ភ្នំពេញ: ស្ថានទូតវៀតណាមប្រចាំនៅកម្ពុជាឲ្យដឹងថា ទំហំពាណិជ្ជកម្មទ្វេភាគីរវាងកម្ពុជា និងវៀតណាមធ្លាក់ចុះប្រមាណ ៨ ភាគរយ ក្នុងរយៈពេល ៥ ខែឆ្នាំនេះដោយសារជំងឺកូវីដ ១៩។
ស្ថានទូតវៀតណាមផ្សព្វផ្សាយ ទិន្នន័យពីអគ្គនាយកដ្ឋានគយវៀតណាម ដែលបង្ហាញថា ទំហំពាណិជ្ជកម្មកម្ពុជា-វៀតណាមសម្រេចបាន ២,១៧ ពាន់លានដុល្លារ ក្នុងរយៈពេល ៥ ខែដំបូងឆ្នាំនេះ ធ្លាក់ចុះ ៨,១ ភាគរយធៀបរយៈពេលដូចគ្នានៃឆ្នាំមុន។
ទិន្នន័យនេះបង្ហាញថា ការនាំចេញទំនិញរបស់កម្ពុជាទៅកាន់ទីផ្សារវៀតណាមមានតម្លៃ ៤៧៦ លានដុល្លារ ធ្លាក់ចុះ ១៥ ភាគរយ ខណៈកម្ពុជានាំចូលមានតម្លៃ ១,៧ ពាន់លានដុល្លារ ធ្លាក់ចុះ ៦ ភាគរយ។
ឯកអគ្គរដ្ឋទូតវៀតណាម លោក Vu Quang Minh ឲ្យដឹងថា ការវិនិយោគរបស់ប្រទេសវៀតណាមផ្ដោតលើវិស័យកសិកម្ម ធនាគារ ទូរគមនាគមន៍ ព័ត៌មានវិទ្យា ឧស្សាហកម្ម ការកែច្នៃ និងការផលិតផលិតផល។
លោកថា៖ «សកម្មភាពការផលិតរបស់សហគ្រាសវៀតណាមនៅកម្ពុជាបានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច និងសន្ដិសុខសង្គមកម្ពុជា»។
លោកបន្តថា កម្ពុជាមានគម្រោងវិនិយោគ ២១ នៅក្នុងប្រទេសវៀតណាម ជាមួយនឹងទុនចុះបញ្ជីសរុបជិត ៦៤ លានដុល្លារដែលជាប់ចំណាត់ថ្នាក់ទី ៥៤ ក្នុងចំណោមប្រទេស ១៣២ ដែលវិនិយោគនៅវៀតណាម។
កាលពីចុងខែធ្នូឆ្នាំមុននៅក្នុងពិធីសម្ពោធជាផ្លូវការនៃផ្សារដារនៅខេត្តត្បូងឃ្មុំ លោកនាយករដ្ឋមន្ដ្រី ហ៊ុន សែន បានជំរុញឲ្យមានការទាក់ទាញការវិនិយោគកាន់តែច្រើនបង្កើតឡើងនៅក្នុងតំបន់សេដ្ឋកិច្ចពិសេស (SEZ) តាមបណ្ដោយព្រំដែនជាមួយវៀតណាម។
លោកថ្លែងថា៖ «ខ្ញុំចង់ឲ្យមានតំបន់សេដ្ឋកិច្ចពិសេសកាន់តែច្រើនត្រូវបង្កើតឡើងនៅតាមបណ្ដោយព្រំដែនកម្ពុជា-វៀតណាម ដើម្បីទាក់ទាញក្រុមវិនិយោគិនវៀតណាមកាន់តែច្រើនព្រមទាំងក្រុមវិនិយោគិនផ្សេងទៀតសម្រាប់ ការនាំចេញពីយើង»។
ទិន្នន័យនេះឲ្យដឹងទៀតថា កម្ពុជាបាននាំចេញទំនិញដូចជា ស្រូវ អង្ករ គ្រាប់ស្វាយចន្ទី ជ័រកៅស៊ូ ស្លឹកថ្នាំជក់ និងចេក ខណៈវៀតណាមនាំចូលកម្ពុជារួមមាន ដែកថែប ប្រេង បន្លែផ្លែឈើ ជីកសិកម្ម ជាដើម។
ឆ្នាំ ២០១៩ ទំហំពាណិជ្ជកម្មរវាងកម្ពុជា និងវៀតណាមសម្រេចបានជិត ៥,៣ លានដុល្លារ កើនឡើង ១១ ភាគរយ ធៀបនឹងឆ្នាំ ២០១៨ ក្នុងនោះការនាំចេញរបស់កម្ពុជាមាន ចំនួន ៩០១ លានដុល្លារ កើនឡើង ៧ ភាគរយ ខណៈកម្ពុជានាំចូលមានតម្លៃ ៤,៤ ពាន់លានដុល្លារ កើនឡើង ១៦ ភាគរយ។
ការវិនិយោគរបស់វៀតណាមមានគម្រោង ២១៤ ដែលបានចុះបញ្ជីនៅប្រទេសកម្ពុជា ជាមួយទុនវិនិយោគសរុបចំនួន ៣,០៧ ពាន់លានដុល្លារ។ ក្នុងចំណោមនោះមានគម្រោងដែលមានសុពលភាព ១៧៦ ជាមួយទុនចុះបញ្ជីសរុប ២,៧៧ ពាន់លានដុល្លារ៕ LA