.jpg)
ច្រកព្រំដែនអន្តរជាតិបាវិតក្នុងខេត្តស្វាយរៀង។ កម្ពុជា និងវៀតណាមកំពុងជំរុញទំហំពាណិជ្ជកម្មទ្វេភាគី។ ហេង ជីវ័ន
ភ្នំពេញៈ ឯកអគ្គរដ្ឋទូតប្រទេសវៀតណាមប្រចាំប្រទេសកម្ពុជាបានឲ្យដឹងថា ទំនាក់ទំនងពាណិជ្ជកម្ម និងការវិនិយោគរវាងកម្ពុជា និងវៀតណាមទទួលបានកំណើនថ្មីមួយដែលឆ្លុះបញ្ចាំងពីទំនាក់ទំនងកាន់តែជិតស្និទ្ធរវាងប្រទេសទាំង ២។
ឯកអគ្គរដ្ឋទូតវៀតណាមលោក Vu Quang Minh បានឲ្យដឹងថា ទំហំពាណិជ្ជកម្មរវាងកម្ពុជា និងវៀតណាមកាលពីឆ្នាំ ២០១៨ បានកើនឡើងដល់ ៤,៧០៤ ពាន់លានដុល្លារអាមេរិកកើនឡើង ២៣,៨ ភាគរយធៀបនឹងឆ្នាំ ២០១៧ និងនៅក្នុងរយៈពេល ១១ ខែដំបូងឆ្នាំ ២០១៩ ទំហំពាណិជ្ជកម្មបានកើនដល់ ៤,៨ ពាន់លានដុល្លារអាមេរិកកើនឡើង ១៣,៨ ភាគរយធៀបនឹងរយៈពេលដូចគ្នាកាលពីឆ្នាំ ២០១៨។
លោកថ្លែងថា៖ «វាត្រូវបានរំពឹងថា ទំហំពាណិជ្ជកម្មរបស់ប្រទេសទាំង ២ នឹងកើនដល់ ៥,២ ពាន់លានដុល្លារលើសពីទិសដៅដែលបានកំណត់ ៥ ពាន់លានដុល្លារអាមេរិក និងលឿនជាងការកម្រិតរយៈពេល ១ ឆ្នាំដែលបានកំណត់ដោយនាយករដ្ឋមន្ដ្រីរបស់ប្រទេសទាំង ២»។
សម្រាប់ការវិនិយោគរហូតមកដល់ពេលនេះប្រទេសវៀតណាមមានគម្រោង ២១៤ ដែលបានចុះបញ្ជីនៅប្រទេសកម្ពុជាជាមួយនឹងទុនវិនិយោគសរុបចំនួន ៣,០៧ ពាន់លានដុល្លារ។ ក្នុងចំណោមនោះមានគម្រោងដែលមានសុពលភាព ១៧៦ ជាមួយទុនចុះបញ្ជីសរុប ២,៧៧ ពាន់លានដុល្លារ។
ចាប់ពីដើមឆ្នាំដល់ថ្ងៃទី ១១ ខែមិថុនាឆ្នាំ ២០១៩ មានគម្រោងទើបផ្ដល់ថ្មីចំនួន ៣ ជាមួយនឹងទុនចុះបញ្ជីសរុបចំនួន ៥៣០ ពាន់ដុល្លារអាមេរិក និងគម្រោង ៣ ជាមួយនឹងការបង្កើនទុនបន្ថែមសរុប ៣៧,៥ លានដុល្លារដែលធ្វើឲ្យប្រទេសវៀតណាមទទួលបានចំណាត់ទី ៣ នៃវិនិយោគិនបរទេសនៅកម្ពុជា។ ការវិនិយោគសរុបរបស់សហគ្រាសវៀតណាមដល់ខែកញ្ញា ឆ្នាំ ២០១៩ បានកើនឡើងដល់ ៥០ លានដុល្លារអាមេរិក។
កាលពីចុងខែធ្នូឆ្នាំមុននៅក្នុងពិធីសម្ពោធជាផ្លូវការនៃផ្សារដារនៅខេត្តត្បូងឃ្មុំ លោកនាយករដ្ឋមន្ដ្រី ហ៊ុន សែន បានជំរុញឲ្យមានការទាក់ទាញការវិនិយោគកាន់តែច្រើនបង្កើតឡើងនៅក្នុងតំបន់សេដ្ឋកិច្ចពិសេស (SEZ) តាមបណ្ដោយព្រំដែនជាមួយវៀតណាម។
លោកថ្លែងថា៖ «យើងត្រូវតែផ្លាស់ប្តូរព្រំដែនដែលជាកន្លែងកំហឹងដោយសារតែសង្គ្រាមទៅជាកន្លែងសម្រាប់ការជួញដូរទំនិញ ការវិនិយោគ សន្ដិភាព កិច្ចសហប្រតិបត្តិការ និងការអភិវឌ្ឍ»។
លោកបានបន្តថា៖ «ខ្ញុំចង់ឲ្យមានតំបន់សេដ្ឋកិច្ចពិសេសកាន់តែច្រើនត្រូវបង្កើតឡើងនៅតាមបណ្ដោយព្រំដែនកម្ពុជា និង វៀតណាម ដើម្បីទាក់ទាញក្រុមវិនិយោគិនវៀតណាមកាន់តែច្រើនព្រមទាំងក្រុមវិនិយោគិនផ្សេងទៀតសម្រាប់ការនាំចេញពីយើង។ ប្រសិនបើយើងអាចបង្កើតបានកាន់តែច្រើន យើងអាចកែច្នៃផលិតផលកសិកម្មឲ្យទៅជាផលិតផលសម្រេចសម្រាប់ការនាំចេញ»។
លោក Vu Quang Minh ឲ្យដឹងថា ការវិនិយោគរបស់ប្រទេសវៀតណាមផ្ដោតលើវិស័យកសិកម្ម ធនាគារ ទូរគមនាគមន៍ ព័ត៌មានវិទ្យា ការផលិតផលិតផលឧស្សាហកម្ម ការកែច្នៃ និងផលិតកម្ម។
លោកថា៖ «សកម្មភាពការផលិតរបស់សហគ្រាសវៀតណាមនៅកម្ពុជាបានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច និងសន្ដិសុខសង្គមរបស់ប្រទេសកម្ពុជា»។
លោកបន្តថា កម្ពុជាមានគម្រោងវិនិយោគ ២១ នៅក្នុងប្រទេសវៀតណាមជាមួយនឹងទុនចុះបញ្ជីសរុបជិត ៦៤ លានដុល្លារដែលជាប់ចំណាត់ថ្នាក់ទី ៥៤ ក្នុងចំណោមប្រទេស ១៣២ និងក្រុមហ៊ុនដែលវិនិយោគនៅប្រទេសវៀតណាម។
លោកបានឲ្យដឹងនៅពេលថ្មីៗនេះប្រទេសវៀតណាម និងកម្ពុជាបានចុះហត្ថលេខាលើក្របខ័ណ្ឌការងារជាច្រើន ដើម្បីលើកកម្ពស់កិច្ចសហប្រតិបត្តិការសេដ្ឋកិច្ច ដូចជាកិច្ចព្រមព្រៀងស្ដីពីក្របខ័ណ្ឌការងារការតភ្ជាប់សេដ្ឋកិច្ចប្រទេសទាំងពីររហូតដល់ឆ្នាំ ២០៣០ ផែនការសកម្មភាពតភ្ជាប់សេដ្ឋកិច្ច ៣ កិច្ចព្រមព្រៀងពន្ធត្រួតស៊ីគ្នា កិច្ចសហប្រតិបត្តិការ MoU នៅក្នុងវិស័យដឹកជញ្ជូនដល់ឆ្នាំ ២០២៥ ចក្ខុវិស័យដល់ឆ្នាំ ២០៣០។
រដ្ឋបាលទេសចរណ៍ថ្នាក់ជាតិវៀតណាម និងក្រសួងទេសចរណ៍កម្ពុជាបានចុះហត្ថលេខាលើ MOU ដើម្បីតភ្ជាប់ទេសចរណ៍រវាងប្រទេសទាំង ២ ហើយកាលពីថ្ងៃទី ២៧ ខែតុលា ឆ្នាំ ២០១៩ ក្រុមហ៊ុនអាកាសចរណ៍វិនិយោគរួម អង្គរអ៊ែរ បានបើកដំណើរការជើងហោះហើរត្រង់ផ្សេងទៀតចេញពីភ្នំពេញទៅទីក្រុងហូជីមិញ ខេត្តដាណាង។
លោកបញ្ជាក់ថា៖ «កិច្ចសហប្រតិបត្តិការសេដ្ឋកិច្ចកាន់តែស៊ីជម្រៅរវាងប្រទេសវៀតណាម និងកម្ពុជានឹងជាមូលដ្ឋានដ៏សំខាន់ក្នុងការលើកកម្ពស់ទំនាក់ទំនងកាន់តែប្រសើររវាងប្រទេសទាំង ២ នៅពេលអនាគត»៕LA
