ធនាគារប្រៃសណីយ៍កម្ពុជា អ.ក ទទួលជោគជ័យគួរឱ្យកត់សម្គាល់មួយទៀតកាលពីថ្ងៃចន្ទ បន្ទាប់ពីអគ្គនាយកដ្ឋានពន្ធដារកម្ពុជាបានអនុញ្ញាតឱ្យស្ថាប័នហិរញ្ញវត្ថុមួយនេះប្រមូលពន្ធផ្សេងៗ។ ឥឡូវនេះបុគ្គល និងសាជីវកម្ម អាចបង់ពន្ធរបស់ពួកគេដូចជាពន្ធអាករគ្រប់ប្រភេទពន្ធលើអចលនទ្រព្យ និងពន្ធលើមធ្យោបាយធ្វើដំណើរនៅតាមសាខាផ្សេងៗរបស់ធនាគារ។
នៅក្នុងពិធីដ៏ពិសេសនោះធនាគារបានប្រកាសថាអគ្គនាយកដ្ឋានពន្ធដារកម្ពុជាបានអនុញ្ញាតឱ្យស្ថាប័នហិរញ្ញវត្ថុមួយនេះប្រមូលពន្ធ ខណៈដែលធនាគារមានគោលជំហរល្អនៅលើទីផ្សារដើម្បីដាក់ចេញនូវសេវាកម្មថ្មី។
លោក តូច ចៅចេក ប្រធាននាយកប្រតិបត្តិនៃធនាគារប្រៃសណីយ៍កម្ពុជា បានថ្លែងថា៖ «ការបង់ពន្ធជាការទទួលខុសត្រូវរបស់ប្រជាពលរដ្ឋគ្រប់រូបក្នុងការជួយទ្រទ្រង់ការចំណាយរបស់រដ្ឋ។ ម្យ៉ាងវិញទៀត ពន្ធអាករជាប្រភពចំណូលដ៏សំខាន់របស់ជាតិក្នុងការជួយជំរុញឱ្យមានការអភិវឌ្ឍចាប់តាំងពីរដ្ឋបាលថ្នាក់ជាតិ រហូតដល់ថ្នាក់ក្រោមជាតិដើម្បីឆ្លើយតបទៅនឹងតម្រូវការ និងភាពចាំបាច់របស់ប្រជាពលរដ្ឋកម្ពុជា»។
លោកបន្ថែមថាការប្រមូលពន្ធបានច្រើនក៏ធានាបាននូវនិរន្តរភាពនៃការចំណាយនានារបស់រដ្ឋ ជាពិសេសចំណូលពន្ធដែលបានមកពីការប្រមូលពន្ធត្រូវបានចំណាយសម្រាប់ការកសាងហេដ្ឋារចនាសម្ព័ន្ធសង្គមមានដូចជា ការសាងសង់សាលារៀន មន្ទីរពេទ្យ ផ្លូវថ្នល់ ស្ពាន សួនច្បារ វត្តអារាម និងហេដ្ឋារចនាសម្ព័ន្ធផ្សេងៗទៀតជាច្រើន។
លោក ចៅចេក លើកឡើងថា៖ «ធនាគារ ប្រៃសណីយ៍កម្ពុជា ពិតជាមានមោទនភាពណាស់ដែលអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានផ្តល់សិទ្ធិដល់ធនាគារដើម្បីធ្វើការប្រមូលពន្ធ និងអាករជូនអគ្គនាយកដ្ឋានពន្ធដារ។
សព្វថ្ងៃនេះ ធនាគារប្រៃសណីយ៍កម្ពុជាមានទ្រព្យសកម្មសរុបជាង ១,០០០ លានដុល្លារអាមេរិក មានបណ្តាញសាខាចំនួន ៥៨ សាខា រួមបញ្ចូលទាំងគ្រឹះស្ថានមីក្រូហិរញ្ញវត្ថុ ហ្វូណន ដែលជាបុត្រសម្ព័ន្ធចំនួន ៥១ សាខា និងម៉ាស៊ីនអេធីអឹមចំនួន ៧៧ ទីតាំងទូទាំងប្រទេសដែលអាចផ្តល់ជូនភាពងាយស្រួលដល់អតិថិជន និងសាធារណជនទាំងអស់អាចធ្វើដំណើរទៅបង់ពន្ធដោយងាយស្រួល និងចំណាយពេលវេលាតិច»។
កម្មវិធីនេះត្រូវបានប្រារព្ធឡើងក្រោមតំណាងអធិបតីដ៏ខ្ពង់ខ្ពស់របស់ឯកឧត្តមបណ្ឌិត កែន សម្បត្តិ អគ្គនាយករងនៃអគ្គនាយកដ្ឋានពន្ធដារ ឯកឧត្តម អោក បូរា ប្រតិភូរាជរដ្ធាភិបាលទទួលបន្ទុកជាអគ្គនាយកប្រៃសណីយ៍កម្ពុជា និងទីប្រឹក្សាក្រុមប្រឹក្សាភិបាលនៃធនាគារ ប្រៃសណីយ៍កម្ពុជា លោក តូច ចៅចេក ប្រធាននាយកប្រតិបត្តិនៃធនាគារ ប្រៃសណីយ៍កម្ពុជាតំណាងក្រុមប្រឹក្សាភិបាលនៃធនាគារប្រៃសណីយ៍កម្ពុជា និងអមដំណើរដោយគណៈគ្រប់គ្រងជាន់ខ្ពស់ លោកនាយក នាយិកាសាខា និងអ្នកតំណាងមកពីអគ្គនាយកដ្ឋានពន្ធដារជាច្រើនរូបផងដែរ។
ឯកឧត្តមបណ្ឌិត កែន សម្បត្តិ មានប្រសាសន៍ថា៖ «ការដាក់ឱ្យដំណើរការជាផ្លូវការនូវការប្រើប្រាស់សេវាកម្មរបស់ធនាគារ ប្រៃសណីយ៍កម្ពុជា ក.អ សម្រាប់ប្រតិបត្តិការចំណូលពន្ធ និងអាករនាថ្ងៃនេះ គឺធ្វើឡើងក្នុងគោលបំណងសម្រួលជំរុញ និងពន្លឿនការផ្តល់សេវាបង់ពន្ធជូនអ្នកជាប់ពន្ធឱ្យកាន់តែមានតម្លាភាព គណនេយ្យភាព ប្រសិទ្ធភាព ស័ក្តិសិទ្ធិភាព និងគុណភាព ជាពិសេសអាចបង្ខិតសេវាបង់ពន្ធ និងអាករឱ្យកៀកនឹងអ្នកជាប់ពន្ធ និងជួយកាត់បន្ថយការលំបាកនានាដោយផ្តល់មកវិញនូវការជឿទុកចិត្តពីសំណាក់អ្នកជាប់ពន្ធផងដែរ។
ការដាក់ដំណើរការជាផ្លូវការនូវការប្រើប្រាស់សេវាកម្មរបស់ធនាគារ «ប្រៃសណីយ៍កម្ពុជា ក.អ ក្នុងការទទួលប្រាក់ពន្ធ និងអាករនេះគឺជាការបើកទំព័រថ្មីមួយទៀតនៃការចាប់យកនូវសក្តានុពល និងកាលានុវត្តនៃបច្ចេកវិទ្យាព័ត៌មានរបស់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ និងធនាគារ ប្រៃសណីយ៍កម្ពុជា ក.អ»។
ឯកឧត្តម កែន សម្បត្តិ ថ្លែងបញ្ជាក់ថា៖ «វាក៏ជាការចូលរួមចំណែកដ៏សំខាន់ក្នុងការជំរុញរដ្ឋាភិបាលអេឡិចត្រូនិក (E-Government) និងបដិវត្តន៍ឧស្សាហកម្មទី ៤ ជាពិសេសជាការឆ្លើយតបប្រកបដោយប្រសិទ្ធភាពផងដែរ ទៅនឹងផលប៉ះពាល់នៃវិបត្តិជំងឺបណ្តាលមកពីមេរោគកូវីដ១៩ ដែលតម្រូវឱ្យរក្សាគម្លាត និងកាត់បន្ថយការជួបជុំគ្នា»។
ក្នុងឆ្នាំ ២០២០ ធនាគារបានដាក់ដំណើរការប្រព័ន្ធធនាគារឌីជីថលមុខងារថ្មីជាច្រើនរួមមាន ការស្នើសុំបើកគណនីអនឡាញ និងការស្នើសុំឥណទានអនឡាញ ប្រព័ន្ធវាយតម្លៃឥណទានយ៉ាងឆាប់រហ័ស ដំណើរការបណ្ណវីសា សេវាធនាគារចល័ត សេវាផ្ទេរប្រាក់ឆ្លងធនាគារតាមប្រព័ន្ធបាគង, Retail Pay, CSS និង Fast ជាដើម។
ការសម្រេចបានទ្រព្យសកម្មសរុបកើនឡើងរហូតដល់ជាង ១ ពាន់លានដុល្លារអាមេរិក ចំនួនគណនីសរុបជាង 10 ម៉ឺនគណនី និងចំនួនបណ្ណ ATM ជាង ៥ ម៉ឺនបណ្ណដែលកំពុងបម្រើសេវាគ្រប់គ្រប់ហិរញ្ញវត្ថុជូនប្រជាជនកម្ពុជា។
ក្រៅពីសេវាប្រមូលប្រាក់បង់ពន្ធ ធនាគារប្រៃសណីយ៍កម្ពុជាក៏មានបម្រើសេវាហិរញ្ញវត្ថុជាច្រើនសន្ធឹកសន្ធាប់ផ្សេងទៀតរួមមាន សេវាឥណទាន សេវាបញ្ញើសន្សំ សេវាអេធីអឹម សេវាធនាគារចល័តតាមទូរស័ព្ទ បណ្ណឥណទាន និងឥណពន្ធវីសា សេវាផ្ទេរប្រាក់ក្នុង និងក្រៅប្រទេស និងសេវាហិរញ្ញវត្ថុជាច្រើនទៀត៕