.jpg)
ធនាគារជាតិនៃកម្ពុជា។ រូបថត NBC
ភ្នំពេញៈ ធនាគារជាតិនៃកម្ពុជា (NBC) បានបន្តដាក់ចេញនូវវិធានការអនុគ្រោះដំណាក់កាលទី៣ ក្នុងការជួយសម្រួលដល់គ្រឹះស្ថានហិរញ្ញវត្ថុ ដើម្បីជាការបើកលទ្ធភាពបន្ថែមដល់ស្ថាប័នទាំងអស់ឱ្យបញ្ចេញប្រាក់កម្ចីចូលក្នុងចរន្តសេដ្ឋកិច្ចនៅអំឡុងពេលនៃការរីករាលដាលជំងឺកូវីដ ១៩ ជាពិសេសក្នុងបរិការណ៍នៃការរីករាលដាលជំងឺកូវីដ ១៩ ព្រឹត្តិការណ៍សហគមន៍ ២០ កុម្ភៈ។
«ធនាគារជាតិនៃកម្ពុជា សូមជម្រាបជូនសាធារណជនទូទៅ និងភាគីពាក់ព័ន្ធជ្រាបថា ធនាគារជាតិនៃកម្ពុជាបានដាក់ចេញនូវវិធានការអនុគ្រោះជាបន្តបន្ទាប់ ដើម្បីចូលរួមគាំទ្រគោលនយោបាយរាជរដ្ឋាភិបាលក្នុងការដោះស្រាយបញ្ហាប្រឈម និងសម្រាលបន្ទុកប្រជាពលរដ្ឋដែលរងផលប៉ះពាល់ពីជំងឺកូវីដ ១៩»។ នេះបើតាមសេចក្តីប្រកាសព័ត៌មានរបស់ NBC ដែលបានសម្រេចកាលពីថ្ងៃ ២១ ខែឧសភា។
សេចក្តីប្រកាសព័ត៌មានឱ្យដឹងទៀតថា ធនាគារជាតិនៃកម្ពុជាសម្រេចបន្តវិធានការអនុគ្រោះដំណាក់កាលទី ៣ ដូចជា រក្សាការអនុវត្តប្រាក់បម្រុងកាតព្វកិច្ចតាមអត្រា ៧ ភាគរយ រហូតដល់មានការជូនដំណឹងជាថ្មី, អនុញ្ញាតឱ្យគ្រឹះស្ថានធនាគារ និងហិរញ្ញវត្ថុបន្តធ្វើឥណទានរៀបចំឡើងវិញរហូតដល់ថ្ងៃទី ៣១ ខែ ធ្នូ ឆ្នាំ ២០២១។
NBC បញ្ជាក់ថា៖ «ចំពោះអតិថិជនដែលរស់នៅទីតាំងតំបន់បិទខ្ទប់តាមការកំណត់របស់រដ្ឋាភិបាល ឬអាជ្ញាធរពាក់ព័ន្ធ គ្រឹះស្ថានធនាគារ និងហិរញ្ញវត្ថុអាចធ្វើឥណទានរៀបចំឡើងវិញលើសពី ៣ ដងក្នុងអំឡុងពេលអនុគ្រោះនេះ និងបន្តលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុពិនិត្យលទ្ធភាពអនុគ្រោះ បន្ធូរបន្ថយ ឬលើកលែងការយកសោហ៊ុយ ឬការពិន័យផ្សេងៗតាមស្ថានភាពជាក់ស្តែងរបស់អតិថិជន»។
គិតត្រឹមថ្ងៃទី ២៤ ខែឧសភា កម្ពុជាបានរាយការណ៍ពីករណីឆ្លងជំងឺកូវីដ ១៩ ថ្មីចំនួន ៥៥៦ នាក់ ខណៈអ្នកជំងឺ ៦៥៨ នាក់បានជាសះស្បើយ។ មកដល់ពេលនេះ កម្ពុជាបានបញ្ជាក់ករណីឆ្លងកូវីដ ១៩ ចំនួន ២៥ ៧៦១ នាក់ ក្នុងនោះអ្នកជំងឺ ១៨ ៣៥៩ នាក់បានជាសះស្បើយ និងស្លាប់ ១៧៩ នាក់។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ស្វាគមន៍វិធានការនេះ ព្រោះវិធានការនេះនឹងផ្ដល់ឱកាសច្រើនឱ្យគ្រឹះស្ថានហិរញ្ញវត្ថុក្នុងការផ្ដល់ការរៀបចំឥណទានឡើងវិញកាន់តែច្រើន និងផ្តល់ការគាំទ្រផ្សេងទៀតដល់អតិថិជននៅក្នុងអំឡុងពេលវេលាដ៏ពិបាកនេះ។
លោកបានប្រាប់ភ្នំពេញប៉ុស្ដិ៍ក្នុងថ្ងៃទី ២៤ ខែឧសភា ថា៖ «យើងរីករាយដែលធនាគារជាតិនៃកម្ពុជាបានបន្តការរៀបចំឥណទានឡើងវិញដល់ចុងឆ្នាំ។ ជាមួយនឹងការបន្តនេះ យើងអាចបន្តគាំទ្រដល់អតិថិជនរបស់យើងក្នុងពេលវេលាដ៏ពិបាកដែលឧស្សាហកម្មទាំងអស់ទទួលរងផលប៉ះពាល់ និងរួមទាំងធនាគារផងដែរ»។
លោកបន្ថែមថា៖ «ការបន្តការផ្តល់នូវទុនបម្រុងកាតព្វកិច្ចនេះអាចឱ្យធនាគារដែលមានសន្ទនីយភាពមិនគ្រាន់តែ ដើម្បីគាំទ្រដល់អតិថិជនខ្លួនប៉ុណ្ណោះទេ ប៉ុន្តែថែមទាំងអាចគាំទ្រកំណើនរបស់វិស័យនេះផងដែរ ដើម្បីគាំទ្រដល់កំណើនសេដ្ឋកិច្ច និងការស្ទុះងើបឡើងវិញ»។
លោក សាយ សូនី នាយកប្រតិបត្តិគ្រឹះស្ថានមីក្រូហិរញ្ញវត្ថុប្រាសាក់ក៏បានបង្ហាញពីភាពចាំបាច់លើការបន្តវិធានការនេះដើម្បីរួមចំណែកជំរុញសកម្មភាពសេដ្ឋកិច្ចផងដែរ។
លោកថ្លែងថា៖ «ខ្ញុំសូមថ្លែងអំណរគុណដល់ NBC ដែលបានយល់ច្បាស់ពីតម្រូវការរបស់អតិថិជនក្នុងអំឡុងពេលវេលាដ៏ពិបាកនេះ។ តាមរយៈការអន្តរាគមន៍ អតិថិជនអាចស្វែងរកការរៀបចំឥណទានឡើងវិញរបស់ពួកគេច្រើនជាង ៣ ដង និងមានពេលរហូតដល់ថ្ងៃទី ៣១ ខែធ្នូ ឆ្នាំ ២០២១»។
លោកប្រាប់ថា៖ «ប្រាសាក់ មានក្ដីរីករាយក្នុងការសហការជាមួយរដ្ឋាភិបាល ដើម្បីជួយសម្រាលក្ដីឈឺចាប់ដល់អតិថិជនតាមរយៈការអនុវត្តយ៉ាងពេញលេញនូវវិធានការទាំងអស់ដែលចេញដោយនិយតករ ព្រមទាំង NBC។ តាមរយៈការមើលឃើញមានតម្រូវការមូលនិធិ/ប្រាក់កាន់តែច្រើន ដើម្បីចាប់ផ្ដើមអាជីវកម្ម ព្រមទាំងទុនបង្វិល ស្របពេលរដូវផលិតកម្មកសិកម្មកំពុងចាប់ផ្ដើម ដូច្នេះយើងបន្តការផ្ដល់កម្ចី ប្រសិនបើមានតម្រូវការ»។
ទ្រព្យសកម្មសរុបនៅធនាគាររបស់កម្ពុជា និង MFIs បានកើនឡើងដល់ ៥៩,៤ ពាន់លានដុល្លារ កាលពីចុងឆ្នាំមុន កើន ១៥,៧ ភាគរយធៀបនឹងចុងឆ្នាំ ២០១៩។ នេះបើតាមរបាយការណ៍ប្រចាំឆ្នាំ ២០២០ របស់ NBC។
កម្ចីនៅក្នុងធនាគារ និង MFIs បានកើនឡើង ១៤,៨ ភាគរយដល់ ៣៧,៣ ពាន់លានដុល្លារកាលពីចុងឆ្នាំមុន ខណៈដែលប្រាក់បញ្ញើបានកើនឡើង ១៥,៤ ភាគរយដល់ ៣៣,៨ ពាន់លានដុល្លារ៕ LA
