.jpg)
ម៉ាស៊ីនកំពុងស្ទូចកុងតឺន័រដាក់លើរថយន្តនៅក្នុងកំពង់ផែក្រុងព្រះសីហនុ។ ហេង ជីវ័ន
ភ្នំពេញៈ ទំហំពាណិជ្ជកម្មសរុបរបស់កម្ពុជាក្នុងរយៈពេល ៤ ខែដំបូងឆ្នាំ ២០២០ មានទឹកប្រាក់សរុបជាង ១១ ពាន់លានដុល្លារ ដែលរុញច្រានខ្លាំងពីសកម្មភាពនៃការនាំចេញ និងនាំចូលទំនិញក្នុងខែមករា និងខែកុម្ភៈ ខណៈ ២ ខែចុងក្រោយបង្ហាញពីការធ្លាក់ចុះ។ នេះបើយោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ។
របាយការណ៍ដែលភ្នំពេញ-ប៉ុស្តិ៍ទើបទទួលបានបង្ហាញថា ក្នុងរយៈពេល ៤ ខែ ដើមឆ្នាំ ២០២០ ការនាំចេញទំនិញរបស់កម្ពុជាទៅកាន់ទីផ្សារអន្តរជាតិមានទឹកប្រាក់សរុប ៤ ៤៣០ លានដុល្លារ កើនឡើង ៧,៧ ភាគរយធៀបនឹងរយៈពេលដូចគ្នាកាលពីឆ្នាំមុន។ ចំណែកការនាំចូលមានទឹកប្រាក់សរុប ៦ ៧៣៦ លានដុល្លារ កើនឡើង ៦,៧ ភាគរយ។
ទោះយ៉ាងណារបាយការណ៍បានឲ្យដឹងថា អត្រាកំណើនខាងលើនេះគឺមានភាពខុសប្លែកច្រើន បើធៀបទៅអត្រាកំណើនរយៈពេល ៤ ខែដំបូងឆ្នាំ ២០១៩ ដោយនៅពេលនោះការនាំចេញបានកើន ១៤,៣ ភាគរយ និងការនាំចូលកើន ២៥,១០ ភាគរយ បើធៀបនឹងឆ្នាំ ២០១៨។
របាយការណ៍បានឲ្យដឹងថា៖ «ជារួមទឹកប្រាក់នាំចេញនៅរក្សាបានកំណើនល្អ ទោះបីបណ្តាប្រទេសដៃគូពាណិជ្ជកម្មកំពុងជួបប្រទះនឹងបញ្ហាប្រឈមនៃការរីករាលដាលនៃជំងឺកូវីដ១៩ ក៏ដោយ»។
យោងតាមរបាយការណ៍ខាងលើកត្តាដែលធ្វើឲ្យការនាំចេញ និងនាំចូលទំនិញរបស់កម្ពុជាមានកំណើននារយៈពេល ៤ ខែដំបូង គឺដោយសារតែកំណើនដ៏ខ្ពស់ក្នុងខែមករា និងកុម្ភៈ ខណៈចាប់ពីខែមីនាដល់ខែមេសា មិនមានភាពល្អប្រសើរនោះឡើយ។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា កំណើននេះគឺទទួលឥទ្ធិពលខ្លាំងពីការបញ្ជាទិញ លក់ដែលមានមុនឆ្នាំ ២០២០ ចូលមកដល់ពោលគឺនៅមុនពេលការផ្ទុះជំងឺកូវីដ១៩ ពាសពេញពិភពលោក។ លោកបន្តថា ជាធម្មតាការបញ្ជាទិញធំៗ គេតែងតែធ្វើឡើងនៅយ៉ាងហោចណាស់ ៣ ខែមុនពេលផ្តល់ទំនិញហេតុនេះការបញ្ចូលទំនិញពិតជាមានច្រើននៅអំឡុង ២-៣ ខែដើមឆ្នាំ តែបន្ទាប់ពីនោះវាបានធ្លាក់ចុះជាបន្តបន្ទាប់។
លោកថ្លែងថា៖ «ការកើនឡើងនៃទំហំពាណិជ្ជកម្មក្នុងរយៈពេល ៤ ខែដំបូងគឺដោយសារតែស្ថិតក្នុងដំណាក់កាលនៃការបញ្ជូន និងផ្តល់ទំនិញដែលធ្វើកិច្ចព្រមព្រៀងរួចហើយ តែបន្ទាប់ពីនោះវាបានថមថយចុះជាលំដាប់»។
ជាមួយគ្នានេះលោកបានបញ្ជាក់ថា បន្ទាប់ពីរយៈពេលនេះ កំណើនប្រហែលជាមិនមានទៀតទេ។ លោកនិយាយថា៖ «វាអាចថយចុះគឺនឹងមិនមានកំណើនទៀតទេ»។
លោកបន្ថែមថា តម្រូវការស្បៀងស្តុកទុកនៅពេលនោះក៏មានកំណើនខ្ពស់ផងដែរ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍ថា ចាប់ពីដើមឆ្នាំ ២០២០ មក ការនាំចេញអង្ករកម្ពុជាទៅក្រៅប្រទេសបានកើនឡើងជាបន្តបន្ទាប់ ហើយបើគិតត្រឹមរយៈពេល ៤ ខែ ការនាំចេញសម្រេចបានបរិមាណ ៣០០ ២៥២ តោនកើនឡើង ៤០,៤៦ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩ ដែលមានចំនួន ២១៣ ៧៦៣ តោន។ ចំណែកទឹកប្រាក់ដែលទទួលបានពីការនាំចេញក្នុងរយៈនេះគឺមានប្រមាណ ២១០ លានដុល្លារ។
លោកបានថ្លែងថា៖ «បើទោះបីជាខ្ញុំមិនមានតម្លៃនាំចេញអង្ករក្នុងរយៈពេល ៤ ខែឆ្នាំមុន ប៉ុន្តែខ្ញុំដឹងថា ទឹកប្រាក់នាំចេញអង្ករក្នុងឆ្នាំនេះបានកើនច្រើន បើធៀបនឹងឆ្នាំ ២០១៩»។
លោកបន្តថា សម្រាប់ទីផ្សារនាំចេញអង្ករក្នុងឆ្នាំនេះ លោករំពឹងថា នឹងមិនមានសញ្ញាណណាដែលបង្កជាហានិភ័យធ្វើឲ្យការនាំចេញអង្ករទៅក្រៅប្រទេសធ្លាក់ចុះទេ។ លោកបន្តថា ខណៈការរីករាលដាលជំងឺកូវីដ១៩ កំពុងថមថយឥទ្ធិពល ហើយការបើកចំហប្រទេសមានកាន់តែច្រើននោះ ការធ្វើពាណិជ្ជកម្មរបស់កម្ពុជាជាមួយប្រទេសដៃគូលើពិភពលោកនឹងមានភាពរឹងមាំឡើងវិញ។
ក្រសួងសេដ្ឋកិច្ច និងហិរញ្ញវត្ថុកាលពីចុងសប្តាហ៍មុនបានព្យាករថា ផលិតផលក្នុងស្រុកសរុបរបស់កម្ពុជា (GDP) ក្នុងឆ្នាំ ២០២០ នេះនឹងធ្លាក់មកនៅក្នុងរង្វង់ ១,៩ ភាគរយ ហើយនឹងងើបឡើងវិញក្នុងរង្វង់ ៣,៥ ភាគរយនៅឆ្នាំ ២០២១ ខាងមុខ។
យោងតាមអ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន សេដ្ឋកិច្ចរបស់កម្ពុជាពឹងផ្អែកលើវិស័យសំខាន់ៗចំនួន ៣ គឺឧស្សាហកម្ម សេវាកម្ម និងកសិកម្ម។ ការរីករាលដាលនៃជំងឺកូវីដ ១៩ កំពុងធ្វើឲ្យប៉ះពាល់យ៉ាងខ្លាំងទៅលើវិស័យឧស្សាហកម្ម និងសេវាកម្ម។
ទិន្នន័យរបស់ធនាគារជាតិនៃកម្ពុជាបានឲ្យដឹងថា កាលពីឆ្នាំ ២០១៩ កម្ពុជាបាននាំចេញទំនិញទៅកាន់ទីផ្សារអន្តរជាតិក្នុងតម្លៃ ១៤,៥៣ ពាន់លានដុល្លារ កើនឡើង ១២,៧ ភាគរយបើធៀបនឹងឆ្នាំ ២០១៨ ខណៈការនាំចូលមានចំនួន ២២,១៩ ពាន់លានដុល្លារកើន ១៨,៦ ភាគរយ។
ទំនិញសំខាន់ៗដែលកម្ពុជានាំចេញរួមមាន សម្លៀកបំពាក់ ផលិតផលវាយនភណ្ឌ ស្បែកជើង អង្ករ និងកង់។ ចំណែកទំនិញនាំចូលរួមមាន វត្ថុធាតុដើមសម្រាប់វិស័យកាត់ដេរ រថយន្ត ប្រេង ឥន្ធនៈ និងគ្រឿងសំណង់។ ទីផ្សារសំខាន់ៗសម្រាប់ទំនិញកម្ពុជា រួមមាន ថៃ វៀតណាម ចិន អាមេរិក កូរ៉េខាងត្បូង ជប៉ុន និងអង់គ្លេស៕
