ភ្នំពេញៈ ភ្ញៀវទេសចរបរទេសមកដល់កម្ពុជានៅក្នុងរយៈពេល៥ខែដំបូងឆ្នាំនេះ បានកើនឡើងដល់១,៨លាននាក់ គឺកើនឡើង២០ភាគរយធៀបនឹងរយៈពេលដូចគ្នាកាលពីឆ្នាំទៅ ដែលភាគច្រើនមកពីតំបន់អាស៊ី។
លោក ហូ វណ្ណឌី សហប្រធានក្រុមការងារទេសចរណ៍បានថ្លែងថា ការទាក់ទាញដ៏សំខាន់សម្រាប់ទេសចរមកកម្ពុជាត្រូវបានរួមចំណែកតាមរយៈការបើកគោលនយោបាយ ពាណិជ្ជកម្ម ការវិនិយោគ និងទំនាក់ទំនងការទូតល្អជាមួយ នឹងបណ្ដាប្រទេសនានា។ លោកបន្តថា៖ «វាកំពុងឆ្លុះបញ្ចាំងពីសហប្រតិបត្តិការដ៏ល្អនិងកិច្ចខិតខំប្រឹងប្រែងរបស់រដ្ឋាភិបាល និង វិស័យឯកជនក្នុងការលើកកម្ពស់វិស័យទេសចរណ៍របស់កម្ពុជា»។
លោកលើកឡើងថា ភ្ញៀវទេសចរបរទេសរបស់យើងភាគច្រើនគឺមកពីតាមបណ្ដាប្រទេសក្នុងតំបន់ជាពិសេសតំបន់អាស៊ីដែលមានចំនួនប្រហែល៦០ភាគរយ។
ស្ថិតិថ្មីៗនេះបង្ហាញថា ភ្ញៀវទេសចរវៀតណាមកំពុងនាំមុខគេក្នុងអំឡុងពេលនេះដែលមានចំនួនសរុប៣៤២ ១១២នាក់បន្ទាប់មកគឺភ្ញៀវទេសចរកូរ៉េមានចំនួន ២១៥ ២៥៤នាក់និងភ្ញៀវទេសចរចិនមានចំនួន១៣១ ០៦០នាក់។ ការមកដល់តាមជើងហោះហើរ បានកើនឡើងគួរឲ្យកត់សម្គាល់ផងដែរនៅក្នុងរយៈពេលដូចគ្នានេះ ដែលមានចំនួនសរុបប្រហែល៤៩ភាគរយ ខណៈចំនួននៅសល់មកតាមផ្លូវគោកនិងផ្លូវទឹក។
របាយការណ៍មួយដែលបានធ្វើឡើងដោយវិទ្យាស្ថានស្រាវជ្រាវមួយឈានមុខគេដែលហៅថា CDRI បង្ហាញថាវិស័យទេសចរផ្ដល់ការងារផ្ទាល់ដល់មនុស្ស ៣៥០ ០០០នាក់ និងបន្ថែមប្រាក់ចំណូលកាន់តែច្រើន។ កាលពីឆ្នាំមុន វិស័យនេះនាំប្រាក់ចំណូលដល់សេដ្ឋកិច្ចរបស់កម្ពុជាប្រហែល២ពាន់លានដុល្លារ។
អ្នករកស៊ីក្នុងឧស្សាហកម្មនេះបានថ្លែងថា មានសញ្ញាថា វិស័យទេសចរណ៍កម្ពុជាកំពុងធ្វើពិពិធកម្មក្នុងការដាក់បញ្ចូលឆ្នេរសមុទ្រ និងទេសចរណ៍ធម្មជាតិដោយមានការអភិវឌ្ឍកោះជាច្រើនក្នុងការបើកឱកាសថ្មីៗនៅក្នុងវិស័យនេះ។លោក ហូ វណ្ណឌី បានលើកឡើងថា៖ «និន្នាការនេះនឹងបន្តកើនឡើង។ ប្រសិនបើបញ្ហានៅក្នុងសេដ្ឋកិច្ចប្រទេសលោកខាងលិចធ្វើឲ្យ ប្រសើរឡើងភ្ញៀវទេសចរកាន់តែច្រើនមកពីទីនោះនឹងកើនឡើងផងដែរ»៕
