.jpg)
កាបូបប្រើប្រាស់ពេលធ្វើដំណើរតាំងលក់កន្លងមកក្នុងហាងនៅរាជធានីភ្នំពេញ។ ភ្នំពេញប៉ុស្តិ៍
ភ្នំពេញៈ សមាគមរោងចក្រកាត់ដេរនៅកម្ពុជា (GMAC) បានជូនដំណឹងដល់អ្នកនាំចូល និងអ្នកបញ្ជាទិញផលិតផលធ្វើដំណើរពីប្រទេសកម្ពុជា ទៅអាមេរិកនឹងត្រូវជាប់កាតព្វកិច្ចបង់ពន្ធនាំចូលឡើងវិញ ដោយសារតែកម្មវិធីអនុគ្រោះពន្ធទូទៅ (GSP) របស់អាមេរិកបានផុតសុពលភាព បន្ទាប់បានផ្តល់ក្នុងឆ្នាំ ២០១៦ និងត្រូវរង់ចាំសភាអាមេរិកផ្ដល់សុពលភាពឡើងវិញក្នុងពេលឆាប់ៗខាងមុខនេះ។
យោងសេចក្ដីជូនដំណឹងពី GMAC ដែលបានចេញផ្សាយកាលពីថ្ងៃពុធថា កម្មវិធីអនុគ្រោះពន្ធទូទៅ (GSP) របស់អាមេរិកបានអស់សុពលភាពកាលពីថ្ងៃទី ៣១ ខែ ធ្នូ ឆ្នាំ ២០២០ ដោយសារតែការយឺតយ៉ាវក្នុងការអនុម័តច្បាប់ដើម្បីផ្ដល់សុពលភាពដល់កម្មវិធីនេះឡើងវិញដោយសភាអាមេរិក។
សេចក្ដីជូនដំណឹងនេះបន្តថា៖ «ការយឺតយ៉ាវនេះជាបញ្ហាមួយពាក់ព័ន្ធដល់ប្រទេស និងដែនដីចំនួន ១១៩ ដែលបានផលពីកម្មវិធីនេះ (កម្ពុជាជាប្រទេសមួយក្នុងចំណោមនោះដែរ) ប៉ុន្តែផលប៉ះពាល់ផ្ទាល់នឹងមានទៅលើអ្នកបញ្ជាទិញ និងអ្នកនាំចូលដែលត្រូវតម្រូវឲ្យបង់ពន្ធនាំចូល រហូតដល់កម្មវិធីនេះត្រូវបានផ្ដល់សុពលភាពឡើងវិញ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា បានប្រាប់ភ្នំពេញប៉ុស្ដិ៍កាលពីថ្ងៃពុធថា GSP របស់អាមេរិកបានអស់សុពលភាពចាប់ពីថ្ងៃទី ៣១ ខែ ធ្នូ ឆ្នាំ ២០២០។
លោកបន្តថា៖ «យើងបានជូនដំណឹងដល់សមាជិកទាំងអស់របស់យើងថា កម្មវិធីអនុគ្រោះពន្ធទូទៅរបស់អាមេរិកត្រូវផុតរលត់សុពលភាពនៅថ្ងៃទី ៣១ ខែ ធ្នូ ឆ្នាំ ២០២០ ដោយសារតែការយឺតយ៉ាវក្នុងការអនុម័តច្បាប់ដើម្បីផ្ដល់សុពលភាពដល់កម្មវិធីនេះឡើងវិញដោយសភាអាមេរិក។ ក្នុងអំឡុងពេលនេះអ្នកទិញនឹងបង់ពន្ធនាំចូល។
នៅពេលសភាអាមេរិកផ្ដល់សុពលភាពកម្មវិធីនេះឡើងវិញ អ្នកទិញអាចទាមទារប្រាក់ពន្ធដែលបានបង់ត្រឡប់ទៅវិញ។ ទោះយ៉ាងណា រឿងនេះមិនប៉ះពាល់ដល់ក្រុមហ៊ុនផលិតរបស់យើងនៅទីនេះទេ ដោយសារយើងនៅតែនាំចេញជាធម្មតា។
លោកថ្លែងថា៖ «ការផុតរលត់សុពលភាពកម្មវិធីអនុគ្រោះពន្ធទូទៅរបស់អាមេរិកមិនគ្រាន់តែប្រឈមដល់កម្ពុជាប៉ុណ្ណោះទេ ប៉ុន្តែថែមទាំងដល់ប្រទេស និងដែនដីចំនួន ១១៩ ដែលទទួលផលពីកម្មវិធីនេះផងដែរ។ យើងនឹងទទួលបានវិញនៅពេលណាសភាអាមេរិកផ្ដល់សុពលភាព»។
យោងការប្រកាសរបស់ការិយាល័យតំណាងពាណិជ្ជកម្មអាមេរិក ការបន្តស្របច្បាប់សម្រាប់កម្មវិធី GSP នេះត្រូវផុតកំណត់នៅថ្ងៃទី ៣១ ខែ ធ្នូ ឆ្នាំ ២០២០ (19 U.S.C.Section 2465)។ ជាលទ្ធផលការនាំចូលទៅអាមេរិកដែលមានសិទ្ធិទទួលបានការរួចពន្ធក្រោមប្រព័ន្ធ GSP រហូតមកដល់ពេលនេះគឺអាស្រ័យលើអត្រាពន្ធនៃទំនាក់ទំនងពាណិជ្ជកម្មជាធម្មតា (MFN) ជាទៀងទាត់។
សេចក្ដីប្រកាសនេះបន្តថា៖ «សភាអាមេរិកនឹងធ្វើការសម្រេចចិត្តថា តើត្រូវពន្យារការបន្ត GSP ជាថ្មីនៅពេលណា។ សមាជលើកទី ១១៧ កោះប្រជុំនៅថ្ងៃទី ៣ ខែមករា ឆ្នាំ ២០២១»។
លោក កាំង បានពន្យល់ថា កម្មវិធីអនុគ្រោះពន្ធទូទៅរបស់អាមេរិកត្រូវបានផ្ដល់ឲ្យដំបូងរយៈពេល ១០ ឆ្នាំ។ ចាប់តាំងពីពេលនោះមក កម្មវិធីនេះត្រូវផ្ដល់ឲ្យអនុវត្តជាបន្តបន្ទាប់ចំនួន ១៤ ដង ដែលជាទូទៅការផ្ដល់ទាំងនោះមានសុពលភាពពី ២ ទៅ ៣ ឆ្នាំម្តង។
លោកឲ្យដឹងថា ចាប់តាំងពីកម្ពុជាដែលជាប្រទេសមួយក្នុងចំណោមបណ្ដាប្រទេសជាច្រើនដែលទទួលបានការអនុគ្រោះពន្ធ លើផលិតផលធ្វើដំណើរពីអាមេរិកកាលពីឆ្នាំ ២០១៦ ចំនួននៃការនាំចេញ និងការវិនិយោគកំពុងកើនឡើងយ៉ាងខ្លាំងក្នុងរយៈពេលជាច្រើនឆ្នាំនេះ។
លោកបន្ត៖ «យើងទទួលបានកំណើននៃការនាំចេញលើផលិតផលធ្វើដំណើរយ៉ាងខ្លាំងពី ៥០ លានដុល្លារ កាលពីឆ្នាំ ២០១៦ ដល់ប្រហែល ១ ពាន់លានដុល្លារនៅពេលនេះ»។
ផលិតផលធ្វើដំណើរដែលរួចពន្ធក្រោមប្រព័ន្ធ GSP មានដូចជា វ៉ាលិស កាបូបស្ពាយ កាបូបយួរដៃ និងកាបូបលុយស្ថិតក្រោម GSP៕ LA
