.jpg)
ភ្ញៀវទេសចរថតរូបអនុស្សាវរីយ៍ផ្ទះជនជាតិ នៅក្នុងខេត្តរតនគិរី នាឱកាសពិធីបុណ្យចូលឆ្នាំចិន កាលពីថ្ងៃម្សិលមិញ។ សហការី
ភ្នំពេញៈ ចំនួនភ្ញៀវទេសចរដែលទៅទស្សនានៅតាមបណ្តាខេត្តភាគឦសានក្នុងឱកាសបុណ្យ ចូលឆ្នាំចិនបានបង្ហាញពីការកើនឡើង ខណៈខេត្តនៅជាប់មាត់សមុទ្រហាក់មិនសូវបង្ហាញពីសញ្ញាវិជ្ជមាននោះទេ។ នេះបើតាមអ្នកនៅក្នុងវិស័យទេសចរណ៍កាលពីថ្ងៃម្សិលមិញ។
លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បាននិយាយថា សម្រាប់រយៈពេល ៣ ថ្ងៃក្នុងឱកាសបុណ្យចូលឆ្នាំចិននេះ ខេត្តរតនគិរីទទួលបានភ្ញៀវទេសចរជាតិ និងអន្តរជាតិជាង ២ ម៉ឺននាក់ មានកំណើន ៨,១៩ ភាគរយ បើធៀបនឹងឆ្នាំមុន។
លោកថ្លែងថា៖ «កំណើនភ្ញៀវទេសចរនៅភូមិភាគឦសានដោយសារកម្ពុជាមានសន្តិសុខល្អ ប្រព័ន្ធផ្លូវគមនាគមន៍ កំណើនសេដ្ឋកិច្ច និងជាតំបន់ដែលមានធនធានធម្មជាតិស្រស់បំព្រង»។
លោកបានបញ្ជាក់ថា សន្តិភាព គឺជាកត្តាដ៏សំខាន់នៅក្នុងការជួយធ្វើឲ្យតំបន់ភូមិភាគឦសានមានកំណើនភ្ញៀវទេសចរជាបន្តបន្ទាប់។
របាយការណ៍របស់មន្ទីរទេសចរណ៍ខេត្តរតនគិរី បានឲ្យដឹងថា ក្នុងរយៈពេល ៣ ថ្ងៃនៃបុណ្យចូលឆ្នាំចិនឆ្នាំនេះ ខេត្តទទួលបានភ្ញៀវទេសចរសរុបចំនួន ២១ ៤១៥ នាក់ ក្នុងនោះភ្ញៀវជាតិមានចំនួន ២០ ៨៣៥ នាក់ និងអន្តរជាតិចំនួន ៥៨០ នាក់។
ដោយឡែកនៅក្នុងខេត្តមណ្ឌលគិរី លោក លីម វណ្ណឌី បុគ្គលិកផ្នែកទទួលភ្ញៀវនៅរមណីយដ្ឋាន Elephant Hill Resort បានប្រាប់ថា សម្រាប់អំឡុងពេលចូលឆ្នាំចិននេះ បន្ទប់ស្នាក់នៅរបស់ Elephant Hill Resort ត្រូវបានអតិថិជនកក់អស់តាំងជាយូរមកហើយ ដោយភាគច្រើនជាអ្នកមកពីភ្នំពេញ ហើយកក់ស្នាក់នៅរយៈពេល ១ យប់។ លោកបន្តថា៖ «ដោយសារជាតំបន់ទេសចរណ៍ធម្មជាតិ គឺនៅពេលមានបុណ្យម្តងៗកន្លែងរបស់ខ្ញុំមិនដែលមានបន្ទប់ទំនេរទេ»។
សម្រាប់កន្លែងស្នាក់នៅដទៃទៀតនៅក្នុងខេត្តមណ្ឌលគិរី លោក វណ្ណឌី អះអាងថា មានស្ថានភាពមិនខុសពីកន្លែងរបស់លោកទេ គឺមានភ្ញៀវពេញដូចគ្នា។សម្រាប់បន្ទប់ស្នាក់នៅរបស់ Elephant Hill Resort មានតម្លៃចាប់ពី ៨០-១២០ ដុល្លារក្នុង ១ យប់។
ខុសប្លែកពីតំបន់ភូមិភាគឦសាន ដែលមានភ្ញៀវធ្វើដំណើរទៅកម្សាន្តច្រើន ខេត្តមួយចំនួននៅតំបន់មាត់សមុទ្រ មិនបានបង្ហាញពីសញ្ញាកើនឡើងច្រើននោះទេ។
លោក សយ ស៊ីណុល ប្រធានមន្ទីរទេសចរណ៍ខេត្តកំពត កាលពីល្ងាចម្សិលមិញបានប្រាប់ថា ចំនួនភ្ញៀវ-ទេសចរដែលធ្វើដំណើរមកកម្សាន្តនៅខេត្តកំពតក្នុងឱកាសចូលឆ្នាំចិននេះនឹងមិនមានកំណើនខ្ពស់ទេ បើធៀបនឹងរយៈពេលដូចគ្នាឆ្នាំមុន។ កាលពីថ្ងៃចូលឆ្នាំទី ១ មានភ្ញៀវទេសចរប្រមាណជាង ២៧ ០០០ នាក់កើនជិត ២ ភាគរយប៉ុណ្ណោះ បើធៀបនឹងឆ្នាំមុន។ សម្រាប់ថ្ងៃទី២ មានកំណើនខ្ពស់គួរសមបើធៀបនឹងថ្ងៃទី១។
ប្រធានមន្ទីរទេសចរណ៍ខេត្តព្រះសីហនុ ដែលពោរពេញដោយជនជាតិចិន លោក តាំង សុចិត្រគ្រឹះស្នា បាននិយាយថា ចំនួនភ្ញៀវទេសចរក្នុងស្រុកដែលមកសម្រាកកម្សាន្តនៅខេត្តព្រះសីហនុនៅតែបង្ហាញពីការថយចុះ។ លោកអះអាងថា៖ «ភ្ញៀវទេសចរ [ជារួម] អាចមានកំណើនតិចតួច ព្រោះភ្ញៀវទេសចរក្នុងស្រុកធ្លាក់ចុះ»។
បុគ្គលិកសណ្ឋាគារ Grand Sihanouk Ville ដែលមានបន្ទប់ស្នាក់នៅចំនួន ៤០ ស្ថិតក្នុងខេត្តព្រះសីហនុបាននិយាយថា ដោយសារសណ្ឋាគារ តែងមានភ្ញៀវបរទេស ពិសេសជនជាតិចិនជួលពេញៗនោះ ដូច្នេះក្នុងពិធីបុណ្យចូលឆ្នាំចិននេះចំនួនអ្នកចូលស្នាក់នៅមិនមានការប្រែប្រួលទេ។
ក្នុងលក្ខខណ្ឌសុំមិនបញ្ចេញឈ្មោះកញ្ញាបញ្ជាក់ថា៖ «ទោះជាពេលចូលឆ្នាំ ឬថ្ងៃឈប់សម្រាកបុណ្យផ្សេងៗចំនួនភ្ញៀវដែលជួលបន្ទប់សណ្ឋាគារ Grand Sihanouk Ville មិនសូវមានការផ្លាស់ប្តូរទេក្នុងរយៈពេលប្រមាណ ១ ឆ្នាំចុងក្រោយនេះ។ ជាក់ស្តែងរយៈពេល ២ ថ្ងៃដំបូងក្នុងពិធីបុណ្យចូលឆ្នាំចិននេះសណ្ឋាគារ Grand Sihanouk Ville មិនមានភ្ញៀវក្នុងស្រុកចូលទៅស្នាក់នៅទេ»៕ LA
