.jpg)
បុរសមា្នក់ដើរកាត់ធនាគារជប៉ុន នាពេលកន្លងមក។ រូបថត AFP
ក្រុងកូក្យូៈ ធនាគារកណ្តាលជប៉ុនកាលពីថ្ងៃអង្គារបានប្រមូលផ្តុំជំនួយសម្រាប់អាជីវកម្មដែលត្រដាបត្រដួសជាមួយនឹងការធ្លាក់ចុះបណ្តាលមកពីការរីករាលដាលជំងឺកូវីដ ១៩ នៅពេលដែលខ្លួនប៉ុនប៉ងក្នុងការបញ្ចប់ការធ្លាក់ចុះសេដ្ឋកិច្ចធំបំផុតទី ៣ របស់ពិភពលោក។
ធនាគារជប៉ុន (BoJ) បានពង្រីកកម្មវិធីកម្ចីដែលមានអត្រាការប្រាក់សូន្យដល់ក្រុមហ៊ុនទាំងឡាយ ដែលមានទឹកប្រាក់សរុប ៩០ ពាន់ពាន់លានយ៉េន (៨៣៧ ពាន់លានដុល្លារ) ពីចំនួន ៥៥ ពាន់ពាន់លានយ៉េន។ បរិមាណប្រាក់សម្រាប់ក្រុមហ៊ុននឹងមានចំនួនដល់ទៅ ១១០ ពាន់ពាន់លានយ៉េន ពេលការទិញមូលបត្របំណុលក្រុមហ៊ុនត្រូវបានគេពិចារណា។
ធនាគារកណ្តាលឲ្យដឹងនៅក្រោយកិច្ចប្រជុំផ្នែកគោលនយោបាយរយៈពេល ២ ថ្ងៃថា៖ «សេដ្ឋកិច្ចជប៉ុនទំនងជានៅតែស្ថិតក្នុងស្ថានភាពលំបាកធ្ងន់ធ្ងរសម្រាប់ពេលនេះ ដោយសារផលប៉ះពាល់នៃកូវីដ ១៩ ក្នុងប្រទេស និងក្រៅប្រទេស ទោះបីសកម្មភាពសេដ្ឋកិច្ចត្រូវគេរំពឹងថា នៅតែដំណើរការឡើងវិញក្តី»។
ធនាគារកណ្តាលនៅតែប្តេជ្ញាតាមដានឲ្យបានដិតដល់ផលប៉ះពាល់បណ្តាលមកពីវីរុសនេះលើសេដ្ឋកិច្ចជប៉ុន ដែលបានបង្កឲ្យធ្លាក់ចុះជាលើកដំបូងចាប់តាំងពីឆ្នាំ ២០១៥។
ធនាគារជប៉ុនមិនបានផ្លាស់ប្តូរនូវគម្រោងការគោលនយោបាយរូបិយវត្ថុបន្ថែមនោះទេ ពាក់ព័ន្ធនឹងការទិញមូលបត្របំណុលរដ្ឋាភិបាលដែលគ្មានដែនកំណត់ និងអត្រាការប្រាក់អវិជ្ជមាន។
ការចំណាយរបស់អតិថិជនបានថមថយយ៉ាងខ្លាំង បើទោះបីជាចំនួនអ្នកឆ្លង និងអ្នកស្លាប់ពីជំងឺកូវីដ ១៩ ធ្លាក់ចុះច្រើនក៏ដោយ។ ទីក្រុងតូក្យូកំពុងកើនឡើងការភ័យខ្លាចនៃរលកជំងឺលើកទី ២៕ RR
