.jpg)
លោក ជា ចាន់តូ ទេសាភិបាល ធនាគារជាតិនៃកម្ពុជា ក្នុងកិច្ចប្រជុំនាពេលកន្លងមក។ រូបថត NBC
ភ្នំពេញៈ ធនាគារជាតិនៃកម្ពុជា (NBC) បានអំពាវនាវធនាគារ និងគ្រឹះស្ថានមីក្រូហិរញ្ញវត្ថុទាំងអស់ដែលកំពុងប្រតិបត្តិការក្នុងវិស័យនេះឱ្យផ្អាកការបែងចែកភាគលាភចំពោះប្រាក់ចំណេញឆ្នាំ ២០២០ ដល់ភាគទុនិករបស់ពួកគេ ដែលជាវិធានការមួយរួមចំណែករក្សាកំណើនរបស់វិស័យនេះ។
សេចក្ដីប្រកាសរបស់ NBC កាលពីថ្ងៃសុក្រឱ្យដឹងថា ចាប់តាំងពីអំឡុងពេលផលប៉ះពាល់ពីការរីករាលដាលនៃជំងឺកូវីដ ១៩ រហូតដល់បច្ចុប្បន្ន ធនាគារជាតិនៃកម្ពុជាបានដាក់ចេញនូវវិធានការជាច្រើន ដើម្បីបន្ធូរបន្ថយលើការអនុវត្តតាមបទប្បញ្ញត្តិរបស់គ្រឹះស្ថានស្របតាមគោលនយោបាយរបស់រាជរដ្ឋាភិបាល ហើយវិស័យធនាគារនៅតែមានភាពរឹងមាំ និងបន្តមានប្រាក់ចំណេញក្នុងបរិបទសេដ្ឋកិច្ចបច្ចុប្បន្ន។
NBC បន្តថា៖ «ដោយសារស្ថានភាពនៃការរីករាលដាលជំងឺកូវីដ ១៩ នៅមិនទាន់មានភាពច្បាស់លាស់ និងមិនទាន់អាចគ្រប់គ្រងបានទាំងស្រុង និងដើម្បីធានាភាពធន់ និងស្ថិរភាព ក្នុងវិស័យធនាគារ ធនាគារជាតិនៃកម្ពុជាស្នើគ្រប់គ្រឹះស្ថានទាំងអស់ ផ្អាកការបែងចែកភាគលាភចំពោះប្រាក់ចំណេញរបស់គ្រឹះស្ថានក្រោយធ្វើសវនកម្ម ឆ្នាំ ២០២០ និង រៀបចំយុទ្ធសាស្ដ្រចាកចេញសមស្រប បន្ទាប់ពីការអនុគ្រោះនានាពីធនាគារជាតិនៃកម្ពុជាត្រូវបានបញ្ចប់។
លោក Igor Zimarev ប្រធានផ្នែកទីផ្សារធនាគារ ABA Bank បានប្រាប់ភ្នំពេញប៉ុស្ដិ៍កាលពីថ្ងៃសុក្រថា លោកមិនទាន់បានឃើញ សេចក្តីសម្រេចរបស់ NBC ជាផ្លូវការលើវិធានការនេះទេ។
លោកថ្លែងថា៖ «យើងមិនបែងចែកភាគលាភដល់ភាគទុនិកនោះទេ។ ជាយុទ្ធសាស្ដ្រ សេចក្ដីសម្រេចនេះត្រូវបានធ្វើឡើងដើម្បីបង្វែរប្រាក់ចំណេញរបស់ធនាគារទៅជាដើមទុន គាំទ្រដល់កំណើនប្រាក់បញ្ញើ និងផលបត្រកម្ចីរបស់ខ្លួនដែលជាបន្តបន្ទាប់ ផលប៉ះពាល់វិជ្ជមានដល់អតិថិជនរបស់យើង និងសេដ្ឋកិច្ចក្នុងស្រុក»។
លោកបន្តថា៖ «ដោយផ្អែកតាមយុទ្ធសាស្ដ្ររបស់យើង បច្ចុប្បន្នយើងមិនមានផែនការបែងចែកភាគលាភដល់ភាគទុនិកទេ»។
ទាក់ទងនឹង NBC ដែលបានស្នើឱ្យ FIs ទាំងអស់រៀបចំយុទ្ធសាស្ដ្រចាកចេញ លោក Igor បានឱ្យដឹងថា ធនាគារ ABA បាន រៀបចំល្អប្រសើរលើយុទ្ធសាស្ដ្រ។
លោកបញ្ជាក់ថា៖ «យើងនៅក្នុងធនាគារ ABA Bank ត្រូវបានរៀបចំល្អប្រសើរសម្រាប់ការអភិវឌ្ឍនៃស្ថានការណ៍នៅលើទីផ្សារ ហើយនឹងអនុវត្តសេណារីយោចាកចេញដែលបានដាក់ចេញដោយនិយតករ»។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានអះអាងថា ធនាគារអេស៊ីលីដា បានរៀបចំបានយ៉ាងល្អជុំវិញយុទ្ធសាស្ដ្ររបស់ធនាគារ ក្នុងការរក្សាកំណើន ប៉ុន្តែបដិសេធមិនអធិប្បាយពីសេចក្តីសម្រេចថ្មី។
លោក កាំង តុងងី ប្រធានសមាគមមីក្រូហិរញ្ញវត្ថុកម្ពុជា (CMA) ក៏បានបដិសេធធ្វើអត្ថាធិប្បាយផងដែរ ដោយសារលោកចាំបាច់ត្រូវទទួលបានព័ត៌មានបន្ថែមសិន ទាក់ទងនឹងការអំពាវនាវដែលបានធ្វើឡើងដោយ NBC នេះ។
លោកបញ្ជាក់ថា៖ «ខ្ញុំនឹងប្រមូលទិន្នន័យបន្ថែម»។
កាលពីខែមីនាឆ្នាំមុន NBC បានដាក់ចេញវិធានការមួយចំនួន ដើម្បីជួយសម្រួល និងជំរុញឱ្យគ្រឹះស្ថានហិរញ្ញវត្ថុត្រូវមានសន្ទនីយភាពកាន់តែរឹងមាំ ដូចជាការពន្យារពេលការអនុវត្តទ្រនាប់ សន្ទនីយភាពដើមទុន (CCB) រហូតដល់ឆ្នាំ ២០២១ កាត់បន្ថយ អត្រាការប្រាក់លើប្រតិបត្តិការផ្ដល់សន្ទនីយភាពដោយមានការធានា (LPCO) រហូតដល់ ០,៥ ភាគរយ និងកាត់បន្ថយអត្រាការប្រាក់លើបណ្ណប្រាក់បញ្ញើអាចជួញដូរបាន (NCD)។ កាត់បន្ថយអត្រាការប្រាក់ទុនបម្រុងកាតព្វកិច្ចមកនៅត្រឹម ៧ ភាគរយសម្រាប់ទាំងរូបិយប័ណ្ណក្នុងស្រុក និងបរទេសក្នុងរយៈពេល ៦ ខែ ដែលចាប់ផ្ដើមពីខែមេសាឆ្នាំ ២០២០ រហូតដល់ឆមាសទី ១ ឆ្នាំ ២០២១ និងកាត់បន្ថយអនុបាតក្របខ័ណ្ឌសន្ទនីយភាព (LCR) មកនៅត្រឹមកម្រិត សមរម្យ ប្រសិនបើវាចាំបាច់។
ទ្រព្យសកម្មសរុបក្នុងវិស័យហិរញ្ញវត្ថុបានកើនឡើងដល់ ៥៩,៤ ពាន់លានដុល្លារកាលពីចុងឆ្នាំមុនកើន ១៥,៧ ភាគរយធៀបនឹងឆ្នាំ ២០១៩៕LA
