ភ្នំពេញៈ ស្ថានភាពចលាចលនយោបាយកាន់តែធ្ងន់ធ្ងរនៅ ប្រទេសថៃ នាពេលបច្ចុប្បន្ននេះមិនទាន់មានឥទ្ធិពលណាមួយមកលើវិស័យទេសចរណ៍ កម្ពុជា ឡើយ។
អ្នកជំនាញក្នុងវិស័យនេះបាននិយាយថា បើស្ថានភាពនេះនៅតែបន្តវានឹងជះឥទ្ធិពលទាំងវិជ្ជមាន និងអវិជ្ជមានដល់វិស័យទេសចរណ៍ កម្ពុជា។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ឲ្យដឹងថា ស្ថានភាពបច្ចុប្បន្ននឹងមិនជះឥទ្ធិពលអាក្រក់ខ្លាំងពេកទេមកលើចំនួនភ្ញៀវទេសចរអន្តរជាតិចូលទស្សនា កម្ពុជា ព្រោះលំហូរទេសចរអន្តរជាតិមិនមែនមានតែមកពី ប្រទេសថៃ មួយនោះទេ។ លោកថ្លែងថា៖ «វាអាចប៉ះពាល់តិចតួចតែមិនច្រើនពេកនោះទេ ព្រោះច្រកចូលមក កម្ពុជា មិនមែនមានតែថៃនោះទេ វាមាន វៀតណាម ឡាវ គូឡាឡាំពួ ហុងកុង ចិន និងប្រទេសផ្សេងទៀត»។
ទោះបីយ៉ាងនេះក្តីលោកអះអាងថា ស្ថានភាពបច្ចុប្បន្នអាចផ្តល់ប្រយោជន៍ដល់ កម្ពុជា ដោយសារតែភ្ញៀវត្រូវបង្វែរទិសមក កម្ពុជា។ លោកបានបន្តថា៖ «ភ្ញៀវដែលបានបង់លុយសម្រាប់កញ្ចប់ទេសចរទៅលេងនៅ ថៃ ហើយប្រតិបត្តិករទេសចរដែលជាអ្នកទទួលការកក់នោះមិនចង់បង្វិលប្រាក់ទៅអតិថិជនវិញទេ ដូច្នេះគាត់អាចបង្វែរតំបន់ទេសចរណ៍សម្រាប់ភ្ញៀវគាត់មកកាន់ កម្ពុជា វៀតណាម ឡាវ ឬ ម៉ាឡេស៊ី ជាដើម»។
កាសែត បាងកក ប៉ុស្តិ៍ កាលពីម្សិលមិញបានរាយការណ៍ថា ក្រុមហ៊ុនថាមពលហាងចែកចាយ និងសណ្ឋាគារកំពុងយកចិត្តទុកដាក់ខ្លាំងផ្នែកសន្តិសុខដើម្បីបង្ការហេតុការណ៍អាក្រក់ណាមួយដែលអាចកើតចេញពីបាតុកម្ម និងការផ្តាច់ចរន្តអគ្គិសនី ខណៈស្ថានទូតឥណ្ឌាបានចេញសេចក្តីប្រកាសឲ្យមានការប្រុងប្រយ័ត្នដល់ប្រជាជនឥណ្ឌាចំពោះសុវត្ថិភាពផ្ទាល់ខ្លួន។
បើទោះបីយ៉ាងនេះក្តីមន្ត្រីអះអាងថា មិនទាន់មានឃើញលំហូរទេសចរខ្លាំងពី ថៃ ចូលមកកម្ពុជាទេនៅពេលនេះ។
លោក ថោង ខុន រដ្ឋមន្ត្រីក្រសួងទេសចរណ៍ប្រាប់ ភ្នំពេញ ប៉ុស្តិ៍ កាលពីម្សិលមិញថា ទេសចរអន្តរជាតិចូលមកទស្សនា កម្ពុជា តាម ប្រទេសថៃ ស្ថិតក្នុងស្ថានភាពធម្មតា។ លោកបន្តថា៖ «យើងកំពុងតាមដានសភាពការណ៍នៅទីនោះ»។
លោក ហូ វណ្ឌី សហប្រធានក្រុមការងារអភិវឌ្ឍន៍វិស័យទេសចរណ៍បង្ហាញការបារម្ភថា ចំនួនភ្ញៀវទេសចរអន្តរជាតិមកទស្សនា កម្ពុជា អាចនឹងធ្លាក់ចុះបើស្ថានការណ៍ក្នុង ប្រទេសថៃ នៅតែអូសបន្លាយដោយសារតែ ៣០ ភាគរយនៃទេសចរអន្តរជាតិសរុបដែលកម្ពុជាទទួលបានគឺចូលមកតាម ថៃ។
លោកបន្តឲ្យដឹងថា ប្រតិបត្តិករទេសចររាប់រយក្នុង ប្រទេសថៃ កំពុងផ្ដល់សេវាកញ្ចប់ទេសចរណ៍ដែលរួមមានការមកទស្សនា កម្ពុជា និងបណ្ដាប្រទេសជិតខាងក្នុងតម្លៃសមរម្យហើយពួកគេមានជើងហោះហើរក្នុងតម្លៃថោកជាងការហោះហើរត្រង់មក កម្ពុជា»។ លោកបន្តថា៖ «បើភ្ញៀវទេសចរអន្តរជាតិមិនមក ថៃ ទេពួកគេក៏ប្រហែលជាមិនបានមកទស្សនាកម្ពុជាដែរ។ យើងមានក្រុមហ៊ុនអាកាសចរណ៍ជាង ២០ ពិតមែន ប៉ុន្តែជើងហោះហើរត្រង់ឆ្ពោះមក កម្ពុជា គឺនៅតែមានតម្លៃថ្លៃធៀបនឹង ប្រទេសថៃ ដែលជាកត្តាមួយរារាំងការសម្រេចចិត្តរបស់ភ្ញៀវទេសចរអន្តរជាតិចូលមក កម្ពុជា»៕ PB
