.jpg)
ផ្សារមូលបត្រកម្ពុជា។ ហេង ជីវ័ន
ភ្នំពេញៈ ទំហំជួញដូររបស់ក្រុមហ៊ុនផ្សារមូលបត្រកម្ពុជា (CSX) បានធ្លាក់ចុះប្រមាណ ១៧ ភាគរយនៅត្រីមាសទី ១ ឆ្នាំនេះ ដោយការជួញដូរសរុបមានចំនួន ៥៦០ ៤៧៩ ធៀបនឹងចំនួន ៦៧៨ ០០៨ ភាគហ៊ុនកាលពីត្រីមាសទី ៤ ឆ្នាំ ២០១៩។
បើយោងតាមព្រឹត្តិបត្រព័ត៌មានស្ថិតិជួញដូរមូលបត្ររបស់គណៈកម្មការមូលបត្រកម្ពុជា (SECC) សម្រាប់ទំហំជួញដូរសរុបនេះគឺមានតម្លៃប្រហែល ៩៧៤ ពាន់ដុល្លារធ្លាក់ចុះ ៣៣ ភាគរយធៀបនឹងត្រីមាសទី ៤ ឆ្នាំមុន ខណៈការជួញដូរប្រចាំថ្ងៃជាមធ្យមមានចំនួន ៩ ០៤០ ភាគហ៊ុនស្មើនឹងតម្លៃ ១៥,៧ ពាន់ដុល្លារ។
ជាមួយគ្នានេះដែរ សន្ទស្សន៍របស់ CSX ក៏បានធ្លាក់ចុះ ២២ ភាគរយពី ៧៦១,៧៣ ពិន្ទុនៅចុងត្រីមាសទី ៤ មកនៅត្រឹម ៥៩០,៦៣ ពិន្ទុកាលពីត្រីមាសទី ១ ឆ្នាំនេះផងដែរ។
លោក ហុង សុខហួរ អគ្គនាយក CSX បានយល់ស្របចំពោះការធ្លាក់ចុះនេះ ដោយលើកឡើងអំពីការរីករាលដាលជំងឺកូវីដ១៩ ដែលបានចាប់ផ្ដើមចាប់តាំងពីដើមឆ្នាំធ្វើឲ្យប៉ះពាល់ដល់ការជួញដូរ និងតម្លៃភាគហ៊ុន។
លោកបានថ្លែងថា៖ «ការប៉ះពាល់បន្តិចបន្តួចដោយសារការរីករាលដាលជំងឺកូវីដ១៩ បានធ្វើឲ្យការជួញដូរ និងតម្លៃភាគហ៊ុនធ្លាក់ចុះ។ ទោះយ៉ាងណា អ្វីដែលយើងអាចធ្វើបាននៅពេលនេះគឺត្រូវប្រែក្លាយផលប៉ះពាល់ដោយសារការរីករាលដាលជំងឺនេះទៅជាឱកាសតាមរយៈការស្វែងរកមធ្យោបាយនានាដើម្បីកែលម្អសកម្មភាពអាជីវកម្មឡើងវិញ»។
លោកបន្តថា៖ «យើងមើលឃើញប្រតិបត្តិការជួញដូរកំពុងកើនឡើងចាប់ពីដើមខែមេសា ហើយខ្ញុំសង្ឃឹមថា ជាមួយនឹងការចូលរួមបោះផ្សាយពីធនាគារអេស៊ីលីដា យើងនឹងបង្កើនការទាក់ទាញក្រុមវិនិយោគិនកាន់តែច្រើនមកផ្សារហ៊ុន។ ខ្ញុំគិតថា បើយើងមិនមានវិបត្តិសុខភាពនេះទេ យើងនឹងមើលឃើញក្រុមវិនិយោគិនកាន់តែច្រើនឡើងៗ វិនិយោគលើផ្សារហ៊ុននេះ ដោយសារតែវត្តមានរបស់ធនាគារអេស៊ីលីដាផងដែរ»។
ទោះបីជាយ៉ាងណាលោក សុខហួរ នៅតែមានសុទិដ្ឋិនិយមថា សកម្មភាពជួញដូរនឹងកើនឡើងជាមួយនឹងវត្តមានរបស់ក្រុមហ៊ុនចុះបញ្ជីកាន់តែច្រើន ខណៈមានក្រុមហ៊ុន ២-៣ បន្ថែមទៀតកំពុងរៀបចំផែនការចុះបញ្ជី។
លោកលើកឡើងថា៖ «ទោះបីជាភាពមិនច្បាស់លាស់លើពិភពលោកនៅឆ្នាំនេះក៏ដោយ ក៏យើងសង្ឃឹមថា ផ្សារភាគហ៊ុនមួយនេះនឹងក្លាយជាឧបករណ៍វិនិយោគដ៏មានសក្ដានុពលសម្រាប់ក្រុមវិនិយោគិន ដូចបណ្ដាប្រទេសជិតខាង ដោយសារវាជាទីផ្សារមួយជួយប្រមូលមូលនិធិសម្រាប់កំណើនរបស់ក្រុមហ៊ុនក្នុងស្រុក និងបង្កើនប្រាក់ចំណូលសម្រាប់ប្រជាជន និងកំណើនសេដ្ឋកិច្ច»។
គិតត្រឹមថ្ងៃទី ២៥ ខែឧសភា CSX មានក្រុមហ៊ុនចុះបញ្ជី ១២ ក្នុងចំណោមនោះក្រុមហ៊ុន ៦ ចុះបញ្ជីភាគហ៊ុន និងក្រុមហ៊ុន ៦ ផ្សេងទៀតចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១២ នេះប្រមូលមូលនិធិបានប្រហែល ២៤០ លានដុល្លារ និងសន្ទស្សន៍ភាគហ៊ុនបានកើនឡើងជាង ៥៧ ភាគរយកាលពីឆ្នាំ ២០១៩ ធៀបនឹងឆ្នាំ ២០១៨។ មានវិនិយោគិនលក្ខណៈបុគ្គល និងក្រុមហ៊ុនប្រហែល ២៥ ០០០ បានបើកគណនីជួញដូរនៅផ្សារហ៊ុនកម្ពុជា CSX៕LA
