.jpg)
អតិថិជនកំពុងដកប្រាក់ពីម៉ាស៊ីនអេធីអឹមរបស់ធនាគារ Wells Fargo។ រូបថត AFP
ក្រុងញូវយ៉កៈ ធនាគារ Wells Fargo កាលពីថ្ងៃសុក្រសប្តាហ៍មុនបានយល់ព្រមបង់ប្រាក់ពិន័យចំនួន ១ ពាន់លានដុល្លារចំពោះការចោទប្រកាន់របស់សហរដ្ឋអាមេរិកពីកំហុសរបស់ធនាគារមួយនេះដែលបានធ្វើឲ្យខូចខាតទ្រព្យសម្បត្តិរបស់អតិថិជន។
ធនាគារដ៏ធំរបស់អាមេរិកមួយនេះដែលឋិតក្រោមការរិះគន់ដោយសាររឿងអាស្រូវគណនីក្លែងក្លាយកាលពីឆ្នាំ ២០១៦ នឹងត្រូវបង់ពិន័យដើម្បីដោះស្រាយបញ្ហាអប្រសិទ្ធភាពដែលបានរងការចោទប្រកាន់ក្នុងអាជីវកម្មឥណទានគេហដ្ឋាន និងឥណទានរថយន្តរបស់ ដែលត្រូវបានរកឃើញដោយការិយាល័យគ្រប់គ្រងរូបិយប័ណ្ណ (OCC) និងការិយាល័យការពារហិរញ្ញវត្ថុអតិថិជន (BCFP)។
ការិយាល័យ OCC និងការិយាល័យ BCFP បានរកឃើញថា ធនាគារ Wells Fargo បានយកកម្រៃសេវាពីអតិថិជនមួយចំនួនដោយមិនត្រឹមត្រូវក្នុងកម្មវិធីផ្តល់កម្ចីទិញរថយន្ត និងក្នុងករណីមួយចំនួនទៀត «ពោលគឺយកកម្រៃមិនសមរម្យ» លើរថយន្តដែលកាន់កាប់ឡើងវិញពី អ្នកខ្ចីប្រាក់ ដែលមិនមានលទ្ធភាពសងប្រាក់។ នេះបើយោងតាមដីកាបង្គាប់ផ្នែកនិយ័តកម្មរបស់ទីភ្នាក់ងារទាំងពីរ។
ទីភ្នាក់ងារទាំងនេះ ក៏បានរកឃើញផងដែរថា ធនាគារ Wells Fargo បានយកកម្រៃសេវាដោយមិនត្រឹមត្រូវពីអតិថិជន នៅពេលដែលទ្រព្យបញ្ចាំមិនអាចត្រូវបានធានាតាមកាលបរិច្ឆេទផុតកំណត់ «ដែលមានក្នុងកិច្ចសន្យា» សម្រាប់ការធានាអត្រាការប្រាក់ សូម្បីតែក្នុងករណីមួយចំនួនដែលធនាគារនេះជាអ្នកទទួលខុសត្រូវចំពោះកាលបរិច្ឆេទកំណត់ដែលបានខកខាននោះក៏ដោយ។
ការិយាល័យ OCC បានឲ្យដឹងក្នុងសេចក្តីរាយការណ៍ព័ត៌មានមួយថា ធនាគារ Wells Fargo ត្រូវបានពិន័យ «ដោយសារភាពធ្ងន់ធ្ងរនៃអប្រសិទ្ធភាពការងារ និងការបំពានច្បាប់ ការធ្វើឲ្យប៉ះពាល់ដល់ស្ថានភាពហិរញ្ញវត្ថុចំពោះអតិថិជន និងការបរាជ័យរបស់ធនាគារនេះក្នុងការកែលម្អអប្រសិទ្ធភាពការងារ និងការរំលោភពេលវេលាជាដើម»។
ធនាគារនេះពុំបានសារភាព ឬច្រានចោលការចោទប្រកាន់ទាំងនេះទេ៕ AFP/BP
