The Phnom Penh Post Search

Search form




Logo of Phnom Penh Post newspaper Phnom Penh Post - ទំនិញ​ដឹក​ឆ្លងកាត់​កំពង់ផែ​ស្វយ័ត​ភ្នំពេញ​កើន​ប្រហែល​២២​ភាគរយ

ទំនិញ​ដឹក​ឆ្លងកាត់​កំពង់ផែ​ស្វយ័ត​ភ្នំពេញ​កើន​ប្រហែល​២២​ភាគរយ

ទំនិញ​ដឹក​ឆ្លងកាត់​កំពង់ផែ​ស្វយ័ត​ភ្នំពេញ​កើន​ប្រហែល​២២​ភាគរយ

131021_12
ទិដ្ឋភាពកំពង់ផែស្វយ័តក្រុងភ្នំពេញនាពេលកន្លងមក ភ្នំពេញ ប៉ុស្តិ៍

ភ្នំពេញៈ ទិន្នន័យ​ចុងក្រោយ​ដែល​ទទួល​បាន​ពី​កំពង់ផែ​ស្វយ័ត​ភ្នំពេញ​(PPAP) បាន​បង្ហាញ​កាលពី​សប្ដាហ៍​មុន​ថា ការ​ដឹកជញ្ជូន​ទំនិញ​ឆ្លងកាត់​តាម​កំពង់ផែ​នេះ​ដែល​ជា​កំពង់ផែ​រដ្ឋ​ធំ​ទី​ពីរ​បន្ទាប់ពី​កំពង់ផែ​សមុទ្រ​ទឹកជ្រៅ​ក្រុង​ព្រះសីហនុ​បាន​កើនឡើង​យ៉ាង​ខ្លាំង​ក្នុង​រយៈពេល ៩​ខែ​ដំបូង​ក្នុង​ឆ្នាំ​នេះ​ពោល​គឺ​ប្រហែល ២២​ភាគរយ​ធៀប​នឹង​រយៈពេល​ដូចគ្នា​កាលពី​ឆ្នាំ​មុន។

មន្ដ្រី​កំពង់ផែ​ស្វយ័ត​ក្រុង​ភ្នំពេញ​បាន​ថ្លែង​ថា​អត្រា​កំណើន​នេះ​ទទួល​បាន​ដោយសារ​ការ​កើនឡើង​សកម្មភាព​នាំ​ចេញ​និង​នាំ​ចូល​សម្លៀកបំពាក់​កសិកម្ម​និង​សម្ភារ​សំណង់។

ទិន្នន័យ​របស់​កំពង់ផែ​PPAP បាន​បង្ហាញថា​នៅក្នុង​រយៈពេល​៩​ខែ​ដំបូង​នៅ​ឆ្នាំ​២០១៣​នេះ​ចំនួន​កុងតឺន័រ​ប្រហែល​៨៥ ១៨៨ ទូ (TEU) ត្រូវ​បាន​នាំ​ចេញ​និង​នាំ​ចូល​តាមរយៈ​កំពង់ផែ​នេះ​ធៀប​នឹង​កុងតឺន័រ​ចំនួន ៧០ ០៧៩ ទូ​នៅក្នុង​រយៈពេល​ដូចគ្នា​កាលពី​ឆ្នាំ​មុន។

លោក​អៀង​វ៉េងស៊ុន​ប្រធាន​ផ្នែក​ពាណិជ្ជកម្ម​ប្រចាំ​កំពង់ផែ PPAP​បាន​ថ្លែង​ថា​៖ «​ការ​កើនឡើង​នេះ​គឺជា​ការ​ឆ្លើយតប​ទៅ​នឹង​កំណើន​សេដ្ឋកិច្ច​ក្នុង​រយៈពេល​នេះ​ដោយសារ​តែ​កំណើន​ក្នុង​ការ​នាំ​ចេញ​សម្លៀកបំពាក់​និង​ផលិតផល​កសិកម្ម​»។​លោក​បន្ថែម​ថា​៖ «​ហើយ​ចំណត​ផែ​ថ្មី​របស់​យើង​ដែល​ទើប​នឹង​បើក​ដំណើរការ​កំពុង​ដើរតួ​នាទី​ដ៏​សំខាន់​ក្នុង​ការ​ឆ្លើយតប​ទៅ​នឹង​កំណើន​ចរាចរណ៍​ទំនិញ​ពេល​នេះ​ដោយសារ​តែ​យើង​បាន​ព្យាករ​ថា​កំពង់ផែ​​ដែល​មាន​ស្រាប់​មិន​អាច​ដោះស្រាយ​បាន​»។

លោក​បាន​ថ្លែង​ថា​ភាគច្រើន​នៃ​ផលិតផល​នាំ​ចូល​តាមរយៈ​កំពង់ផែ PPAP គឺជា​សម្ភារ​សំណង់​ទំនិញ​ប្រើប្រាស់​វត្ថុ​ធាតុដើម​ក្នុង​វិស័យ​កាត់ដេរ​ផលិតផល​អេឡិចត្រូនិក រថយន្ត​មួយ​ចំនួន​ដែល​នាំ​ចូល​មកពី​ប្រទេស​ចិន​និង​ប្រទេស​ក្នុង​តំបន់​អាស៊ាន​មួយ​ចំនួន​ខណៈ​ផលិតផល​នាំ​ចេញ​ភាគច្រើន​ជា​ផលិតផល​កសិកម្ម​ដូចជា​អង្ករ​និង​ផលិតផល​កាត់ដេរ​សម្រេច​ដែល​នាំ​ចេញ​ទៅ​សហភាព​អឺរ៉ុប​អាមេរិក​ចិន​ហ្វីលីពីន​។ល។

លោក​បាន​លើក​ឡើង​ថា​៖ «​ផ្អែកលើ​ចរាចរណ៍​ទំនិញ​ខ្ញុំ​យល់​ថា​ទំហំ​នៃ​ផលិតផល​នាំ​ចូល​កំពុង​មាន​តុល្យភាព​ជាមួយ​ការ​នាំចេញ​នេះ​បញ្ជាក់​ថា​ផ្នែក​ផលិតកម្ម​របស់​យើង​កំពុង​ដើរ​លើ​ផ្លូវ​ត្រូវ​នៅ​ពេល​នេះ​»។

មូលនិធិ​រូបិយវត្ថុ​អន្តរជាតិ ថ្មី​ៗ​នេះ​បាន​បង្កើន​ការ​ព្យាករ​កំណើន​ឆ្នាំ​២០១៣​របស់​ខ្លួន​សម្រាប់​កម្ពុជា​ពី​អត្រា ៦,៧​ភាគរយ​ដែល​បាន​ព្យាករ​កាលពី​ខែ​មេសា​ដល់​៧​ភាគរយ។​ក្នុង​ឯកសារ​ចុងក្រោយ​របស់​ធនាគារ​អភិវឌ្ឍន៍​អាស៊ី ធនាគារ​មួយ​នេះ​បាន​រក្សា​ការ​ព្យាករ​កំណើន​សេដ្ឋកិច្ច​របស់​ខ្លួន​សម្រាប់​កម្ពុជា​ក្នុង​អត្រា​៧,២​ភាគរយ។

កំពង់ផែ PPAP បាន​ចំណាយ​ថវិកា​ជាង​២៨​លាន​ដុល្លារអាមេរិក​សម្រាប់​ការ​សាងសង់​ចំណត​ផែ​ថ្មី ដោយ​ទទួល​បាន​ហិរញ្ញវត្ថុ​ពី​រដ្ឋាភិបាល​ចិន។ ចំណង​ផែ​ថ្មី​ដែល​មាន​ទីតាំង​នៅ​ស្រុក​គៀនស្វាយ​ខេត្ត​កណ្ដាល​ចម្ងាយ​៣០​គីឡូម៉ែត្រ​ពី​កំពង់ផែ​ដែល​មាន​ស្រាប់​មួយ​នៅ​ទីក្រុង​ភ្នំពេញ ត្រូវ​បាន​បើក​សម្ពោធ​ដាក់​ដំណើរការ​កាលពី​ខែ​មករា ឆ្នាំ​នេះ​ហើយ​អាច​មាន​លទ្ធភាព​ផ្ទុក​កុងតឺន័រ​បាន​ចំនួន​១២​ពាន់​ទូ​ក្នុង​មួយ​ឆ្នាំ​នៅ​ជំហាន​ដំបូង​នៃ​ការ​អភិវឌ្ឍ​ខណៈ​កំពង់ផែ​ចាស់​អាច​ផ្ទុក​កុងតឺន័រ​បាន​ជាង​៧​ពាន់​ទូ។

បច្ចុប្បន្ន​កំពង់ផែ​ស្វយ័ត​ក្រុង​ភ្នំពេញ​កំពុង​សិក្សា និង​ស្វែងរក​ដៃគូ​ឯកជន​ដើម្បី​ដំឡើង​ឧបករណ៍​ដែល​មាន​បច្ចេកវិទ្យា​ខ្ពស់​ឧបករណ៍​ស្ទូច​ឃ្លាំង​ចំណត​ផែ​ថ្មី​សម្រាប់​ដំណាក់កាល​ទី​ពីរ​នៃ​ការ​អភិវឌ្ឍ​ដូច្នេះ​កំពង់ផែ​នេះ​អាច​ផ្ទុក​កុងតឺន័រ​បាន​៣​សែន​ទូ​នៅក្នុង​ពេល​អនាគត៕ PB

អត្ថបទគួរចាប់អារម្មណ៍