.jpg)
ធនាគារកណ្តាល នឹងរួមគ្នាបង្កើនប្រព័ន្ធទូទាត់រូបិយប័ណ្ណឌីជីថលមួយ ដើម្បីឆ្ពោះទៅរកការធ្វើទំនើបកម្មនៃរូបិយប័ណ្ណឌីជីថលទៅក្នុងសេដ្ឋកិច្ចសកល។ រូបថត AFP
ភ្នំពេញៈ ស្ថាប័នហិរញ្ញវត្ថុ និងអង្គការសេដ្ឋកិច្ចជាច្រើនរួមមានធនាគារជាតិនៃកម្ពុជាវេទិកាសេដ្ឋកិច្ចពិភពលោក ធនាគារកណ្តាល គ្រឹះស្ថានមីក្រូហិរញ្ញវត្ថុជាង ៤០ អ្នកសិក្សាស្រាវជ្រាវ និងអង្គការពិភពលោកនឹងរួមគ្នាបង្កើតទម្រង់នៃប្រព័ន្ធទូទាត់ជាតិដែលស្រដៀងគ្នាមួយដែលមានឈ្មោះថា រូបិយប័ណ្ណឌីជីថលនៃធនាគារកណ្តាល (CBDC) ដើម្បីឆ្ពោះទៅរកការធ្វើទំនើបកម្មនៃរូបិយប័ណ្ណឌីជីថលទៅក្នុងសេដ្ឋកិច្ចសកល។
បើយោងតាមសេចក្តីប្រកាសព័ត៌មានរបស់វេទិកាសេដ្ឋកិច្ចពិភពលោកដែលបានធ្វើឡើងក្នុងកិច្ចប្រជុំវេទិកាពិភពលោកប្រចាំឆ្នាំ ២០២០ កាលពីថ្ងៃទី ២១ ដល់ថ្ងៃទី ២៤ ខែមករា ឆ្នាំ ២០២០ នៅទីក្រុងដាវ៉ូស ប្រទេសស្វ៊ីស រូបិយប័ណ្ណឌីជីថល (CBDC) បានបង្ហាញពីសក្តានុពលនៃដំណោះស្រាយជាច្រើន រួមមានដំណោះស្រាយហិរញ្ញវត្ថុ និងប្រព័ន្ធទូទាត់ដ៏មានប្រសិទ្ធភាព។
លោកស្រី Sheila Warren ប្រធាន Blockchain and Distributed Ledger Technology នៃវេទិកាសេដ្ឋកិច្ចពិភពលោកបានឲ្យដឹងថាវាមានសារៈសំខាន់ណាស់ដែលធនាគារកណ្តាលត្រូវវិភាគដោយប្រុងប្រយ័ត្ននៃឱកាស និងបញ្ហាប្រឈមនានា។
លោកស្រីថ្លែងថា៖ «ដោយសារធនាគារកណ្តាលត្រូវផ្តល់តួនាទីសំខាន់ក្នុងសេដ្ឋកិច្ចសកលរាល់ការអនុវត្តរូបិយប័ណ្ណឌីជីថលណាមួយដោយរួមទាំងសក្តានុពលដែលជាបច្ចេកវិទ្យា blockchain ផងនោះ វានឹងមានផលប៉ះពាល់ខ្លាំងទាំងក្នុងស្រុក និងអន្តរជាតិ»។
លោកស្រី Ashley Lannquist ប្រធានគម្រោងនៃវេទិកាសេដ្ឋកិច្ចពិភពលោក បានលើកឡើងថា៖ «យើងបានធ្វើការជាមួយធនាគារកណ្តាលជាង ១២ ក៏ដូចជាអ្នកដឹកនាំក្នុងវិស័យសេដ្ឋកិច្ច និងហិរញ្ញវត្ថុ ដើម្បីបង្កើតការវាយតម្លៃ និងរៀបចំរូបិយប័ណ្ណឌីជីថលសាមញ្ញមួយនៅជុំវិញពិភពលោក»។
លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជាមិនអាចទាក់ទងសុំមតិយោបល់ទៅលើគម្រោងនេះបានទេកាលពីថ្ងៃអាទិត្យ។
បើយោងតាមសេចក្តីប្រកាសព័ត៌មានរបស់វេទិកាសេដ្ឋកិច្ចពិភពលោក ធនាគារជាតិនៃកម្ពុជាបានអភិវឌ្ឍជាដំបូងនៃទម្រង់ស្រដៀងគ្នានៃរូបិយប័ណ្ណឌីជីថលដែលជាផ្នែកមួយនៃគម្រោង Bakong ដោយបានចាប់ផ្តើមសាកល្បងដឹកនាំជាមួយភាពរស់រវើក និងបរិស្ថានកំណត់កាលពីថ្ងៃទី ១៨ ខែកក្កដា ឆ្នាំ ២០១៩ និងមានផែនការប្រកាសផ្សាយនៅដើមឆ្នាំ ២០២០។
សេចក្តីប្រកាសបានឲ្យដឹងថា៖ «បញ្ហាជាក់លាក់មួយត្រូវបានកំណត់។ វាត្រូវការការតភ្ជាប់ជាបំណែកមួយទូទាត់ជាមួយសេដ្ឋកិច្ចដែលគ្រប់គ្រងដោយទម្លាប់ប្រើប្រាស់សាច់ប្រាក់យ៉ាងច្រើនជាមួយធនាគារពាណិជ្ជកម្ម ពាណិជ្ជករ និង ប្រជាជនដែលមិនប្រើប្រាស់សេវារបស់ធនាគារ ដើម្បីកាត់បន្ថយការប្រើប្រាស់សាច់បង់ប្រាក់ និងបង្កើនបរិយាប័ន្នហិរញ្ញវត្ថុ។ ការអភិវឌ្ឍប្រព័ន្ធទូទាត់ដែលមានមូលដ្ឋានលើ blockchain គឺជាដំណោះស្រាយសម្រាប់បញ្ហាប្រឈមទាំងនេះ»៕
