៀបរស់នៅរបស់ប្រជាជនកម្ពុជាត្រូវបានផ្លាស់ប្តូរ ហើយប្រជាជនកាន់តែច្រើនចង់បង្អួតពីរបៀបរស់នៅរបស់ពួកគេតាមរយៈការបង្ហោះទីកន្លែងដែលពួកគេទស្សនានៅលើប្រព័ន្ធផ្សព្វផ្សាយសង្គម។
លោកស្រីបន្ថែមថា និន្នាការថ្មី ជំរុញឲ្យប្រជាជនធ្វើតាមគ្នា និងបបួលអ្នកផ្សេងទៀតទៅស្វែងយល់ផ្នែកផ្សេងទៀតរបស់ពិភពលោក។
លោកស្រីបញ្ជាក់ថា៖ «សម្រាប់ពាណិជ្ជករ ពួកគេទៅក្រៅប្រទេសកាន់តែច្រើន ពួកគេទៅប្រទេសផ្សេងៗច្រើន ពួកគេឃើញនិន្នាការអាជីវកម្មកាន់តែច្រើនផងដែរ។ ពួកគេអង្កេតគំនិតថ្មី និងយកមកអនុវត្តចំពោះអាជីវកម្មផ្ទាល់ខ្លួនរបស់ពួកគេនៅក្នុងប្រទេស»។
លោក ស៊្រឺ ស្រេង បុគ្គលិកនៅក្រុមហ៊ុនឯកជននៅទីក្រុងភ្នំពេញបានគ្រោងនឹងទស្សនាប្រទេស ជប៉ុន នៅខែមីនា ឆ្នាំនេះ ជាមួយឪពុកលោក បន្ទាប់មកពួកគេនឹងទៅទស្សនាស្ទើរគ្រប់ប្រទេសទាំងអស់នៅអាស៊ាន។
លោកបញ្ជាក់ថា៖ «យើងមិនទាន់មាន អីខ្លាំងទេ តែយើងឲ្យតម្លៃដល់ការធ្វើដំណើរទៅក្រៅប្រទេស។ ជីវភាពយើង ក៏ល្អជាងមុនដែរ អ៊ីចឹងយើងមានលទ្ធភាពចំណាយឲ្យឪពុកម្តាយយើងដើរលេងកម្សាន្តនៅក្រៅប្រទេស»៕LA
