ភ្នំពេញៈ ទំហំពាណិជ្ជកម្មកម្ពុជាសរុប (ការនាំចេញ និងនាំចូល) នៅឆ្នាំ ២០១៤ នេះមានតម្លៃប្រមាណ ១៨,១ ពាន់លានដុល្លារកើន ១៣,៨ ភាគរយធៀបនឹងតម្លៃសរុប ១៥,៩ ពាន់លានកាលពីឆ្នាំមុន។ នេះបើយោងតាមតួលេខបានពីក្រសួងពាណិជ្ជកម្ម។
របាយការណ៍សង្ខេបសកម្មភាពរបស់ក្រសួង ចាប់ពីខែកញ្ញាឆ្នាំ ២០១៣ ដល់ខែធ្នូ ឆ្នាំ២០១៤ បានចេញផ្សាយនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃអង្គារបង្ហាញថា តម្លៃនាំចេញរបស់កម្ពុជាកើនឡើង ៨០០ លានដុល្លារ ខណៈតម្លៃនាំចូលសរុបកើន ១,៤ ពាន់លានដុល្លារ។
លោក កែន រដ្ឋា អ្នកនាំពាក្យក្រសួងពាណិជ្ជកម្ម បានថ្លែងកាលពីម្សិលមិញថា តួលេខនេះឆ្លុះបញ្ចាំងពីកំណើនសេដ្ឋកិច្ចរបស់កម្ពុជា និងពីការកើនឡើងសកម្មភាពពាណិជ្ជកម្មជាមួយបណ្ដាប្រទេសនៅក្នុងតំបន់។
លោកលើកឡើងថា៖ «តួលេខដែលកើននេះគឺដោយសារកំណើននៃការនាំចេញពីប្រទេសកម្ពុជាទៅកាន់ទីផ្សារអន្តរជាតិ ហើយទំហំពាណិជ្ជកម្មទ្វេភាគី រវាងកម្ពុជា និងប្រទេសមួយចំនួនក៏មានការកើនឡើង ដូចជា ប្រទេសចិនដែលបានចុះហត្ថលេខាលើកិច្ចព្រមព្រៀងនាំចូលអង្ករពីប្រទេសកម្ពុជា១០០ ០០០តោនកាលពីខែសីហា»។
ទំហំនាំចេញសរុបរបស់កម្ពុជាបានកើន១១,៦ភាគរយពី៦,៩ពាន់លានដុល្លារក្នុងឆ្នាំ២០១៣ ដល់៧,៧ពាន់លានដុល្លារនៅឆ្នាំ២០១៤ខណៈទំហំការនាំចូលសរុបកើនឡើងពី៩ពាន់លានដុល្លារក្នុង ២០១៣ ដល់១០,៤ពាន់លានដុល្លារនៅ ២០១៤ ។
ទំហំទឹកប្រាក់នៃការនាំចេញរបស់កម្ពុជានៅតែទាបជាងទំហំទឹកប្រាក់នាំចេញសរុប។
លោក កែន រដ្ឋា បានពន្យល់ថា ការកើនឡើងនៃទំហំទឹកប្រាក់ក្នុងការនាំចូលគឺដោយសារតែការរីកចម្រើនក្នុងវិស័យសាងសង់ កសិកម្ម និងឧស្សាហកម្មនៅក្នុងប្រទេសកម្ពុជា។
លោកបន្តថា៖ «កម្ពុជានាំចូលគ្រឿងចក្រ ឧបករណ៍អេឡិចត្រូនិក សម្ភារសំណង់ និងវត្ថុធាតុដើមសម្រាប់ឧស្សាហកម្មផលិតកម្មរោងចក្រដោយសារមិនមានការផលិតក្នុងស្រុក។ អាស្រ័យហេតុនេះការបង្កើនការនាំចេញមានន័យថា បង្កើនចំនួននាំចូលផងដែរ ព្រោះយើងត្រូវការវត្ថុធាតុដើមដើម្បីផ្គត់ផ្គង់ការផលិតក្នុងស្រុក»។
លោកថ្លែងបន្តថា តួលេខនាំចេញត្រូវបានរំពឹងថាកើនឡើងនៅប៉ុន្មានឆ្នាំខាងមុខនេះ តាមរយៈការធ្វើទស្សនកិច្ចរបស់លោករដ្ឋមន្ដ្រី ស៊ុន ចាន់ថុល ទៅកាន់បណ្ដាប្រទេសជាច្រើនទាំងនៅអាមេរិក ហុងកុង និងប្រទេសក្នុងតំបន់មជ្ឈិមបូព៌ាដើម្បីលើកកម្ពស់ឲ្យមានការនាំចូលផលិតផលពីកម្ពុជា។
លោកបញ្ជាក់ថា៖ «វានឹងត្រូវការពេលវេលា ប៉ុន្តែវាមានការប្ដេជ្ញាចិត្តរបស់រដ្ឋាភិបាលក្នុងការបង្កើនតួលេខការនាំចេញ។ យើងសង្ឃឹមថានឹងមើលឃើញតួលេខនឹងបន្តកើនឡើងជាងនេះ នៅឆ្នាំក្រោយ»។
លោកស្រី ចន្ធី អ្នកវិភាគសេដ្ឋកិច្ចឯករាជ្យបានថ្លែងកាលពីម្សិលមិញថា កម្ពុជានៅតែអាចមានកំណើនទឹកប្រាក់ពាណិជ្ជកម្មទាំងនាំចេញ និងនាំចូលក្នុងឆ្នាំ២០១៤ បើទោះបីជាមានអស្ថិរភាពនយោបាយ និងបាតុកម្មហិង្សាជាច្រើន ដែលករណីនេះឆ្លុះបញ្ចាំងឲ្យឃើញពីតម្រូវការខ្ពស់នៃផលិតផលកម្ពុជានៅទីផ្សារអន្តរជាតិ។
លោកថ្លែងថា៖ «នេះបង្ហាញថា ទីផ្សារអន្តរជាតិត្រូវការផលិតផលពីកម្ពុជា។ កំណើននេះក៏ព្រោះតែសេដ្ឋកិច្ចល្អនៅប្រទេសដែលបញ្ជាទិញពីកម្ពុជាផងដែរ ដែលមានដូចជា សហរដ្ឋអាមេរិក និងសហភាពអឺរ៉ុប ចិននិងជប៉ុនជាដើម»។ លោកបន្តថា កម្ពុជានឹងអាចរក្សាបានកំណើនសេដ្ឋកិច្ច៧ឬ៨ភាគរយនៅឆ្នាំ២០១៥ ខណៈសន្ទះនៃការផលិតក្នុងស្រុកទាំងផ្នែកឧស្សាហកម្ម និងកសិកម្មបង្ហាញពីនិន្នាការនៃការរីកចម្រើន៕PB
