ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា និងជប៉ុនក្នុងរយៈពេល ១១ ខែ ឆ្នាំ ២០១៩ បានកើនឡើងប្រមាណជិត ១៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន Jetro។
ទិន្នន័យ Jetro បានឲ្យដឹងថាចាប់ពីដើមខែមករា ដល់ខែវិច្ឆិកា ឆ្នាំ ២០១៩ ការធ្វើពាណិជ្ជកម្មរវាងកម្ពុជា និងជប៉ុន មានតម្លៃសរុប ២,១០ ពាន់លានដុល្លារ កើនឡើង ១២,៩៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ដែលមានតម្លៃសរុប ១,៨៦ ពាន់លានដុល្លារ។
ទិន្នន័យបានឲ្យដឹងទៀតថា ការនាំទំនិញពីកម្ពុជាទៅប្រទេសជប៉ុនមានតម្លៃជិត ១,៦០ ពាន់លានដុល្លារ កើនឡើង ៧,៧ ភាគរយ ពីចំនួន ១,៤៨ ពាន់លានដុល្លារ កាលពីរយៈពេល ១១ ខែ ឆ្នាំ ២០១៨ ចំណែកការនាំទំនិញពីជប៉ុនមកកម្ពុជាមានតម្លៃ ៥០២,៨៨ លានដុល្លារ ខណៈកាលពីឆ្នាំ ២០១៨ មានតម្លៃ ៣៧៥,៧០ លានដុល្លារដោយកើនឡើង ៣៣,៩ ភាគរយ។
ដោយឡែកសម្រាប់ខែវិច្ឆិកា ឆ្នាំ ២០១៩ ការនាំទំនិញពីកម្ពុជាទៅប្រទេសជប៉ុនមានតម្លៃ ១៤២ ៥៧៦ ដុល្លារ កើនឡើង ៦,២ ភាគរយ ចំណែកការនាំទំនិញពីប្រទេសជប៉ុនមានតម្លៃ ៥៧ ៩៤៧ ដុល្លារ កើនឡើង ៣១,៥ ភាគរយ។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ភាពល្អប្រសើរនៃទំនាក់ទំនងបានធ្វើឲ្យទំហំពាណិជ្ជកម្មរវាងកម្ពុជា និងជប៉ុន កើនឡើងជារៀងរាល់ឆ្នាំ។ លោកបានបនុ្តថា កំណើននេះនឹងកាន់តែខ្ពស់បន្ថែមទៀតក្នុងឆ្នាំ ២០២០៕LA