ភ្នំពេញ: ទំហំពាណិជ្ជកម្មរវាងកម្ពុជា និងប្រទេសជប៉ុនក្នុងត្រីមាសទី ១ ឆ្នាំ ២០២០ នេះសម្រេចបានជាង ៥៨៦ លានដុល្លារកើនឡើង ៤,៩០ ភាគរយ បើធៀបនឹងរយៈពេលដូចគ្នាកាលពីឆ្នាំមុន បើទោះជាការរីករាលដាលនៃវីរុសកូរ៉ូណាកំពុងធ្វើឲ្យប៉ះពាល់ដល់សេដ្ឋកិច្ចនៅទូទាំងពិភពលោក។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសរបស់ជប៉ុន (JETRO)។
របាយការណ៍នេះឲ្យដឹងថា ការនាំចេញរបស់កម្ពុជាមានតម្លៃជាង ៤៧៥ លានដុល្លារអំឡុងពេលនេះដោយកើនឡើង ៤,៤ ភាគរយធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលរបស់កម្ពុជាមានចំនួនជាង ១១១ លានដុល្លារកើនឡើង ៧ ភាគរយ។
លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេសសានកូប៉ោយប៉ែត បានប្រាប់ភ្នំពេញប៉ុស្តិ៍កាលពីថ្ងៃអង្គារថា សកម្មភាពផលិត និងការនាំចេញរបស់ក្រុមហ៊ុននៅក្នុងតំបន់សេដ្ឋកិច្ចពិសេសនេះកំពុងមានដំណើរការយ៉ាងរលូន ទោះបីមានការរីករាលដាលវីរុសកូរ៉ូណាក៏ដោយ។ លោកបន្តថា ក្រុមហ៊ុនជប៉ុនទាំងនេះបានផលិតគ្រឿងបង្គុំយានយន្ត និងគ្រឿងផ្គុំអេឡិចត្រូនិកសម្រាប់នាំចេញទៅប្រទេសជប៉ុន និងថៃ។
លោកថ្លែងថា៖ «ពួកគាត់ដំណើរការផលិតជាធម្មតា ហើយការនាំចេញរបស់ពួកគាត់ក៏គ្មានអ្វីប្រែប្រួលអ្វីនោះដែរក្នុងអំឡុងពេលនេះ។ យើងជឿថា ការនាំចេញផលិតផលរបស់ពួកគាត់នៅត្រីមាសបន្ទាប់ៗទៀតនឹងនៅតែល្អប្រសើរ ដោយសារពួកគេពុំមានអ្វីប៉ះពាល់ដោយសារវីរុសនេះទេ»។
លោកបានឲ្យដឹងថា តំបន់សេដ្ឋកិច្ចពិសេសសានកូប៉ោយប៉ែតកំពុងមានសក្តានុពលក្នុងការទាក់ទាញវិនិយោគិនជប៉ុនថ្មីបន្ថែមទៀត។
លោកនិយាយថា៖ «កាលពីថ្មីៗនេះមានក្រុមហ៊ុនជប៉ុនចំនួន ២ បានចាប់អារម្មណ៍មកវិនិយោគក្នុងតំបន់សេដ្ឋកិច្ចពិសេសរបស់យើង។ ពួកគេជាក្រុមហ៊ុនផលិតគ្រឿងផ្គុំអគ្គិសនី ដែលពួកគេកំពុងធ្វើការសិក្សាស្វែងយល់ពីឱកាសវិនិយោគនៅតំបន់នេះ»។
តំបន់សេដ្ឋកិច្ចពិសេសនេះមានផ្ទៃដីជាង ៨៣ ហិកតាក្នុងក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នតំបន់សេដ្ឋកិច្ចនេះមានក្រុមហ៊ុនចំនួន ១០ កំពុងធ្វើប្រតិបត្តិការដោយ ៩ ក្រុមហ៊ុនជាវិនិយោគដោយវិនិយោគិនជប៉ុន។
ប្រទេសទាំង ២ ប្តេជ្ញាថានឹងបង្កើនទំហំពាណិជ្ជកម្មទ្វេភាគីឲ្យកើនដល់ជាង ២ ពាន់លានដុល្លារនៅឆ្នាំ ២០២០ នេះ។
ការនាំចេញពីកម្ពុជាមានតម្លៃជាង ១,៧ ពាន់លានដុល្លារទៅទីផ្សារជប៉ុនកាលពីឆ្នាំ ២០១៩ កើន ៧,៧ ភាគរយធៀបនឹងឆ្នាំ ២០១៨។ នេះបើយោងតាមទិន្នន័យពី JETRO។
ទិន្នន័យនេះបង្ហាញថា កម្ពុជាបាននាំចូលផលិតផលមកវិញមានតម្លៃជាង ៥៦៣ លានដុល្លារ កើនឡើង ៣៣,៤ ភាគរយធៀបនឹងឆ្នាំ ២០១៨។
យោងតាមទិន្នន័យបានពីក្រុមប្រឹក្សាអភិវឌ្ឍន៍កម្ពុជានៅចន្លោះឆ្នាំ ១៩៩៥ ដល់ខែកញ្ញា ឆ្នាំ ២០១៩ មានគម្រោងវិនិយោគជប៉ុន ១៤១ គម្រោងស្មើនឹងទុនវិនិយោគ ២,៥ ពាន់លានដុល្លារ។ ក្នុងចំណោមនោះ ៦៦ គម្រោងនៅតំបន់សេដ្ឋកិច្ចពិសេសជាមួយនឹងទុនវិនិយោគដែលប៉ាន់ប្រមាណចំនួន ៣៤០ លានដុល្លារ។ គម្រោងវិនិយោគភាគច្រើនលើថាមពល គ្រឿងផ្គុំអគ្គិសនី គ្រឿងបន្លាស់យានយន្ត កសិឧស្សាហកម្ម ការកែច្នៃអាហារ មន្ទីរពេទ្យ និង ការលក់រាយជាដើម៕ LA