ក្រុងសិង្ហបុរីៈ ប្រទេសសិង្ហបុរីកាលពីថ្ងៃចន្ទបានបន្ធូរបន្ថយគោលនយោបាយរូបិយវត្ថុជាលើកដំបូងក្នុងរយៈពេលជាង ៣ ឆ្នាំ ខណៈសង្គ្រាមពាណិជ្ជកម្មរវាងអាមេរិក និងចិនបញ្ចេញឥទ្ធិពល ស្របពេលដែលប្រទេសមានសេដ្ឋកិច្ចពឹងផ្អែកលើការនាំចេញមួយនេះបានគេចផុតពីការដើរថយក្រោយនៃសេដ្ឋកិច្ចនៅត្រីមាសទី ៣។
ធនាគារកណ្ដាលរបស់ប្រទេសនេះបានដើរតាមគន្លងរបស់ប្រទេសផ្សេងទៀតជុំវិញពិភពលោករាប់ចាប់ពីអឺរ៉ុបរហូតដល់អាមេរិក ដើម្បីបន្ធូរបន្ថយគោលនយោបាយ ខណៈក្តីបារម្ភថានឹងមានការថមថយកំណើនសេដ្ឋកិច្ចពិភពលោកកើនឡើង។
សិង្ហបុរីជាធម្មតាជាប្រទេសទី ១ ក្នុងចំណោមប្រទេសពឹងផ្អែកលើការនាំចេញផ្សេងៗនៅអាស៊ីដែលត្រូវរងផលប៉ះពាល់ក្នុងអំឡុងការធ្លាក់ចុះសេដ្ឋកិច្ចដែលធ្វើឲ្យប្រទេសនេះក្លាយជាកត្តាវាស់វែងតម្រូវការទំនិញ និងសេវាកម្មដែលត្រូវបានគេឃ្លាំមើលដោយយកចិត្តទុកដាក់សម្រាប់តំបន់។
ហើយប្រទេសនេះត្រូវបានរងផលប៉ះពាល់យ៉ាងខ្លាំងក្នុងរយៈពេលប៉ុន្មានខែថ្មីៗនេះ ដោយសារតែការធ្លាក់ចុះអត្រាកំណើនសេដ្ឋកិច្ច និងការនាំចេញ ខណៈដែលភាពតានតឹងរវាងអាមេរិក និងចិនធ្វើឲ្យប៉ះពាល់ដល់ប្រព័ន្ធពាណិជ្ជកម្មពិភពលោក។
អាជ្ញាធររូបិយវត្ថុសិង្ហបុរី (MAS) ដែលជាធនាគារកណ្តាលរបស់សិង្ហបុរីបានឲ្យដឹងថាខ្លួននឹង «កាត់បន្ថយបន្តិច» នូវកម្រិតអត្រាប្តូរប្រាក់របស់ខ្លួនដែលអត្រានេះបានអនុញ្ញាតឲ្យរូបិយប័ណ្ណដុល្លាររបស់សិង្ហបុរីប្រែប្រួលតម្លៃឡើងចុះធៀបនឹងប្រាក់ដុល្លារអាមេរិក។ ការកាត់បន្ថយនេះធ្វើឡើងទៅតាមការរំពឹងទុក។
ជំនួសឲ្យការប្រើប្រាស់អត្រាការប្រាក់ ប្រទេសសិង្ហបុរីគ្រប់គ្រងលើគោលនយោបាយរូបិយវត្ថុដោយការអនុញ្ញាតឲ្យតម្លៃប្រាក់ដុល្លារសិង្ហបុរីកើនឡើង ឬធ្លាក់ចុះធៀបនឹងក្រុមរូបិយប័ណ្ណរបស់ដៃគូពាណិជ្ជកម្មសំខាន់ៗរបស់ខ្លួន។
MAS បានឲ្យដឹងថា៖ «ក្នុងរយៈពេល ៦ ខែចុងក្រោយនេះបញ្ហាកើតមានឡើងលើកំណើនផលិតផលក្នុងស្រុកសរុប (GDP) ដោយសារវិស័យផលិតកម្មបានកើនឡើងខ្លាំងដែលឆ្លុះបញ្ចាំងពីការធ្លាក់ចុះជាបន្តក្នុងវដ្ដអេឡិចត្រូនិកពិភពលោក ព្រមទាំងការដកចេញការចំណាយលើការវិនិយោគ ដែលមួយផ្នែកបង្កឡើងដោយភាពមិនច្បាស់លាស់ក្នុងទំនាក់ទំនងរវាងអាមេរិក និងចិន»។
ទិន្នន័យ GDP បឋមដែលបានចេញផ្សាយជាមួយគ្នានេះដែរបានបង្ហាញថា សេដ្ឋកិច្ចរបស់ប្រទេសសិង្ហបុរីបានគេចផុតពីការធ្លាក់ចូលទៅក្នុងការដើរថយក្រោយនៃសេដ្ឋកិច្ចដែលមានន័យថាជាការធ្លាក់ចុះកំណើនសេដ្ឋកិច្ចរយៈពេល ២ ត្រីមាសជាប់គ្នា។
សេដ្ឋកិច្ចសិង្ហបុរីបានកើនឡើង ០,៦ ភាគរយនៃអត្រាប្រចាំត្រីមាសនៅត្រីមាសទី ៣ ដែលស្ទុះងើបឡើងវិញពីការធ្លាក់ចុះគួរឲ្យភ្ញាក់ផ្អើល ២,៧ ភាគរយកាលពីត្រីមាសទី ២។ សេដ្ឋកិច្ចបានកើនឡើង ០,១ ភាគរយនៅត្រីមាសទី ៣ បើគិតពីអត្រាប្រចាំឆ្នាំ។
វិស័យផលិតកម្មដែលជាសសរស្ដម្ភមួយនៃសេដ្ឋកិច្ចដែលពឹងផ្អែកលើពាណិជ្ជកម្មរបស់ប្រទេសនេះបានធ្លាក់ចុះ ៣,៥ ភាគរយ បន្ទាប់ពីធ្លាក់ចុះ ៣,៣ ភាគរយនៅត្រីមាសមុន។
ក្រុមហ៊ុន Capital Economics ព្យាករថា សេដ្ឋកិច្ចនឹងទំនងជាកើនឡើង ០,៥ ភាគរយតែប៉ុណ្ណោះនៅឆ្នាំនេះ។ សិង្ហបុរី កន្លងមកបានធ្លាក់ចូលទៅក្នុងការដើរថយក្រោយនៃសេដ្ឋកិច្ច បន្ទាប់ពីវិបត្តិហិរញ្ញវត្ថុពិភពលោកកាលពីឆ្នាំ ២០០៨។
លោក Song Seng Wun ដែលជាសេដ្ឋវិទូប្រចាំតំបន់មួយរូបនៅក្រុមហ៊ុន CIMB Private Banking បានឲ្យដឹងថា ដោយសេដ្ឋកិច្ចបានគេចផុតពីការដើរថយក្រោយនៃសេដ្ឋកិច្ច អាជ្ញាធរ MAS ប្រាកដជាបានគិតថា ការផ្លាស់ប្តូរបន្តិចបន្តួចនៃគោលនយោបាយនេះគឺគ្រប់គ្រាន់។
លោក Song បានប្រាប់ទីភ្នាក់ងារព័ត៌មាន AFP ថា ធនាគារកណ្ដាលសិង្ហបុរីនឹងសង្ឃឹមថា «ប្រហែលជាកំណើនសេដ្ឋកិច្ចក្នុងឆ្នាំ ២០២០ អាចនឹងប្រសើរជាងឆ្នាំ ២០១៩»៕ LA