ទីក្រុងវ៉ាស៊ីនតោនៈ អតិថិជនអាមេរិកកំពុងមានអារម្មណ៍ជឿជាក់គួរឲ្យភ្ញាក់ផ្អើលនៅក្នុងខែមិថុនានេះ ខណៈរដ្ឋាភិបាលបានចាប់ផ្ដើមកាត់បន្ថយការបិទប្រទេសដោយសារជំងឺកូវីដ ១៩ និងកម្មករគ្មានការងារធ្វើមួយចំនួនកំពុងវិលត្រឡប់ទៅធ្វើការងារពួកគេឡើងវិញ។ នេះបើយោងតាមការស្ទង់មតិចេញផ្សាយកាលពីថ្ងៃសុក្រ។
សន្ទស្សន៍ទំនុកចិត្តអតិថិជនដែលស្រាវជ្រាវដោយសាកលវិទ្យាល័យ Michigan បានកើនឡើងដល់ ៧៨,៩ ពីចំនួន ៧២,៣ កាលពីខែឧសភា ដែលប្រសើរខ្លាំងជាងក្រុមសេដ្ឋវិទូព្យាករក្នុងពេលកន្លងមក។
លោក Richard Curtin ប្រធានសេដ្ឋវិទូនៃការស្ទង់មតិអតិថិជនបានថ្លែងថា៖ «ទំនុកចិត្តអតិថិជនបានបង្ហាញពីការកើនឡើងប្រចាំខែលើកទី ២ កាលពីដើមខែមិថុនា»។
សន្ទស្សន៍លក្ខខណ្ឌសេដ្ឋកិច្ចបានកើនឡើងដល់ ៨៧,៨ ភាគរយ ធៀបទៅនឹង ៨២,៣ ភាគរយ កាលពីខែឧសភា ខណៈដែលការរំពឹងទុករបស់អតិថិជនបានកើនឡើងជាង ៧ ពិន្ទុដល់ ៧៣,១ ភាគរយ។
ប្រទេសដែលមានសេដ្ឋកិច្ចឈានមុខគេរបស់ពិភពលោកមួយនេះកំពុងចាប់ផ្ដើមដំណើរការការបើកឡើងវិញរបស់ខ្លួន ដោយមានរដ្ឋជាច្រើនបានបន្ធូរបន្ថយការរឹតត្បិតដែលដាក់កាលពីពាក់កណ្ដាលខែមីនា ដើម្បីទប់ស្កាត់ការរីករាលដាលជំងឺកូវីដ១៩ ដែលបានបណ្ដាលឲ្យមានការកាត់បន្ថយការងាររាប់ម៉ឺនកន្លែង និងធ្វើឲ្យមនុស្សស្លាប់ជាង ១១,៥ ម៉ឺននាក់។
ការបើកដំណើរការឡើងវិញ និងកម្មវិធីជំនួយរបស់រដ្ឋាភិបាលសម្រាប់ក្រុមហ៊ុនខ្នាតតូចត្រូវបានកោតសរសើរ ជាមួយនឹងការបន្ថែមការងារថ្មីចំនួន ២,៥ លានកន្លែង កាលពីខែឧសភា និងការបន្ទាបអត្រា អ្នកគ្មានការងារធ្វើមកនៅត្រឹម ១៣,៣ ភាគរយ៕ LA