.jpg)
អតិថិជនកំពុងដកប្រាក់តាមម៉ាស៊ីន ATM នៅក្នុងធនាគារអេស៊ីលីដា កន្លងមក។ ហេង ជីវ័ន
ភ្នំពេញៈ ទំហំកម្ចីសម្រាប់ការប្រើប្រាស់ផ្ទាល់ខ្លួនសរុបនៅក្នុងប្រទេសកម្ពុជាបានបន្តកើនឡើងដល់ ៧,១៦ ពាន់លានដុល្លារនៅចុងខែមិថុនាឆ្នាំនេះ កើនឡើង ៦,៨ ភាគរយធៀបនឹងត្រីមាសទី ១ ។ នេះបើយោងតាមរបាយការណ៍របស់ការិយាល័យឥណទានកម្ពុជា (CBC) ដែលបានចេញផ្សាយកាលពីសប្តាហ៍មុន។
របាយការណ៍ CBC ឲ្យដឹងថាមានគណនីចំនួន ១,១៩ លានត្រូវបានបើកសម្រាប់ស្នើសុំកម្ចីប្រើប្រាស់លក្ខណៈបុគ្គលគិតមកត្រឹមចុងខែមិថុនាកើនឡើង ៥ ភាគរយធៀបនឹងត្រីមាសមុន ឬស្មើនឹង ៣៧,៦៧ ភាគរយនៃគណនីបុគ្គលសរុបនៅលើទីផ្សារនេះ។
គិតត្រឹមខែមិថុនាឆ្នាំ ២០១៩ កម្ចីមិនបានសងត្រឡប់ទាន់ពេល បន្ទាប់ពី ៣០ ថ្ងៃ (NPL 30) មានអត្រា ១,១៩ ភាគរយនៃទំហំកម្ចីសរុបធ្លាក់ចុះពីអត្រា ១,២៤ ភាគរយពីត្រីមាសមុន។
ទំហំឥណទានប្រើប្រាស់ផ្ទាល់ខ្លួនសរុបដែលមាន ៧,១៦ ពាន់លានដុល្លារនេះ គឺមានប្រហែល ៣០,២២ ភាគរយទំហំកម្ចីសរុបនៅលើទីផ្សារនេះ។
ប៉ុន្តែចំនួនអ្នកដាក់ពាក្យស្នើកម្ចីប្រើប្រាស់ផ្ទាល់ខ្លួនដែលមាននៅក្នុងទម្រង់ផ្សេងគ្នា ៣ រួមមានហិរញ្ញវត្ថុផ្ទាល់ខ្លួន កាតឥណទាន និងកម្ចីទិញផ្ទះ ទាំងអស់នេះបានធ្លាក់ចុះ ១៩,២៩ ភាគរយ។
របាយការណ៍នេះបង្ហាញថាការដាក់ពាក្យកម្ចីទិញផ្ទះបានធ្លាក់ចុះ ៣៦ ភាគរយធៀបនឹងត្រីមាសទី ១ ដែលខេត្តនៅជាប់តំបន់ឆ្នេរ មើលឃើញការធ្លាក់ចុះខ្លាំងជាងគេដល់ ៤៩ ភាគរយ។ ការដាក់ពាក្យសុំកាតឥណទានបានធ្លាក់ចុះ ៩ ភាគរយ ខណៈការដាក់ពាក្យស្នើសុំហិរញ្ញប្បទានផ្ទាល់ខ្លួន ធ្លាក់ចុះ ១៨ ភាគរយ។
លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជាបានឲ្យដឹងថា ការធ្លាក់ចុះមិនខុសពីឆ្នាំមុនៗនោះទេ ដែលការដាក់ពាក្យស្នើសុំឥណទានតែងតែធ្លាក់ចុះនៅត្រីមាសទី ២។
បើទោះបីយ៉ាងនេះក្តីលោកថ្លែងថា៖ «ប៉ុន្តែបើធៀបនឹងរយៈពេលដូចគ្នាកាលពីឆ្នាំ ២០១៨ ចំនួននៃការដាក់ពាក្យសុំកម្ចីប្រើប្រាស់នៅត្រីមាសទី ២ នេះបានកើនឡើង ៩,០៣ ភាគរយ»។
យោងតាមលោក អឿ សុធារ័ត្ន ចំនួននៃការបើកគណនីឥណទានប្រើប្រាស់នៅតែបន្តកើនឡើងចាប់តាំងពីឆ្នាំ ២០១៨ ចន្លោះពី ៥ ទៅ ៧ ភាគរយនៅក្នុងត្រីមាសនីមួយៗ ខណៈកំណើនឥណទានសរុបកើនឡើងចន្លោះពី ៦ ទៅ ៨ ភាគរយ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានឲ្យដឹងថា ការធ្លាក់ចុះចំនួនអ្នកស្នើសុំឥណទានសម្រាប់ប្រើប្រាស់នៅត្រីមាសទី ២ ដោយសារតែលទ្ធភាពនៃការចាយវាយរបស់អ្នកប្រើប្រាស់មានការថយចុះ ខណៈកាលពីត្រីមាសទី ១ មានតម្រូវការច្រើនដូចជាការដាក់ស្នើកម្ចីសម្រាប់ការប្រើប្រាស់ក្នុងពិធីបុណ្យចូលឆ្នាំជាដើម។
ប៉ុន្តែលោកឲ្យដឹងថា ទោះបីជាការស្នើកម្ចីប្រើប្រាស់ធ្លាក់ចុះ ក៏តុល្យភាពកម្ចីនៅតែកើនឡើង។ លោកថ្លែងថា៖ «ចំនួនអ្នកស្នើសុំឥណទានថយចុះមែន ប៉ុន្តែទំហំនៃការផ្តល់កម្ចីនៅតែធំ ដូច្នេះធ្វើឲ្យសមតុល្យកើនឡើង»៕ LA
