The Phnom Penh Post Search

Search form




Logo of Phnom Penh Post newspaper Phnom Penh Post - ទំហំ​ប្រាក់​រៀល​ក្នុង​សេដ្ឋកិច្ច​នៅ​តែ​តូច ធៀប​នឹង​ដុល្លារ

ទំហំ​ប្រាក់​រៀល​ក្នុង​សេដ្ឋកិច្ច​នៅ​តែ​តូច ធៀប​នឹង​ដុល្លារ

Content image - Phnom Penh Post
អាជីវករប្តូរប្រាក់កំពុងរាប់លុយ​ដុល្លារ​ឲ្យ​អតិថិជន​នៅកន្លែងប្តូរប្រាក់មួយកន្លែងក្នុងទីក្រុងភ្នំពេញ​នាពេលកន្លងមក​។ ភ្នំពេញ ប៉ុស្តិ៍

ទំហំ​ប្រាក់​រៀល​ក្នុង​សេដ្ឋកិច្ច​នៅ​តែ​តូច ធៀប​នឹង​ដុល្លារ

ភ្នំពេញៈ ការ​ប្រើប្រាស់​ប្រាក់​រៀល​នៅ​ក្នុង​សកម្មភាព​សេដ្ឋកិច្ច​បាន​បង្ហាញ​ពី​ការ​កើន​ឡើង​ក្នុង​ចំណោម​អ្នក​ប្រើប្រាស់​ជា​លក្ខណៈ​គ្រួសារ និង​សហគ្រាស ជា​ពិសេស​​ការ​ទូទាត់​ខ្នាត​តូច បើ​ទោះ​​​ជា​​ចំណែក​​​រូបិយប័ណ្ណ​ជាតិ​នេះ​​​នៅ​ក្នុង​សេដ្ឋកិច្ច​នៅ​តែ​មាន​ទំហំ​​​​តូច​នៅ​ឡើយ​ធៀប​នឹង​ដុល្លារ​​​។ នេះ​បើ​​​តាម​លទ្ធផល​ពី​ការ​អង្កេត​ថ្មី​មួយ។

ទន្ទឹម​នេះ​ការ​ប្រើប្រាស់​ប្រាក់​​ដុល្លារ​នៅ​ក្នុង​សកម្មភាព​សេដ្ឋកិច្ច​ក៏​បាន​កើន​ឡើង​ខ្លាំង​ផង​ដែរ ដែល​ធ្វើ​ឲ្យ​ចំណែក​នៃ​ការ​ប្រើប្រាស់​ប្រាក់​រៀល​ធៀប​នឹង​ទំហំ​សេដ្ឋកិច្ច​នៅ​តែ​តូច​ ដោយ​​មាន​ប្រមាណ ​១០ ​ភាគរយ​។ ​

ការ​អង្កេត​ជុំ​ទី​២​ បង្ហាញ​ថា ​លទ្ធផល​ស្ដីពី​ការ​ប្រើប្រាស់​ប្រាក់​រៀល​នៅ​ក្នុង​ប្រទេស ​កម្ពុជា​ ដែល​អង្កេត​ពី​ឥរិយាបថ​នៃ​ការ​ប្រើប្រាស់​រូបិយប័ណ្ណ​ក្នុង​ចំណោម​គ្រួសារ​ ២ ២​៦៤ ​និង​សហគ្រាស​ ៨៥៦ ​ចាប់​ពី​ឆ្នាំ ​២០១៤ ដល់​ឆ្នាំ ​២០១៧ ​ប្រាក់​រៀល​ខ្មែរ​ត្រូវ​បាន​ប្រើប្រាស់​ភាគ​ច្រើន​ក្នុង​ចំណោម​​ប្រជាជន​នៅ​តំបន់​ជនបទ​ ខណៈ​វា​កំពុង​ចាប់​ផ្ដើម​កើន​ឡើង​ជា​បន្ត​បន្ទាប់​សម្រាប់​ក្រុមហ៊ុន​​របស់​​កម្ពុជា​។​

ប៉ុន្តែ​គ្រឹះស្ថាន​ហិរញ្ញវត្ថុ ​ជា​ពិសេស​​ធនាគារ​ពាណិជ្ជ​ នៅ​តែ​កំពុង​ផ្ដល់​កម្ចី​ជា​ប្រាក់​ដុល្លារ​អាមេរិក​ ទោះ​បី​ជា​មាន​និន្នាការ​កំណើន​កម្ចី​ជា​ប្រាក់​រៀល​​ក្នុង​ចំណោម​គ្រឹះស្ថាន​មីក្រូ​ហិរញ្ញវត្ថុ​ក៏​ដោយ​។​

ថ្លែង​​​ក្នុង​ការ​បិទ​សិក្ខាសាលា​កាល​ពី​ម្សិលមិញ ​លោកស្រី ​នាវ ​ចន្ទ័​ថាណា ​ទេសាភិបាល​រង​ធនាគារ​ជាតិ​នៃ​កម្ពុជា​ បាន​ឲ្យ​ដឹង​ថា ​ជម្រើស​រូបិយប័ណ្ណ ​កម្ចី​លក្ខណៈ​គ្រួសារ​ និង​ក្រុមហ៊ុន ​ភាគ​ច្រើន​ជា​ប្រាក់​ដុល្លារ ​និង​កម្ចី​​ធនាគារ​ និង​គ្រឹះស្ថាន​មីក្រូ​ដែល​ទទួល​ប្រាក់​បញ្ញើ​ភាគ​ច្រើន​នៅ​តែ​ជា​ប្រាក់​ដុល្លារ​អាមេរិក​។​

លោកស្រី​ថ្លែង​ថា៖​ «​នៅ​មាន​​ឱកាស​សម្រាប់​ការ​លើក​កម្ពស់​កម្ចី​ប្រាក់​រៀល​តាមរយៈ​ការ​លើក​ទឹក​ចិត្ត ​MFI​ ឲ្យ​ផ្ដល់​កម្ចី​ជា​ប្រាក់​រៀល​​។ ​ការ​ចូលរួម​យ៉ាង​រឹងមាំ​ពី​ធនាគារ ​និង​ MFI​ ក្នុង​ការ​ផ្ដល់​កម្ចី​ជា​ប្រាក់​រៀល​ គឺ​កាន់​តែ​មិន​​អាច​ខ្វះ​បាន​»។​

លោកស្រី​បន្ថែម​ថា ​មាន​ភ័ស្តុតាង​​នៃ​ការ​ផ្គូផ្គង​រូបិយប័ណ្ណ​ នៅ​​ក្នុង​គ្រួសារ​ និង​ក្រុមហ៊ុន ក្នុង​​នោះ​​ចំណែក​រូបិយប័ណ្ណ​បរទេស​ក្នុង​ប្រាក់​ចំណូល​របស់​គ្រួសារ​ ​ខ្ពស់​ជាង​ការ​ចំណាយ ​ខណៈ​ចំណែក​រូបិយប័ណ្ណ​បរទេស​​ជា​ប្រាក់​ចំណូល​​របស់​ក្រុមហ៊ុន​​​ទាប​ជាង​ការ​ចំណាយ​។​​

លោកស្រី​ ចន្ទ័ថាណា ​ឲ្យ​ដឹង​ថា ​គ្រួសារ​ដែល​មាន​ប្រាក់​ចំណូល​កាន់​តែ​ខ្ពស់​ភាគ​ច្រើន​ជា​ប្រាក់​ដុល្លារ ​ខណៈ​សហគ្រាស​ធំៗ​បង្ហាញ​ចំណែក​កាន់​តែ​ខ្ពស់​នៃ​រូបិយប័ណ្ណ​បរទេស​ ទាំង​ប្រាក់​ចំណូល ​និង​ការ​ចំណាយ​។

លោក​ Daiju Aiba​ ជា​អ្នក​ស្រាវជ្រាវ​របស់ ​JICA​ ដែល​ជា​ទី​ភ្នាក់ងារ​អភិវឌ្ឍន៍​របស់​ប្រទេស ​ជប៉ុន​ បាន​ឲ្យ​ដឹង​កាល​ពី​ម្សិលមិញ​ថា ​គ្រឹះស្ថាន​ហិរញ្ញវត្ថុ​ គឺ​ជា​អ្នក​ដើរ​តួនាទី​ដ៏​សំខាន់​នៅ​ក្នុង​ការ​លើក​កម្ពស់​ការ​ប្រើប្រាស់​ប្រាក់​រៀល​ខ្មែរ​នៅ​ក្នុង​ប្រទេស ​កម្ពុជា​។ ​លោក​បន្ថែម​ថា ​ធនាគារ​កណ្ដាល​គួរ​តែ​​ត្រួត​ពិនិត្យ​ដោយ​ប្រុងប្រយ័ត្ន​នូវ​កម្រិត​នៃ​ការ​ធ្វើ​ដុល្លា​រូបនីយកម្ម​​ក្នុង​តំបន់​ ដោយ​ការ​ប្រមូល​ទិន្នន័យ​លើ​កម្ចី និង​ប្រាក់​បញ្ញើ​នៅ​​កម្រិត​តំបន់។​

លោក​ថ្លែង​ថា​៖ «​ការ​ត្រួត​​ពិនិត្យ ​គឺ​ចាំបាច់​ក្នុង​ការ​រក​ឲ្យ​ឃើញ​ផល​ប៉ះពាល់​អវិជ្ជមាន ​នៃ​វិធាន​ការ​គោល​នយោបាយ​ និង​ដើម្បី​កាត់​បន្ថយ​ផល​ប៉ះពាល់​នេះ ​ទោះបី​ជា​ស្ថានការណ៍​ដែល​មិន​រំពឹង​ទុក​កើត​ឡើង​ក៏​ដោយ»​៕LA​

អត្ថបទគួរចាប់អារម្មណ៍