ភ្នំពេញៈ ការធ្វើពាណិជ្ជកម្មទ្វេភាគីរវាងប្រទេសកម្ពុជា និងអាមេរិកនៅក្នុងរយៈពេល ៤ ខែដើមឆ្នាំ ២០២០ បានកើនឡើងជិត ៣០ ភាគរយបើធៀបទៅនឹងរយៈពេលដូចគ្នាកាលពីឆ្នាំ ២០១៩ ដោយសារការរីករាលដាលនៃជំងឺកូវីដ១៩ ហាក់មិនទាន់ប៉ះពាល់ខ្លាំងដល់ការនាំចេញនាំចូលនៅប៉ុន្មានខែដំបូងដើមឆ្នាំនេះ។ នេះបើយោងតាមទិន្នន័យពីការិយាល័យពាណិជ្ជកម្មអាមេរិក។
ទិន្នន័យពីការិយាល័យពាណិជ្ជកម្មអាមេរិកដែលចេញផ្សាយកាលពីចុងសប្តាហ៍មុនបង្ហាញថា ក្នុងរយៈពេល ៤ ខែដើមឆ្នាំ ២០២០ ទំហំពាណិជ្ជកម្មរវាងប្រទេសទាំង ២ មានតម្លៃសរុប ២ ១៣២,៤ លានដុល្លារ កើន ២៩,៣១ ភាគរយធៀបនឹងរយៈពេលដូចគ្នាឆ្នាំ ២០១៩ ដែលមានតម្លៃត្រឹមតែ ១ ៦៤៨ លានដុល្លារ។
ដោយឡែកសម្រាប់ការនាំចេញទំនិញពីកម្ពុជាក្នុងរយៈពេលនេះមានតម្លៃ ២ ០២៤,២ លានដុល្លារកើន ៣៦,៦៦ ភាគរយធៀបនឹងឆ្នាំ ២០១៩ ដែលមាន ១ ៤៨១,១ លានដុល្លារ និងទំនិញកម្ពុជានាំចូលពីអាមេរិកមានតម្លៃ ១០៨,២ លានដុល្លារធ្លាក់ចុះ ៣៥,៤ ភាគរយពីចំនួន ១៦៧,៥ លានដុល្លារ។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ភ្នំពេញប៉ុស្តិ៍កាលពីថ្ងៃចន្ទថា កំណើននៃការនាំចេញក្នុងរយៈពេល ៤ ខែដើមឆ្នាំគឺដោយសារពេលនោះអាមេរិកនៅមិនទាន់មានការរីករាលដាលខ្លាំងនៃជំងឺកូវីដ១៩ ហើយការបញ្ជាទិញទំនិញពីរោងចក្រនៅកម្ពុជាក៏មិនទាន់មានការស្នើសុំឲ្យលុបចោលដែរ។
លោកថ្លែងថា៖ «នេះជាមោទនភាពរបស់កម្ពុជាក្នុងការរក្សាបាននូវកំណើនពាណិជ្ជកម្មទ្វេភាគី ពិសេសការនាំចេញដ៏ច្រើនទៅអាមេរិកដែលជាទីផ្សារធំសម្រាប់ផលិតផលនាំចេញរបស់កម្ពុជា»។
បើតាមលោក លឹម ហេង កំណើនការនាំចេញនារយៈពេលខាងលើក៏ដោយសារកម្ពុជាមិនមានបញ្ហាកង្វះវត្ថុធាតុដើមសម្រាប់ផលិតផងដែរ។
លោកបន្ថែមថា ទោះជាយ៉ាងណាកំណើននេះអាចនឹងមិនមានទៀតទេក្នុងអំឡុងខែបន្តបន្ទាប់ ព្រោះការបិទទីផ្សារមួយរយៈដោយសារកូវីដ១៩ បានធ្វើឲ្យការបញ្ជាទិញទំនិញពីកម្ពុជាមួយចំនួនត្រូវគេលុបចោល។ ប៉ុន្តែវាអាចនឹងមានសម្ទុះឡើងវិញនៅពេលជំងឺកូវីដ១៩ ថយឥទ្ធិពល និងការបើកទីផ្សារនៅអាមេរិកឡើងវិញ។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា កំណើននៃការបញ្ជាទិញ និងភាពល្អប្រសើរនៃទំនាក់ទំនងនយោបាយសេដ្ឋកិច្ចបានធ្វើឲ្យពាណិជ្ជកម្មកម្ពុជា អាមេរិកមានដំណើរការទៅមុខយ៉ាងរលូន។
ទោះបីយ៉ាងណាលោកអះអាងថា ទំហំពាណិជ្ជកម្មទ្វេភាគីនេះនឹងមានការថមថយខ្លះនៅពេលបន្ទាប់ ដែលហេតុផលគឺមានទាំងការលុបចោលការបញ្ជាទិញពីអាមេរិក និងផលអវិជ្ជមានមួយចំនួនដែលកម្ពុជាទទួលរងឥទ្ធិពលពីជំងឺកូវីដ១៩។
លោកលើកឡើងថា៖ «ការបញ្ជាទិញពីអាមេរិកនឹងមានការធ្លាក់ចុះនៅពេលបន្ទាប់ ដោយសារការបន្តរីករាលដាលនៃជំងឺកូវីដ និងស្ថានភាពនយោបាយមានភាពវឹកវរដោយសារការធ្វើបាតុកម្មនារយៈពេលប៉ុន្មានសប្តាហ៍ចុងក្រោយនេះ»។
ជាមួយនឹងសុទិដ្ឋិនិយមលោក វណ្ណៈ អះអាងថា៖ «បើស្ថានការណ៍នយោបាយនៅអាមេរិកអាចមានភាពល្អប្រសើរឡើងវិញ ស្របពេលការចូលមកដល់នៃរដូវត្រជាក់ដែលមានតម្រូវការសម្លៀកបំពាក់ ស្បែកជើង និងសម្ភារច្រើននោះ ខ្ញុំរំពឹងថា ការបញ្ជាទិញនឹងកើនឡើងវិញខ្លះដោយនឹងមិនធ្លាក់គួរឲ្យកត់សម្គាល់ទេ»។
យោងតាមទិន្នន័យពីការិយាល័យពាណិជ្ជកម្មអាមេរិកបង្ហាញថា កាលពីឆ្នាំ ២០១៩ ទំហំពាណិជ្ជកម្មទ្វេភាគីរវាងប្រទេសទាំង ២ មានតម្លៃសរុប ៥ ៨៧០,៨ លានដុល្លារកើនឡើង ៣៨,០៥ ភាគរយ បើធៀបនឹងចំនួន ៤ ២៥២,៤ លានដុល្លារកាលពីឆ្នាំ ២០១៨។ ក្នុងឆ្នាំ ២០១៩ ការនាំចេញរបស់កម្ពុជាមានតម្លៃ ៥ ៣៥៦,៨ លានដុល្លារធៀបនឹង ៣ ៨០៦,៥ លានដុល្លារ ក្នុងឆ្នាំ ២០១៨ ខណៈការនាំចូលសរុបពីអាមេរិកមានតម្លៃ ៥១៤ លានដុល្លារ និងការនាំចូលកាលពីឆ្នាំ ២០១៨ មានតម្លៃ ៤៤៥,៩ លានដុល្លារ។
កាលពីឆ្នាំ ២០១៩ ប្រទេសកម្ពុជា គឺជាដៃគូពាណិជ្ជកម្មទំនិញឈានមុខគេទី ៦៦ របស់អាមេរិក៕ LA