.jpg)
ធនាគារកណ្ដាលជប៉ុនកាលពីថ្ងៃអង្គារ បានដំឡើងការព្យាករពីកំណើនសេដ្ឋកិច្ចរបស់ខ្លួនសម្រាប់ប្រទេសមានសេដ្ឋកិច្ចធំជាងគេទី ៣ របស់ពិភពលោក។ រូបថត AFP
ក្រុងតូក្យូៈ ធនាគារកណ្ដាលជប៉ុនកាលពីថ្ងៃអង្គារបានដំឡើងការព្យាករពីកំណើនសេដ្ឋកិច្ចរបស់ខ្លួនសម្រាប់ប្រទេសមានសេដ្ឋកិច្ចធំជាងគេទី ៣ របស់ពិភពលោកនេះ ប៉ុន្តែបានរក្សាគោលនយោបាយបន្ធូរបន្ថយរូបិយវត្ថុខ្លាំងបំផុតរបស់ខ្លួនមិនផ្លាស់ប្តូរ។
ធនាគារកណ្ដាលមួយនេះបានឲ្យដឹងបន្ទាប់ពីកិច្ចប្រជុំគោលនយោបាយរយៈពេល ២ ថ្ងៃថា នៅពេលនេះធនាគារនេះរំពឹងថានឹងមានសេដ្ឋកិច្ចនឹងកើនឡើង ០,៩ ភាគរយ នៅក្នុងឆ្នាំដែលបញ្ចប់នៅខែមីនាឆ្នាំ ២០២១ ដែលអត្រានេះត្រូវបានដំឡើងពីការព្យាករលើកមុនដែលថាមានកំណើន ០,៧ ភាគរយ។
ការវាយតម្លៃកាន់តែល្អប្រសើរនេះបានធ្វើឡើងបន្ទាប់ពីលោកនាយករដ្ឋមន្ដ្រី ស៊ីនហ្សូ អាបេ បានដាក់ចេញកញ្ចប់វិធានការជំរុញសេដ្ឋកិច្ចមួយកាលពីឆ្នាំមុន ដើម្បីគាំទ្រសេដ្ឋកិច្ចនេះ និងកាត់បន្ថយផលប៉ះពាល់ដោយសារការបង្កើនពន្ធលើការប្រើប្រាស់កាលពីខែតុលាពីអត្រា ៨ ទៅ ១០ ភាគរយ។
សេចក្ដីសម្រេចនេះក៏បានកើតមានឡើងផងដែរបន្ទាប់ពីអាមេរិក និងប្រទេសចិនសម្រេចបានកិច្ចព្រមព្រៀងពាណិជ្ជកម្មមួយនៅពេលថ្មីៗនេះដែលបន្ធូរបន្ថយការបារម្ភដែលបានកើតមានជាយូរមកហើយចំពោះក្រុមវិនិយោគិនពិភពលោក។
ទីផ្សារពិភពលោកក៏បានត្រឡប់ទៅរកភាពស្ងប់ស្ងាត់វិញផងដែរ បន្ទាប់ពីភាពចលាចលដែលបានបង្កឡើងដោយសារអាមេរិកសម្លាប់លោក Qasem Soleimani ដែលជាឧត្តមសេនីយ៍ជាន់ខ្ពស់របស់ប្រទេសអ៊ីរ៉ង់។ ការវាយប្រហារនេះបានបណ្ដាលឲ្យមានការសងសឹកនៅមានកម្រិតមួយ ហើយតំបន់នេះក៏បានចៀសផុតពីការកើនឡើងខ្លាំងនូវអំពើហិង្សាផងដែរ។
ធនាគារកណ្តាលបានឲ្យដឹងថា៖ «សេដ្ឋកិច្ចរបស់ជប៉ុនបានស្ថិតលើនិន្នាការកើនឡើងក្នុងកម្រិតមធ្យម ទោះបីជាការនាំចេញ ការផលិត និងទំនុកចិត្តធុរកិច្ចបានបង្ហាញភាពចុះខ្សោយមួយចំនួនក៏ដោយ ដែលភាគច្រើនបានរងផលប៉ះពាល់ដោយសារការធ្លាក់ចុះសេដ្ឋកិច្ចក្រៅប្រទេស និងគ្រោះមហន្តរាយធម្មជាតិ»។
ធនាគារកណ្តាលនេះបានឲ្យដឹងថា ទោះបីយ៉ាងណាការបង្កើនពន្ធ និងគ្រោះមហន្តរាយធម្មជាតិកំពុងដាក់សម្ពាធទៅលើតម្រូវការក្នុងស្រុក។ ធនាគារនេះបានបន្តថា៖ «ប៉ុន្តែតម្រូវការទំនងជានឹងមាននិន្នាការកើនឡើង»៕ LA
